Sprüche

___________________________________________________

14.

Cod. Pal. germ. 848, 419v

Universitätsbibliothek Heidelberg

Ob allen vrouwen vrouwe reine, gebende nar,

gekroent mit hoher wirde ob al der engel schar,

du werde Gotes tohter unt Kristes amme;

din lip mit manigen richen tugenden ist geberlt,

5

du überschoenst die himel gar unt hie die werlt,

din herze enzündet hat des hohsten vlamme.

du wiser Salomones tron,

und ouch vür war Ezechieles pforte,

du reinez vel, daz Gedeon

10

mit kiusche hielt, ein warin toufes porte,

du tempel der drivaltekeit,

du Gotes sezzel, unt Gotes kindes klose,

din lip der truoc den, der nu da treit

den himel, erde, ouch saget uns diu glose,

15

den alle himel niht bevahen kunden manikvaltik,

den vienc din schoz,

dur unser heil,

vrouwe ane meil:

nu bit' vür uns den selben Got, sit du bist sin gewaltik.