|
- L a n z e l e t
667 - 1356
Begegnung mit den Rittern Kuraus und Orphilet. Gemeinsamer Zug zur Burg des gestrengen Galagandreiz. Liebesnacht mit dessen brünstiger Tochter. Lanzelets Kampf mit Galagandreiz und dessen Tod. Durch die Heirat mit der Tochter Landesfürst.
- ________________________
- Dô er alsus gebezzert wart,
dô was im gâch an die vart.
mit urloub er enwec reit,
- 670
- als uns diu âventiure seit,
ûf eine strâze, diu was sleht:
diu wîst in in ein voreht,
der was vinster unde grôz.
den degen nihtes verdrôz
- 675
- wan daz er wunders niht envant.
ze âbent kom der wîgant
durch den walt wilde
an ein breit gevilde.
dâ gesach er vehten
- 680
- gelîch vil guoten knehten
zwên ritter vermezzen.
der namen wirt niht vergezzen.
der eine was genant sus,
mit dem küenen herzen Kurâus,
- 685
- der von Gâgunne reit
durch ruom und durch vermezzenheit.
der ander hiez Orphilet-
der-schoene, der ez wol tet
durch willen sînr âmîen.
- 690
- er was der massenîen
von britânischen-rîchen.
ir enwedere wolt entwîchen,
unz daz den wîganden
beleip vor den handen
- 695
- niht wan daz armgestelle.
der dritte hergeselle,
der dar zuo kom gedrabet,
der sprach "mich wundert, daz ir habet
gevohten sô ze ummâzen.
- 700
- ir sulent ez durch mich lâzen:
und sweder des niht enlât,
der ander mîne helfe hât."
zus redet er zuo in beiden;
des wurden si gescheiden.
- 705
- Si wâren vehtennes sat
und tâten daz, des er si bat,
wan es in beiden nôt geschach.
Orphilet-der-schoene sprach
"uns sîget balde zuo diu naht.
- 710
- daz ich sô vil noch hiute vaht,
daz riwet mich vil sêre.
ichn weiz tâlanc war ich kêre.
ditz ist ein ungeminnet lant."
des antwurt Kurâus zehant
- 715
- "zwâre hie ist herte
und ist ein ungeverte
ze den liuten von hinnen.
als ich mich versinnen,
so enist hie niendert spîse veile,
- 720
- wan daz uns ze einem unheile
ein burc hie nâhen stât.
dâ gæbe man uns allen rât,
wan daz der wirt hât sölhe site,
er vert dem man übele mite,
- 725
- missetuot er iender, daz ist wâr,
et alsô grôz als umb ein hâr.
daz ist ein engestlîchiu nôt.
sîn wîp ist nu lange tôt.
er hât der schoensten tohter ein,
- 730
- die diu sunne ie beschein.
durch der liebe bannet er diu tier.
er ist ein rîcher forehtier.
(ich sage iu daz ich von im weiz)
er heizet Galagandreiz,
- 735
- sîn burc ist Môreiz genant.
er hât vil manegen man geschant
durch harte lîhtsamiu dinc.
er ist der hoende ein ursprinc,
ein strenger urliuges man.
- 740
- swem ich ez widerrâten kan,
der ist im niht ze dicke bî,
swie schoene doch sîn tohter sî."
Dô sprach der junge volcdegen,
der in zuo kom ûf den wegen
- 745
- "iwer rede hân ich wol vernomen.
ez mac im harte wol gevromen,
swer daz beste gerne tuot.
ist dirre wirt alsô gemuot,
daz er durch sîn êre
- 750
- unzuht hazzet sêre,
waz ob er ouch den willen hât,
an swem er zuht sich verstât,
daz er des niht gert schenden.
durch daz wil ich genenden;
- 755
- daz ist wol mîn wille."
die zwêne vorhten stille,
daz er si bedæhte
und si ze rede bræhte.
durch daz lobeten ouch si daz,
- 760
- in stüende michels baz,
daz si den jungen êrten
und gegen der burc kêrten.
sus berieten sich die geste
und kêrten gein der veste.
- 765
- diu burc was michel unde hô.
got ergâben si sich dô,
daz er ir sælden wielte
vnd alsô si behielte
als ez sînen gnâden zæme
- 770
- und ez in rehte kæme.
ich wil iu wærlîche verpflegen,
des muotes wâren si bewegen,
daz si vertrüegen cleinen haz.
idoch gefuor ez michels baz;
- 775
- des muost si doch belangen.
si wurden wol enpfangen
und gegrüezet nâch ir rehte.
gein in liuf vil knehte:
di enpfiengen ros unde schilt.
- 780
- nu hâte der wirt gespilt
und was im wol gevallen.
daz was ein sælde in allen,
dâ von wart vroelich der gruoz,
in wart des êrsten klupfes buoz.
- 785
- der wirt hiez sich engesten.
dô sach man von in glesten
harnasch wîz als ein zin.
dô si daz getâten hin,
do enwas dâ nieman der des jæhe,
- 790
- daz er ie mêr gesæhe
drî ritter sô wol getân.
man sach si hübschlîchen stân,
wan sich iegelîcher zühte vleiz.
dô sprach Galagandreiz
- 795
- "swem ir die êre geruochet lân,
der sol an mîne hant gân:
ich wil iuch lâzen schouwen
mîn tohter und ir vrouwen.
do enwas dâ widerrede niet:
- 800
- den zwein ir tugent daz geriet,
daz si den jungen stiezen für.
der wirt fuort si zuo der tür
ûf ein hûs, dâ sîn tohter saz.
ez enwurden nie ritter baz
- 805
- gegrüezet noch minnenclîcher:
daz gebôt der wirt rîcher.
Der ie mit vrowen umbe gie,
des wirtes tohter in gevie
und satzt in an ir sîten.
- 810
- im enmoht in kurzen zîten
niemer baz gelingen.
von hübschlîchen dingen
und von minnen manicvalt
hât er der vrowen vor gezalt.
- 815
- mit swaz rede siun ane kam,
des antwurt er als ez zam,
ze ernst und ze schimpfe,
mit guotem gelimpfe.
ouch wâren sîne gesellen geil.
- 820
- der junge ritter het ein heil,
daz im lützel ieman was gehaz.
do er eine wîle alsus gesaz,
dô was daz ezzen bereit.
swaz man von wirtschefte seit
- 825
- und von manegen trahten,
daz enkunde nieman geahten,
waz in des alles wart gegeben.
si heten wünnenclîchez leben
unz daz si slâfen solten gân:
- 830
- dô muostens ein anderz an vân.
Nu wart in gebettet wol,
als man lieben gesten sol,
iegelîchem besunder.
der wirt gie dar under
- 835
- und hiez in schenken guoten wîn.
er leit diu wanküssîn
in allen mit sîn selbes hant.
er sprach "helde, sît gemant,
daz ir gezogenlîche liget.
- 840
- der got, der al der welte pfliget,
der behüet iuch wol mit sîner maht
und verlîh iu tâlanc guote naht."
ouch bâten si sîn got pflegen.
dô sprach der kindische degen
- 845
- "ez ensî daz wir wellen toben,
disen wirt den suln wir imer loben,
swaz er ouch anders ie begie."
mit der rede swigen sie.
Dô si alle ruowe wânden hân,
- 850
- dô kom diu vrowe dar gegân,
des wirtes tohter, stille.
nu was daz wol ir wille,
daz grôziu lieht dâ brunnen.
siu wolte gerne kunnen,
- 855
- waz sites die herren pflægen
und wi bescheidenlîch si lægen,
wan siu von starken minnen bran.
siu hete sich gemachet an
wol und hübschlîch genuoc.
- 860
- einen rîchen mantel siu truoc:
von sarumîne was sîn dach,
daz beste, daz man ie gesach
oder ie wart erkant
ze Morzî in heidenlant;
- 865
- der zobel und diu vedere guot.
diu vrowe diu gienc âne huot
durch daz siu kintlich wolte sîn.
siu truoc ein schappellikîn,
daz siu mit ir henden vlaht,
- 870
- von schoenen bluomen wol gemaht.
siu endorfte spæher niht sîn.
ir hemde daz was sîdîn:
dar in was siu geprîset,
als ich es bin bewîset.
- 875
- siu was ûf anders niht gedenet
wan als der sich nâch minnen senet
und dar nâch vil gedenket.
siu was der huote entwenket,
der alle vrowen sint gevê.
- 880
- diu minne tet ir alsô wê
und twanc si des mit ir gewalt,
daz siu muoste werden balt.
doch gienc siu niht aleine:
zwô juncvrowen reine,
- 885
- in zwein kursîten
von grüenen samîten,
die trâten vor in den sal.
zwei guldîniu kerzstal
truogen diu juncvröwelîn:
- 890
- (die kerzen gâben grôzen schîn:)
diu saztens zuo den stunden
zuo den liehten, diu si funden,
nâch der vrouwen gebote.
dô bevalch si sie gote:
- 895
- des nigen si ir mit zühten.
mit schoenen getühten
giengen si ze resten,
und beleip bî den gesten
des rîchen forehtieres barn.
- 900
- siu wolt ez gerne alsô bewarn,
daz ir ein wênic wurde baz.
für Orphileten siu gesaz,
wan er ir aller næhste lac.
ditz was ir rede, der siu pflac
- 905
- "herre got, gesegene,
wie swîgent dise degene
sô wunderlîchen schiere!
jâ solten helde ziere,
die durch diu lant alsus varnt
- 910
- und sich mit hübscheit bewarnt,
etwaz reden von den wîben
und die zît hin vertrîben
mit sprechenne den besten wol.
ich enweiz wem ich gelouben sol.
- 915
- mir ist dicke vil geseit
von Minnen und ir süezikeit:
diu sî bezzer danne guot,
man werde von ir wol gemuot.
si jehent, ditz sî ir wâfen,
- 920
- vil gedenken, lützel slâfen.
nu hân ich wol ir valsch bekort
und gedenke an mînes vater wort
"minne ist an sehendez leit,
ein bilde maneger irrekheit,
- 925
- ein unruoch aller slahte vromen,
ein vorder ungemuotes gomen.
den zagen ist siu ein swærer last.
des swachen herzen leider gast.
siu derrt die welt als ein slât,
- 930
- siu ist bloeder müezikheite rât.
minn ist ein sache grimmer nôt,
der triuwen ein vervälschet lôt."
sus redet mîn vater und wil dâ bî,
daz ich immer âne man sî.
- 935
- daz tæt ich, sammer mîn lîp,
wan daz ich gern als andriu wîp
wil leben, die ir sinne
an guoter manne minne
hânt verlân und den lebent,
- 940
- die in hôhgemüete gebent."
Dô siu diz allez gesprach,
Orphilet si an sach
und vrâget waz siu wolde.
ein vingerlîn von golde
- 945
- bôt siu im in allen gâhen.
des getorst er niht enpfâhen:
er vorhte spot, des vil geschicht.
"ich enhân dar ûf gedienet niht "
sprach er "daz ichs iht welle."
- 950
- "neinâ, trût geselle:
durch aller ritter êre
loese mich von sêre,
von huot die man an mir begât.
der rede mich grôz ernest hât.
- 955
- durch friuntschaft nim ditz vingerlîn
und dar nâch mich und al daz mîn,
swaz ich dir zuo gefüegen mac."
Orphilet dâ von erschrac
und dâhte, daz der alte
- 960
- untriuwe ûf in bezalte
in kampfes wîs: daz was sîn site.
"vrowe, tuont des ich iuch bite.
sît ich iwer rede hân vernomen,
ich wil schiere har komen.
- 965
- geruochet ir mich minnen,
ich füer iuch gerne hinnen
und enwil mich niht betrâgen,
ich entürre durch iuch wâgen
êre und lîp swie verre ich kan.
- 970
- nu enkêr ich mich ze nihte dran."
Dô sprach diu juncvrowe guot
"neinâ, ritter wol gemuot:
gedenke, daz de ie wære
hübsch und mære,
- 975
- biderbe unde wol gezogen,
schoener sinne umbetrogen.
schowe mînen schoenen lîp:
ich bin ein ritterlîchez wîp.
dar zuo ger ich einer bete,
- 980
- daz vrowe nie mê getete,
daz du dîne sinne
kêrest an mîne minne,
wan du sô rehte schoene bist.
ich red ez ân argen list:
- 985
- dar nâch als ichz gemerken kan,
so gesach ich nie keinen man,
durch den ein sældehaftez wîp
beidiu ir êre und ir lîp
gerner solte wâgen.
- 990
- allen mînen mâgen
gund ich sô wol guotes niht
sô dir, obe daz geschiht,
daz du mich ze disem mâle
loesest von der quâle,
- 995
- von der ich grôzen kumber dol.
geschach dir ie von wîbe wol,
so ensolt du, ritter, niht verzagen
noch dînen lîp mir versagen.
man vindet manegen wîgant,
- 1000
- der in unkundiu lant
durch schoene vrowen strîchet,
der keine mir gelîchet
weder an guot ald an getât.
helt, nim zuo dir selben rât,
- 1005
- küsse güetlîchen mich,
ich gedien ez immer umbe dich,
und tuo mir dînen willen kunt."
dô sprach Orphilet zestunt
"ich fürhte mîner êre.
- 1010
- gedenkt sîn nimmer mêre.
mîn triuwe ich wil behalden.
torst ich an iuch erbalden,
daz ich iwern vater niht verlür,
ein harnschar ich dar umbe erkür,
- 1015
- daz ich gevangen wær ein jâr."
diu vrowe sprach "daz ist wâr,
er gewan nie manlîchen muot,
der niht toerlîche tuot
etswenne durch diu wîp."
- 1020
- der helt sprach "samir mîn lîp,
ich enwil durch iuch ersterben niht."
mit zorne siu dô von im schiet
und mit riuwe beide:
son geschach ir nie sô leide,
- 1025
- noch enwas si niht minne vrî.
nu lac Kurâus dâ bî,
enzwischen den gesellen.
nu lânt iu wunder zellen.
diu vrowe hete den gedanc,
- 1030
- wan si diu minne sêre twanc,
daz siu warp umb sînen lîp,
daz nie kein man durch kein wîp
gepflac sô ernstlîcher bete.
"swelch ritter ie daz beste tete,
- 1035
- dern darf an eime wîbe niht verzagen.
ich wil dir wærlîche sagen,
daz ich rehte hân vernomen,
wie du bist vollekomen
an der manheite dîn.
- 1040
- tuo dîn ellen an mir schîn
und minne an mir ein schoene maget.
ist daz dir ein wîp behaget,
diu ir âmîes schônet,
sô wirt mir wol gelônet
- 1045
- von dir, als ichz gemerken kan.
mir verbôt mîn vater alle man,
ân mich wænt er niht genesen.
nu wil ich doch der volge entwesen.
ich wirbe ê selbe umb einen man,
- 1050
- der witze und êre pflegen kan,
dan ich des mannes bîte,
der gerne sam mir strîte.
dar zuo hân ich dich erkorn.
du bist stæte und wol geborn
- 1055
- und getarst wol alliu dinc bestân.
zwâre und triuget mich mîn wân,
so enwird ich nimmer manne holt."
dô sprach Kurâus "du solt
frumen rittern holt sîn.
- 1060
- wan daz ich êre den vater dîn
durch die triwe, di er an mir begie,
mir geschach sô liebe nie,
ob ich dich solte minnen.
doch wil ich ê gewinnen
- 1065
- von dir die missewende,
ê ich mîn heil geschende.
ich wil abe imer gote clagen,
daz ich an dir muoz verzagen.
dâ von lâz mich ûz dîner ahte."
- 1070
- der helt daz houbet dahte
und enpfie die rede für ein gamen.
des begunde sich diu vrowe schamen.
Dô der wünnenclîchen maget
alsus harte wart versaget,
- 1075
- daz tûhte si ein vremdez dinc.
indes lac der jungelinc
und dâht in sînem muote
"herre got der guote,
ist mir diu sælde beschert,
- 1080
- daz diu vrowe vollevert,
des muoz ich immer vreude hân."
zehant kom siu zuo gegân,
wande si diu minne twanc.
der junge ritter ûf spranc
- 1085
- unde sprach "vrowe mîn,
du solt willekomen sîn
dem rîchen got unde mir.
ich wil gerne dienen dir.
du endarft umb mich niht werben.
- 1090
- zehant wolt ich ersterben,
ê ich dich hinnen lieze.
swie ich es missenieze,
daz wil ich allez übersehen.
mir enmohte lieber niht geschehen;
- 1095
- daz muoz an dir werden schîn."
er leit si an den arm sîn
und kuste si wol tûsent stunt.
in wart diu beste minne kunt,
diu zwein gelieben ie geschach.
- 1100
- den gesellen was daz ungemach.
daz liez er allez ze einer hant.
der vrowewn er sich underwant
harte lieblîche.
si wâren vreuden rîche
- 1105
- und heten wünne die maht
und die aller besten naht,
die ie kein vrouwe gewan
mit deheim kindischen man.
doch enmoht er vergezzen nie,
- 1110
- daz siu ze jungest zuo im gie.
daz versweig er sie dâ,
siu engalt es aber anderswâ.
Dô dirre helt sô sanfte lac,
do erschein der underwunschte tac
- 1115
- und was diu süeze naht für.
dô stiez mit zorn an die tür
der wirt nôtveste.
des erclupften die geste,
wan er zwei scharpfiu mezzer truoc,
- 1120
- spizzic unde lanc genuoc,
und zwêne buggelære.
im was sîn herze swære.
diu mezzer beidenthalben sniten.
er sprach (daz wære baz vermiten)
- 1125
- "oder ich verliuse daz leben,
ich wil die morgengâbe geben,
der mir nieman danc seit:
daz ist trûren unde leit
und êweclîchiu riuwe,
- 1130
- wan ir iwer triuwe
und iwer êre hânt verlorn.
sît ich êrste wart geborn,
so erbôt ich ez nie manne baz
danne iu. waz half mich daz?
- 1135
- ez was dô wol mîn wille.
nu ligent alle stille,
als lieb iu allen sî der lîp,
und sagent mir, wes ist daz wîp,
mîn kint ein ungetriwer warc?"
- 1140
- diu juncfrowe sich verbarc
under ir friunt den jungen degen
und wolte dâ sîn tôt gelegen.
Des nam der vater war.
er lief îlende dar
- 1145
- und drôt in harte sêre
"swer mir nimpt mîn êre,
der geniuzet es borvil.
ein spil ich iu teilen wil.
nement disen schirm an iwer hant
- 1150
- und belîbent hie bî dirre want,
sô wil ich anderhalp gân
und wil iu die wal lân.
ich nim daz iwer und ir daz mîn.
unser einer muoz der erre sîn.
- 1155
- swer dâ triffet, dêst gewin:
der ander treit den schaden hin."
Der junge lobete den rât.
"sît mir daz ze wer stât,
sô dunket mich daz billich,
- 1160
- daz ir werfent ê dan ich,
leider spilgeselle.
got gebe iu ungevelle.
ob got wil, ir vermissent mîn."
dô trôst er sich der künste sîn
- 1165
- und nam des swehers guote war.
sînen schirm den bôt er allez dar.
si spilten noetlîch âne bret.
Kurâus und Orphilet,
die wæren wundergerne dan.
- 1170
- der wirt huob daz spil an
und warf den jungen wîgant
durch den ermel in die want
mit starker volleiste.
ein wênic er sîn vleiste,
- 1175
- daz er daz bluot rêrte.
do gedâhte der gesêrte,
wie er sich schaden möht erholn.
er lie daz werfen und daz boln
und lief hin an den schalch.
- 1180
- mit dem mezzer erm bevalch
einen vreislîchen stich,
daz er viel ûf den esterich
unde nie kein wort ersprach.
dô litens êrst ungemach
- 1185
- in der kemenâten.
die tür si zuo tâten.
die recken ellende
wunden ir hende,
daz si âne swert muosten sîn.
- 1190
- aber des ritters friundîn,
diu gab in harte guoten trôst,
daz si wol wurden erlôst.
Siu gie hin ûz durch ir bete,
die tür siu nâch ir zuo tete
- 1195
- und besant der tiursten ein teil,
an den siu helfe unde heil
aller wætlîchest vant.
siu sprach "helde, sint gemant,
daz ich ie die ritter êrte
- 1200
- und daz beste zuo in kêrte,
und stânt mir friuntlîchen bî.
ich wæn, mîn vater tôt sî,
der ie grimmekheite wielt
und iuch unrehte hielt.
- 1205
- nu hân ich einen jungen man,
den tiursten, den ie wîp gewan.
den erkôs mîn vater ze eime zagen
und wolt in hân ze tôde erslagen,
als er vil manegen hât getân.
- 1210
- do enmoht ez langer niht gestân,
der ritter werte sich durch nôt.
sît mîn vater nu ist tôt,
sô ist daz erbe an mich komen.
ich schaffe gerne sînen vromen,
- 1215
- swer mir triuwe erscheinet
und mich von herzen meinet."
Dô sprach der ritter ein zehant
"sagent, wer ist der wîgant?
ist ez der nehten bî iu saz,
- 1220
- so geschach nie keiner vrowen baz.
er ist sô sæleclîch getân,
mich entriege mîn wân,
so enwart nie tiurer man geborn.
sît wir den herren hân verlorn,
- 1225
- sô handeln ez mit witzen:
er endarf uns niht entsitzen,
weder durch slahen noch durch vâhen."
die anderen alle jâhen
"wir suln tuon swaz mîn vrowe wil,
- 1230
- beidiu ze ernst und ze spil."
sus wart diu suone in ein getragen.
man hôrt den wirt lüzel clagen,
als ez dicke noch ergât:
swâ man sich der milte enstât,
- 1235
- da verclaget man wol des argen schaden.
die recken wurden ouch entladen
unmuotes des ir herze wielt.
diu vrowe si vil wol behielt
sô siu aller beste kunde.
- 1240
- dar nâch in kurzer stunde
kom der welt ein michel magen.
in vil unlangen tagen
do begruob man in als ez gezam.
diu vrowe den jungen ritter nam
- 1245
- und enpfalh im gar in sîne hant
beidiu liut unde lant.
sus erbet er, dô er genas,
daz ê des forehtieres was.
Dô was vil milte der wirt,
- 1250
- als den daz guot lützel swirt.
daz der sweher besparte '
rîlîch erz zezarte,
wan erz mit manheit gewan.
dô schuof er sîn ambetman
- 1255
- nâch wîser liute lêre.
er enwarp niht wan umb êre,
als ein hübsch ritter kan.
Orphilet der küene man,
dô der ersach sîne site,
- 1260
- daz er in fuor sô sanfte mite
und er doch nieman liez enstân,
wie sîn geverte was getân,
durch daz lobet er im zehant
des küneges Artûses lant
- 1265
- und Karidôl die mæren.
er saget im, daz dâ wæren
der besten ritter diu kraft,
"die mit ir ritterschaft
erwerbent lop unde prîs.
- 1270
- der künic selbe ist sô wîs,
daz erz wol erbieten kan
eim iegelîchen man
nâch sîner werdikheit.
swer ie durch manheit ûz gereit,
- 1275
- der sol mîns herren hof sehen.
ich wil iu wærlîche jehen,
diu künigîn ist sô gemuot,
daz siu gerner zwei guot
tuot dan eine karkheit.
- 1280
- dâ sint ouch ander vrowen gemeit,
der tugent ist sô reine,
und wær ir niht wan eine
in eime künicrîche,
dâ solten billîche
- 1285
- alle ritter hübsch sîn.
di gesehent, dêst der rât mîn."
Dô sprach der ungenande
"ez wære ein michel schande,
daz ich flüge ungeveder.
- 1290
- ich wil es eintweder
schaden vâhen oder vromen,
ê ich immer welle komen
zuo sölher zoumhefte
und zuo der geselleschefte.
- 1295
- waz solt ich in ze rede geben,
die mit nîtspil ir leben
gehoehert hânt vil sêre?
ez wær ein unêre,
ob ich mich anders werte.
- 1300
- got erlâze mich der verte:
ich wil gerne wesen alsus."
dô bat in aber Kurâus
gegen Gahgunne kêren.
des enwolt er in niht gêren,
- 1305
- daz er mit im füere.
sîn gesinde wol allez swüere,
daz er dâ belibe stæte
mit der vrowen, diu in hæte
ze alsô grôzen êren brâht.
- 1310
- des was im doch vil ungedâht.
Nu enwolten sîne gesellen
mit im niht lenger twellen,
die zwêne wîgande:
si wolten heim ze lande.
- 1315
- dô ez gienc an ein scheiden,
dô gebet er in beiden
swaz si sîner habe geruochten.
die recken wol besuochten,
daz er guoten willen truoc.
- 1320
- lobennes tâtens im genuoc
von siten und von manheit.
ze Karidôl wart ouch geseit,
daz Orphilet dô kæme.
daz was in vil genæme,
- 1325
- wan er lange was gesîn.
nu vrâgt in al diu menegîn
von wunder und von mære,
wâ er sô lange wære.
er sprach "daz kan ich wol gesagen.
- 1330
- ich was in unlangen tagen
dâ man mir bôt guot gemach
und ich den tiursten degen sach,
den ie getruoc dehein wîp.
sîn sældehafter lîp
- 1335
- ist blôz vor âküste.
er ist nâch mîner küste
ein der vorderste man,
des ich ie künde gewan.
im vert vil sælekheite mite.
- 1340
- sô ist daz ein hübscher site,
er enweiz niht waz trûren ist.
bî im ist guot mitewist.
swer daz sæhe, daz ich sach,
wie er die âventiure brach
- 1345
- ze Môreiz ûf der veste,
der spræch im wol daz beste.
man möht in gerne erkennen:
ern wil sich nieman nennen,
swaz man redet oder tuot."
- 1350
- Orphilet der helt guot
saget von êrst unz an daz zil
von sîner manheite vil
und von sîner sigenünfte.
dô wunschte sîner künfte
- 1355
- Artûs der schanden vrîe
und al diu massenîe.
|