Le Roman de la Rose

Chapitre XXVI

____________________________________________________________________________

Comment l'Amant vient à Dangier,

Luy prier que plus ledangier

Ne le voulsist, et par ainsi

Humblement luy crioit mercy.

A Dangier sui venuz honteus,

3152

De ma pais faire covoiteus;

Mais la haie ne passai pas,

Por ce qu'il m'ot veé le pas.

Je le trovai en piez drecié,

3156

Fel par semblant e corrocié,

En sa main un baston d'espine.

Je tin vers lui la teste encline,

E li dis: «Sire, je sui ci

3160

Venuz por vos crier merci;

Mout me poise s'il peüst estre

Don je vos fis onques iraistre,

Mais or sui prez de l'amender

3164

Si con vos savroiz comander.

Senz faille Amors le me fist faire,

Don je ne puis mon cuer retraire;

Mais jamais jor n'avrai beance

3168

A rien don vos aiez pesance;

Je vueil miauz sofrir ma mesaise

Que faire rien qui vos desplaise.

Or vos requier que vos aiez

3172

Pitié de moi e apaiez

Vostre ire, qui trop m'espoente,

E je vos jur e acreante

Que vers vos si me contendrai

3176

Que ja de rien n'i mesprendrai,

Por quoi vos me voilliez greer

Ce que ne me poez veer.

Voilliez que j'ain tant solement,

3180

Autre chose ne vos demant,

Toutes voz autres volentez

Ferai se ce me consentez;

Si ne me poez destorber,

3184

Ja ne vos quier de ce lober,

Car j'amerai puis qu'il me siet,

Cui qu'il soit bel ne cui qu'il griet;

Mais ne voudroie, por mon pois

3188

D'argent, qu'il fust sor vostre pois.»

Mout trovai Dangier dur e lent

De pardoner son mautalent;

E si le m'a il pardoné

3192

En la fin, tant l'ai sarmoné,

E me dist par parole brieve:

«Ta requeste rien ne me grieve,

Si ne te vueil pas escondire.

3196

Saches je n'ai vers toi point d'ire,

E se tu aimes, moi que chaut?

Ce ne me fait ne froit ne chaut.

Adès aime, mais que tu soies

3200

Loing de mes roses toutesvoies.

Ja ne te porterai menaie

Se tu passes jamais la haie.»

Ensi m'otreia ma requeste,

3204

E je l'alai conter en heste

A Ami, qui s'en esjoï,

Con bons compainz, quant il l'oï.

«Or vait», fait il, «bien vostre afaire:

3208

Encor vos sera debonaire

Dangiers, qui fait a mainz lor bon

Quant il a montré son bobon.

S'il iere pris en bone voine,

3212

Pitié avroit de vostre poine;

Or devez sofrir e atendre

Tant qu'en bon point le puissiez prendre;

J'ai bien esprové que l'en vaint

3216

Par sofrir felon e refraint.»

Mout me conforta doucement

Amis, qui mon avancement

Vosist autresi bien con gié.

3220

Atant ai pris de lui congié.

A la haie que Dangiers garde

Sui retornez, que mout me tarde

Que je le bouton au moins voie,

3224

Des qu'avoir n'en puis autre joie.

Dangiers se prent garde sovent

Se je li tieng bien son covent;

Mais je redot tant sa menace

3228

Que n'ai talent que li mesface;

Ainz me sui penez longuement

De faire son comandement,

Por lui acointier e atraire;

3232

Mais ce me torne a grant contraire

Que sa merci trop me demeure.

Il voit maintes foiz que je pleure

E que je me plaing e sospir,

3236

Por ce qu'il me fait trop cropir

Delez la haie, que je n'ose

Passer por aler a la rose,

E tant qu'il a certainement

3240

Veü a mon contenement

Qu'Amors malement me jostise,

E qu'il n'i a point de feintise

En moi ne de desleiauté;

3244

Mais il est de tel cruauté

Qu'il ne se deigne encor refraindre,

Tant m'oie dementer ne plaindre.