Le Roman de la Rose

Chapitre XXII

____________________________________________________________________________

Comment Raison de Dieu aymée,

Est jus de sa tour devalée,

Qui l'Amant chastie et reprent

De ce que fol Amour emprent.

En cest point ai grant piece esté,

2972

Tant que me vit ensi maté

La dame de la haute angarde

Qui de sa tor aval esgarde;

Raison fu la dame apelee.

2976

Lors est de sa tor devalee,

Si est tot droit a moi venue.

El ne fu juene ne chenue.

Ne fu trop haute ne trop basse,

2980

Ne fu trop graille ne trop grasse,

Li ueil qui en son chief estoient

Con deus estoiles reluisoient;

Si ot ou chief une corone:

2984

Bien resembloit haute persone.

A son semblant e a son vis

Pert quel fu faite en parevis,

Car Nature ne seüst pas

2988

Uevre faire de tel compas.

Sachiez, se la lettre ne ment,

Que Deus la fist demainement,

A sa semblance e a s'image,

2992

E li dona tel avantage

Qu'ele a pooir e seignorie

De garder ome de folie,

Por quoi il soit teus qu il la croie.

2996

Ensi con je me dementoie,

Atant es vos Raison comence:

«Biaus amis, folie e enfance

T'ont mis en poine e en esmai;

3000

Mar veïs le bel tens de mai

Qui fist ton cuer trop esgaier;

Mar t'alas onques ombreier

Ou vergier don Oiseuse porte

3004

La clef don el t'ovri la porte;

Fos est qui s'acointe d'Oiseuse:

S'acointance est trop perilleuse.

El t'a trai e deceü;

3008

Amors ne t'eüst ja veü

S'Oiseuse ne t'eüst conduit

Ou bel vergier qui est Deduit.

Se tu as folement ovré,

3012

Or fai tant qu'il soit recovré,

E garde bien que plus ne croies

Le conseil par quoi tu foloies.

Bel foloie qui se chastie;

3016

E quant juenes on fait folie,

L'en ne s'en doit pas merveillier

Or te vueil dire e conseillier

Que l'amor metes en obli

3020

Don je te voi si afoibli

E si conquis e tormenté.

Je ne voi mie ta santé

Ne ta guerison autrement,

3024

Car mout te bee durement

Dangiers li fel a guerreier:

Tu ne l'as mie a essaier.

E de Dangier neient ne monte

3028

Envers que de ma fille Honte,

Qui les roses defent e garde

Con cele qui n'est pas musarde,

Si en doiz avoir grant Peor,

3032

Car a ton ues n'i voi peor.

Avueques ceus est Male Bouche,

Qui ne suefre que nus i touche;

Avant que la chose soit faite

3036

L'a il ja en cent leus retraite.

Mout as a faire a dure gent.

Or garde lequel est plus gent

Ou dou laissier ou dou porsivre

3040

Ce qui te fait a dolor vivre,

C'est li maus qui amors a non,

Ou il n'a se folie non,

Folie, si m'aïst Deus, voire!

3044

On qui aime ne puet bien faire

Ne a nul preu dou monde entendre:

S'il est clers, il pert son aprendre,

E se il fait autre mestier,

3048

Il n'en puet guieres esploitier.

Ensorquetot il a plus poine

Que n'ont ermite ne blanc moine.

La poine en est desmesuree

3052

E la joie a corte duree.

Qui joie en a, petit li dure,

E de l'avoir est aventure,

Car je voi que maint s'en travaillent

3056

Qui en la fin dou tot i faillent.

Onques mon conseil n'atendis

Quant au deu d'Amors te rendis;

Li cuers que tu as trop volage

3060

Te fist entrer en tel folage.

La folie fu tost emprise,

Mais a l'issir a grant maistrise.

Or met l'amor en nonchaloir,

3064

Qui te fait vivre e non valoir,

Car la folie adès engraigne,

Qui ne fait tant qu'ele remaigne.

Pren durement as denz le frein,

3068

Si dente ton cuer e refrain.

Tu doiz metre force e defense

Encontre ce que tes cuers pense:

Qui toutes eures son cuer croit,

3072

Ne puet estre qu'il ne foloit.»