BIBLIOTHECA AUGUSTANA

 

Konrad von Würzburg

um 1225 - 1287

 

Der Trojanerkrieg

 

Das Ende der Hochzeit

Streit um Paris. Kampf zwischen Hektor

und Peleus. Prophezeiungen des Proteus.

 

2863 - 4616

 

__________________________________________________________________________________

 

 

 

Si wart von dem cleinœte geil,

wan si dûhte ein rîchez heil,

daz ir der apfel worden was.

vrô Jûnô und vrô Pallas

2815

die wurden beide an vröuden tôt.

beswæret unde schamerôt

sprâchen si Pârîse zuo:

daz dich Unsælde trûric tuo!

wie kanst dû kriege scheiden.

2820

dû möchtest wol uns beiden

ein wênic rehter hân getân.

wer solte rîche sache lân

an hirten ûz dem walde?

ganc zuo dem vihe balde,

2825

von dem dû bist geloufen her!

uns möhte wol her Jûpiter

anders hân verslihtet.

nû wol, dû hâst gerihtet

dir selber z'ungewinne.

2830

den lôn, der von der minne

dir werde, tumber jungelinc,

den iz ûf erden unde trinc

und lebe kumberlichen!

dû bist dâ her gestrichen

2835

wîstuomes unde guotes bar,

nû kêre ouch wider unde var

sunder witze und âne hort.

dû bist ein gouch gewesen dort

und ein amrez hirtelîn,

2840

diu beidiu muost ouch iemer sîn,

die wîle dû geleben kanst.

sît dû der minne lobes ganst

und ir erfüllet hâst ir gir,

sô warte ouch, wie si lône dir

2845

unde diene ir ûf ir solt.

kunst oder silber unde golt

wæren diu niht alsô guot,

sô minne bî der armuot

und âne wîse lêre?

2850

jâ minne swachet sêre,

swâ man niht schœner witze hât.

liep âne guoten lîprât

daz leidet ouch vil gerne.

ganc wider unde lerne

2855

daz vihe dîn verslihten!

dû kanst die liute rihten

vil anders, denne in wol gezeme.

daz im got al sîn êre neme,

der Pârîs dich geheizen habe!

2860

tuo dich des hôhen namen abe,

wan er ist dir ein teil ze rîch,

dîn reht ist allez ungelîch.

 

Die rede triben dise zwô

mit Pârîse in zorne dô,

2865

wan si wâren im gehaz;

doch wac er harte ringe daz

und ahte drûf vil cleine,

wan alle die gemeine,

die dâ sâzen umb den rinc,

2870

die sprâchen, daz der jüngelinc

und der knappe stæte

den strît gescheiden hæte

ân alle missewende:

der criec der nam ein ende

2875

mit diesen dingen und alsus.

der minne frouwe, Vênus,

wart der sigenüfte vrô,

sô was diu frouwe Jûnô

vil trûric unde Pallas,

2880

dar umbe daz in beiden was

lop unde prîs enphlœhet.

Pârîs der wart erhœhet

ze hove und in dem lande.

sîn êre maniger hande

2885

wart durch sîn gerihte sleht.

in allen den geviel sîn reht

nâch wunsche, wan eht disen zwein,

die wâgen dô sîn jâ vür nein

und truogen im ir vîentschaft.

2890

Vênus diu gie dô sigehaft

ab dem gestüele rîch erkant.

Pârîsen nam si bî der hant

und fuorte in balde in ir gezelt.

si wolte im rîches lônes gelt

2895

ze solde bieten unde geben.

ein cleit von sîden wol geweben,

daz ein wildiu feine span,

daz tet si dem juncherren an:

dâ von wart sîn gemüete vrô.

2900

Pârîs, lâ sehen, sprach si dô,

wie diz gewant ze hove tüge.

ich sol versuochen, ob ich müge

ûz armekeite dich geschüten.

ê Pallas unde Jûne büten

2905

dir mit worten smâheit,

dur daz dû trüegest armiu cleit,

ê gæb ich dir sô rîche wât,

daz nieman hie ze hove hât

sô rehte keiserlich gewant.

2910

hie mite leite dô zehant

der jungelinc diu cleider an.

ein schapel, daz von golde bran

und von gesteine lieht gemâl,

daz wart im ûf dâ sunder twâl

2915

gesetzet von ir hende wîz.

si leite ûf in gar hôhen vlîz

und einen günstebæren sin.

sus wart von ir der knappe hin

zuo dem gestüele wider brâht.

2920

in hete ir helfe wol bedâht

und ir genâden stiure.

 

Frau Venus führt Paris am Hofe ein

 

wan ez enwart sô tiure

cleit von henden nie genât,

sô disiu kostbærlîchiu wât,

2925

die Pârîs des mâles truoc;

si was dar zuo vil gar ze cluoc,

daz si trüege ein irdisch man,

si möhte ein glanzer engel an

mit grôzen êren hân geliten.

2930

si was geteilet und gesniten

z'ein ander von zwein tuochen rîch,

diu beidiu wâren ungelîch,

an schîne und an der varwe.

daz halbe teil was garwe

2935

der aller beste cyclât,

der ie gezierte künges wât

oder keiserlich gewant:

als ob ez allez wære enbrant,

seht, alsô gleiz dar ûz daz golt,

2940

daz getragen und geholt

was in des halben teiles velt.

ûf ez was hôher koste gelt

geleit durch vrîen übermuot.

daz ander teil der wæte guot

2945

was ein purper vîolvar

mit hovelichem vlîze gar

nebent den cyclât gesniten.

dâ wâren strîfen în gebriten

ûz grüener sîden vingers breit,

2950

die wol besetzet und beleit

mit margarîten wâren

und mit ir schîne bâren

den ougen wunneclich gemach.

man spürte, wezgot, unde sach

2955

ûf den strîfen steine gnuoc,

die kein gebirge nie getruoc,

noch diu erde brâhte für.

si wâren nâch des herzen kür

ûz tiefer sinne grunde

2960

erwünschet mit dem munde

und alsô rehte vîn erdâht.

diu cleider wâren vollebrâht

rîlichen unde schône gnuoc.

roc unde suggenîe truoc

2965

Pârîs der küniclichen wât,

diu niht z' ein ander doch genât

was mit vademen sîdîn.

dâ die næte solten sîn,

dâ wâren cleiniu vürspan

2970

ûz golde wunneclichen an

geheftet und gespenget.

daz cleit an in getwenget

stuont oberthalp den gêren

und was nâch vollen êren

2975

niderthalben alsô wît,

daz er sich möhte bî der zît

dar inne wol verwalten.

man sach dâ vremder valten

ein wunder umb in swenken.

2980

diu wât zuo den gelenken

stuont wol nâch im geschræmet.

bestellet und gebræmet

mit schînâte was daz cleit,

den man ûz einer hiute sneit,

2985

die truoc ein visch von wilder art.

kein ouge nie sô lûter wart,

daz sînen glanz erkande;

sô rehte maniger hande

varwe ûz im gleiz unde bran,

2990

daz iegelichez hâr dar an

het einen sunderlichen schîn.

swie nû niht wan sehs varwe sîn,

sô gleiz iedoch vil mangiu dâ,

diu niemer hie, noch anderswâ

2995

bî keinen jâren wirt erkant.

daz selbe kleit und diz gewant

was z'einer wæte ein wunder.

ein fülle was dar under

gar edel von geslehte.

3000

geworht schâchzabelehte

was si mit hôhem vlîze wol.

von zobele swarz alsam ein kol

und ûz hermîne snêgevar.

diu veder ûz dem tuoche bar

3005

ir blanken und ir brûnen glast.

diu cleider und der werde gast

diu stuonden wol ein ander an:

daz cleit daz êrte wol den man

und êrte wol der man daz cleit.

3010

si wâren beide als ûf geleit,

daz si z'ein ander hôrten wol.

daz cleit daz was gezierde vol,

sô was der man schœn unde clâr.

im was ûf sîn gel reidez hâr

3015

geleit ein edel schapelîn.

dâ wâren glanze gimmen în

gewürket und gevelzet

und was diu schine gesmelzet

von golde unmâzen reine,

3020

dar inne daz gesteine

lac durch liehtebæren solt.

sîn hâr als ein gespunnen golt

schein ûz dem schapelîne guot.

reht als ein milch und als ein bluot

3025

wol under ein geflozzen

was im ein lîch gegozzen

under sîn antlitze gar.

er truoc zwei wangen rôsenvar

und eines valken ougen.

3030

dâ stuonden âne lougen

zwô smale brûne brâwen obe;

stirn unde nase wol ze lobe

wâren im dâ bî gestalt.

der Wunsch der hete mit gewalt

3035

geschephet die figûre sîn.

durchliuhtic rôt als ein rubîn

was im der munt, des hœr ich jehen,

dar ûz man glenzen und enbrehen

wîz unde blanke zene sach.

3040

ein zunge ûz sînem munde sprach,

dâ lac versigelt inne

diu süezekeit der minne,

wan swer in reden hôrte,

dem brach er unde stôrte

3045

daz trûren, daz sîn herze leit.

im hiengen sîne löcke reit

gewunden ûf sîn ahselbein,

durchliuhtic wîz sîn kele schein

und spien dâ vor ein fürspan,

3050

dâ was ein trôn erhaben an,

der hete cleiner bilde driu.

diu aller beste gâmahiu

was daz selbe spengelîn.

diu Minne was entworfen drîn

3055

ûf ein gestüele hôhe enbor

zwei bilde knieten in dâ vor

reht als ein wîp und als ein man,

diu beide crônte si dar an

mit ir handen wunnevar

3060

sus kam Pârîs gezieret dar

gegangen in des plânes rinc.

der ûz erwelte jungelinc

gie mit hovelicher state.

ûfreht alsam ein sumerlate

3065

was sîn lîp ze mâzen lanc.

er hete keiserlichen ganc

und einen küniclichen site.

er gie mit schœner zühte mite

der minne meisterinne,

3070

diu sînes herzen sinne

gebunden hete mit ir kraft.

die vrouwen und diu ritterschaft

die kapften in ze wunder an.

si sprâchen alle: ist daz der man,

3075

der niuwelîche von uns gie?

dur got, wer hât in denne hie

so rehte wol gegestet?

seht, wie sîn bilde glestet

und allez, daz er an im treit

3080

nû schînet wol, daz rîchiu cleit

den man rîlîche stellent

und arme liute wellent

nâch fürsten figûrieren.

er kunde in wol gezieren,

3085

swer in alsus gecleidet hât!

ez wart nie küniclicher wât,

noch keiserlicher man gesehen.

swer iemer des getürre jehen,

er künne vihes hüeten,

3090

der müeze sich erwüeten

und iuwer êweclîche ertoben.

man sol in prîsen unde loben

vür alle man besunder.

uns darf niht nemen wunder,

3095

daz er sô rehte rihtet,

sît daz der Wunsch getihtet

als ûzgenomenlichen hât

sîn leben unde sîne wât.

 

Die rede tribens' under in.

3100

nû daz Pârîs gegangen hin

vür daz gestüele wider kam

und man ze rehte war genam

des bildes und der cleider sîn,

dô wart im lop und êre schîn,

3105

der manger im bôt unde maz.

der ê vil schœne stille saz,

der stuont im ûf engegen dô.

si wâren des gelîche vrô,

daz er nâch wunsche was becleit.

3110

von sîner hôhen sælikeit

huop sich dâ michel rûne.

vrô Pallas und vrô Jûne

die beide vil gemeine

erbunden im aleine

3115

mit herzen und mit sinne,

daz Vênus, diu götinne,

het ûf in hôhen vlîz gewant.

si sprâchen wider si zehant:

wâ nû, gespil, vrô Vênus,

3120

wer hât gelêret iuch alsus

ûz hirten künige bilden?

ir hânt ûz einem wilden

gebûre wunder hie gemaht.

diz cleit enwær im niht geslaht,

3125

ob irs gelouben woltent.

niht êren ir den soltent

ze hôhe und alze sêre,

dem weder guot, noch êre

gemæze ist von gebürte.

3130

der rede gap antwürte

Vênus mit zorne in beiden.

si sprach: lânt iu niht leiden

den jungelinc, den ir hie sehent.

swie vaste ir beide von im jehent,

3135

daz er ein armer hirte sî,

sô ist er doch von adele vrî

und eines hôhen künges fruht.

niht brechent an im iuwer zuht

mit rede und iuwer bescheidenheit!

3140

sîn vater eine crône treit

mit êren über manic lant.

Pârîse dem ist rîch gewant

gemæze wol von rehte;

wan er ist an geslehte

3145

und an edelkeite rîch.

ouch ist er selbe dem gelîch,

daz er ein herre sîn von art.

sô tumber nie kein tôre wart,

sîn ouge daz enspürte,

3150

daz Pârîs von gebürte

ein hôher fürste möhte sîn.

ez wirt an sîner zühte schîn

und an sînem bilde wol,

daz man im êre bieten sol

3155

mit werken und mit worten.

der Wunsch in allen orten

hât in gemachet wandels vrî.

swie lange er bî dem vihe sî

gewesen in dem walde,

3160

doch hât er sich hie balde

gestellet nâch dem hovesite.

im wont rîlîchiu tugent mite

und ist sô reine sîn gebâr,

als er vertriben sîniu jâr

3165

habe in eines küniges sal.

lânt von im iuwer snœde zal,

vrô Pallas und vrô Jûne!

kein rede, noch kein rûne,

die man im ze leide tuot,

3170

mac gescheiden mînen muot

von ime, die wîle daz ich lebe.

er muoz von mîner hôhen gebe

wîsheit erwerben unde schaz.

waz schadet im der widersaz,

3175

den er von iu beiden hât,

swenn im diu helfe mîn gestât

mit vlîzeclicher andâht!

ich hab in dar zuo schiere brâht,

daz sîn armuot ist worden cranc

3180

und er ân iuwer zweiger danc

muoz den hort besitzen

von rîchtuom und von witzen.

 

Mit disen worten und alsô

wart Pallas unde Jûnô

3185

gestillet und gesweiget.

genidert und geneiget

was ir hôchgemüete gar.

Pârîs wart von der göte schar

geprîset und gehêret.

3190

sîn lop daz wart gemêret

über al des hoves rinc.

seht, sprâchen si, der jungelinc

der wirt ein wunder z'einem man.

hier under sach in allez an

3195

sîn vater, künic Prîamus.

daz in diu vrouwe Vênus

sô vil gerüemet hæte,

dâ von was im der stæte

mit herzeclichen triuwen holt.

3200

gereinet als ein lûter golt

wart sîn gemüete wider in.

sîn herze truoc in allez hin,

dâ der hôchgeborne saz.

in lêrte diu natûre daz

3205

und der sippeschefte reht,

daz im der junge süeze kneht

wart übermæzeclichen trût.

swie Prîamus niht über lût

erkande, daz er was sîn kint,

3210

doch truoc er im ân underbint

gar inneclîche friuntschaft,

wan sippebluot daz hât die kraft,

daz ez vil kûme sich verhilt.

ez lachet mâgen unde spilt

3215

engegen durch der ougen türe

und machet iemer sich her füre,

swâ friunt gesitzet friunde bî.

swie tiefe ez dâ verborgen sî,

ez wirt ze liehte schiere brâht:

3220

dâ von der künic was verdâht

ûf Pârîsen deste mê.

ez was sîn sun von rehter ê,

des truoc in diu natûre dar

ûf den juncherren wunnevar

3225

und spilt im allez tougen

engegen durch diu ougen.

 

Im seite sîn gemüete,

daz an in beiden blüete

der wâren sippeschefte fruht.

3230

des bôt er im êr unde zuht

mit rede und mit gebâre.

dô Vênus, diu vil clâre,

verjach von im der wünne,

daz er von adels künne

3235

wære und eines künges barn,

dô wolte er ahten unde warn

des jungelinges deste baz.

sîn herze sîn dô nie vergaz,

noch kam von im sîn ouge niht.

3240

mit vlîzeclicher angesiht

begund er kapfen dar ûf in

und kêrte muot, herz unde sin

dar ûf in manger hande wîs,

daz der getriuwe Pârîs

3245

sîn ingesinde würde.

in dûhte ein swære bürde,

ob er sîn âne solte sîn.

er wart in sînes herzen schrîn

alsô besigelt und begraben,

3250

daz er in gerne wolte haben

in sînes hoves palas.

dur daz er alsô zühtic was

und alsô rehte wunneclich,

sô vleiz er des vil harte sich,

3255

daz er in dannen bræhte.

man seit, daz er gedæhte

vil dicke in sînem muote,

wie der vil hübsche guote

sîn ingesinde würde alsus.

3260

nû sach er, daz vrô Vênus

was gewaltic über in

und daz er leben unde sin

an ir genâde ergeben hete.

dâ von der künic dô mit bete

3265

kam die minneclichen an.

er sprach als ein bescheiden man

mit zühten wider si zehant:

genâde, vrouwe, sint gemant,

daz an iu wirde und êre lît

3270

und helfent mir bî dirre zît,

daz Pârîs mit mir hinnen var

und er in mîner hoveschar

der beste heizen müeze.

ich meine, daz der süeze

3275

mîn ingesinde werde

und ich in ûf der erde

bringe ûf wirde manicvalt.

sît ir sîn, frouwe, hânt gewalt

und er vollendet iuwer ger,

3280

sô gebietent im, daz er

mit mir ze hûse kêre.

ich wil im guot und êre

zuo schîben, al die wîle ich lebe.

ist, daz mir an im iuwer gebe

3285

daz heil und daz gelücke birt,

daz er mîn ingesinde wirt,

ich schaffe, sælic vrouwe mîn,

daz mir der werde vater sîn

der êren danket und der tugent,

3290

die mîn genâde an sîner jugent

erzeiget und bewæret.

ir hânt hie goffenbæret,

daz er von adele sî geborn

und daz sîn vater ûz erkorn

3295

trag eines rîches crône:

des lâzent mich in schône

enthalten und als im gezeme,

biz der juncherre wol verneme,

wer sîn hôher vater sî.

3300

er ist sîn ledic unde vrî

vil lîhte worden von geschiht,

noch weiz von sînem adele niht.

dâ von sô dunket mich daz guot,

daz der knappe hôchgemuot

3305

sam mir ze hûse rîte

und er dô schône bîte

des heiles und der lieben stunt,

daz ime sîn vater würde kunt.

 

Sus warp der künic Prîamus,

3310

daz im Pârîsen Vênus

ze stætem ingesinde lihe.

daz si niht wider zuo dem vihe

in lieze kêren in den walt,

des wart dô von dem künige balt

3315

gar vlîzeclîche an si gegert.

ouch hætes' in der bete gewert

gern unde willleclichen dô,

wan daz dar umbe Jûnô

beswæret in ir muote was.

3320

ouch streit derwider Pallas

mit herzen und mit sinne.

der minne küniginne

was ir zweiger lîp gehaz,

dâ von si beide muote daz

3325

und was in ûzer mâzen leit,

daz man ir bôt die wirdekeit,

daz man si des juncherren bat

und ir ein künic an der stat

vlêhen umb in solte.

3330

ir beider lîp niht wolte

lân geschehen ir den prîs,

daz der vil hübsche Pârîs

kêrte dan von ir gebote.

dâ von sô rieten si dem gote,

3335

der Jûpiter dô was genant,

daz er den knappen alzehant

niht von im scheiden lieze

und er in selbe hieze

sîn stætez ingesinde sîn.

3340

diz tâten si der künigîn

ze smâheit, diu der minne pflac.

ir beider muot sich dar ûf wac,

daz der gast belibe alsus

und der künic Prîamus

3345

der Minne müeste sîn gehaz,

durch daz si niht geschüefe daz,

daz Pârîs mit im kêrte,

noch in des niht enêrte,

daz der vil tugentbære

3350

sîn ingesinde wære.

 

Seht, alsô kômen dise zwô

des über ein vil schiere dô,

daz si den wirt besunder hin

dô fuorten und ouch wider in

3355

sprâchen mit gelîcher ger:

herr unde got, her Jûpiter,

lânt ir geschehen disiu dinc,

daz dirre stolze jungelinc

mit Prîamô von hinnen vert,

3360

ir sint an êren gar verhert,

wand ez iu wirt ein schande,

ob ir von disem lande

lânt füeren alsô wîsen knaben

und ir in selben niht behaben

3365

getürrent noch enwellent.

ir veigent unde vellent

iuwer lop in alle wîs,

gestatent ir, daz Pârîs

belîbet hie ze hove niht.

3370

ez wære ein wunneclich geschiht

und ein schemelicher spot,

daz ein künic einen got

an êren überkæme

und im den gast benæme,

3375

der blüemen solte sînen sal.

ir hânt doch rîcheit âne zal

und überhœhent elliu dinc,

wie liezen ir den jungelinc

alsus von hinnen kêren,

3380

der iuch wol möhte gêren

und iuwer hûs gezieren.

den hof mac er flôrieren,

sam rôsen tuont ein ouwe.

Vênus, der minne frouwe,

3385

mit willen iuch hie swachete,

sît si daz gerne machete,

daz Pârîsen Prîamus

füerte gegen Troye alsus

und iu den prîs benæme,

3390

daz er von hinnen kæme.

 

Nu enwelle got, sprach Jûpiter

daz iemean sî dar umbe her

zuo mîner hôchgezît bekomen,

daz Pârîs werde mir benomen;

3395

wan ich wil den süezen knaben

z'eim ingesinde selbe haben,

sît er von adel ist geborn.

ez sol der künic âne zorn

lân belîben, daz er sî

3400

mir unde mînem lande bî,

wan ich enwil sîn niht enbern.

er sol mich vröuden hie gewern

mit der hôchgebornen jugent.

geloubent, daz sîn reiniu tugent

3405

wirt den von Troye wilde.

mîn hof mit sînem bilde

sol werden wunneclîche erlûht.

mich hât des wol an im bedûht,

daz nie sô glanzer jungelinc

3410

kæm in dekeines landes rinc:

dâ von muoz er belîben hie.

mit disen worten er dô gie

zuo dem juncherren wol getân.

Pâris, sprach er, ich wil dich hân

3415

z'eim ingesinde stæte;

dâ von er übel tæte,

swer dich enphlœhen wolte mir.

mîn hof geblüemet sol mit dir

nâch vollem wunsche werden.

3420

sît daz dû wilt ûf erden

ein wunder sîn ze manne,

war umbe liez ich danne

kêren dich von mir alsus?

nein herre, sprach dô Prîamus,

3425

die rede lânt belîben.

ê liez ich mich vertrîben

von êren und von guote,

ê mir der vil gemuote

Pârîs niht würde in mîne pflege.

3430

ich wil in haben alle wege

von sîner frouwen stiure.

Vênus, diu vil gehiure,

diu sîn gewaltic worden ist,

diu sol ir zuht bî dirre vrist

3435

an mir bewæren und ir tugent.

sît über sîne clâre jugent

stêt ir gewalt breit unde wît,

sô lâze in von der hôchgezît

mit mir ze lande kêren.

3440

nâch küniclichen êren

sol ich dâ schicken sîniu dinc,

wan mir geviel kein jungelinc

sô wol in mînem muote nie.

dêswâr, sô wær ich übel hie,

3445

sprach aber dô her Jûpiter,

swenn ir von Troye füerent her

und mir hie næment einen gast,

ûf den ich mîner fröuden last

mit hôhem vlîze hân geleit.

3450

it sult durch iuwer hübescheit

Pârîsen lân in mîner pfliht.

entriuwen, daz entuon ich niht!

sprach der künic wider in.

den jungelinc den füer ich hin,

3455

ob mir sîn gan diu frouwe sîn.

er muoz in dem gewalte mîn

frœlîche sîne tage verzern.

wer mir den gast getürre wern,

daz wirt versuochet âne spot.

3460

daz tuon ich, sprach der werde got

und der hôchgezîte wirt,

ir müezent werden hie verirt

des jungelinges hiute.

wâ sint nû mîne liute

3465

und al mîn hôhez künne!

swer mir der êren günne,

daz ich behalte mînen prîs,

der helfe mir, daz Pârîs

ûf mînes lobes ungewin

3470

niht werde alsus gefüeret hin!

 

Streit um Paris

 

Nû disiu rede alsus geschach,

daz her Jûpiter gesprach

diu wort ûz sînem munde,

dô wart in kurzer stunde

3475

bereit sîn ingesinde gar.

gewâpent sêre und îsenvar

wart geste vil durch sîn gebot.

swer dâ geheizen was ein got,

der kam ze helfe im alzehant.

3480

ouch hete Prîamus gemant

vil schiere sîne ritterschaft.

swaz hôher künige dô mit kraft

zuo der hôchgezîte was,

die nam er an sich unde las

3485

und wart bereit ze strîte.

sich hete bî der zîte

zehant ein grôz gestœze erhaben

umb den vil wunneclichen knaben,

wan daz her Mars enzwischen reit,

3490

dem was diu grôz unfuoge leit,

diu sich dâ heben wolte.

die hôchgezît er solte

vor unzühten wol bewarn;

des reit er dô mit sînen scharn

3495

gewâpent sêre unz ûf die zene

und wolte dâ dis und jene

mit liebe hân verslihtet.

dô was ir muot gerihtet

ze vaste ûf grimmeclichen zorn.

3500

umb den juncherren hôchgeborn

huoben si dô krieges vuoc.

Discordiâ niht wolte gnuoc

mit der vîentschefte hân,

die si geworfen und getân

3505

het under die gotinne,

si wolte ouch grôz unminne

sæjen underz ander her,

dâ von si beidenthalp ze we

schier unde balde kâmen.

3510

der missehelle sâmen

wolten si dâ snîden.

man sach von glanzer sîden

dâ glesten manic wâpencleit,

dar în mit golde was geleit

3515

vil manic wunderlicher stein.

nû daz die schar sich under ein

ze beiden sîten wolten weben

und in der wille wart gegeben,

daz si gesprancten ûf den rinc,

3520

dô rief Hector, der jungelinc,

ze sînem vater Prîamô:

niht gâhent, herre mîn, alsô!

lânt iu niht sîn ze strîte nôt!

ê daz den bitterlichen tôt

3525

hie manic ritter kiese

und âne schult verliese

daz leben, er enwizze wie,

sô wil ich ê selb ander hie

für beide parte strîten.

3530

ob ich bî disen zîten

vind einen kampfgeverten,

sô muoz man hie beherten,

wer Pârîsen füere hin.

man lâze beidiu mich und in

3535

hie vehten für iuch alle.

und swer dar under valle,

der stê der sigenüfte vrî

und habe sîn widerteil dâ bî:

Pârîsen und des siges wal.

3540

nû heizent schrîen über al

in der göte ritterschaft,

ob ieman sô gemuothaft

getürre sîn dar under,

daz er mich nû besunder

3545

und alters eine hie bestê.

wan zwâre ich wil, wie mirz ergê,

selb ander kempfen hiute

vür al die werden liute,

die sich ze strîte hânt bereit.

3550

wirt unser einer tôt geleit

ûf den clê von touwe naz,

diz ist doch wæger, denne daz

vil manic werder ritter

hie næme ein ende bitter.

3555

Nû daz Hector gesprach alsus

und dô sîn vater Prîamus

vernam, daz im wart ernest,

dô het er aller gernest

des kampfes in erwendet.

3560

sîn vröude wart verswendet,

wan er dûht in ze junc dar zuo,

daz er sô schiere und alsô fruo

für manigen solte strîten.

dâ von er bî den zîten

3565

bat sêre und ouch vil tiure

den jungelinc gehiure,

daz er sîn vehten lieze stân.

der strît der müeste für sich gân

von al der ritterschefte.

3570

ern hete niht an krefte

und an jâren noch die tugent,

daz er dâ strite in blüender jugent

vür alsô manigen hôhen man.

der rede treip ein wunder an

3575

der edel künic wider in.

er leite muot, herz unde sin

dar ûf in allen enden,

daz er in möhte erwenden

des kampfes an der selben stat.

3580

swie vil der vater dô gebat

den sun, daz half in cleine,

wan Hector was sô reine

und alsô rehte küene,

daz ûf dem plâne grüene

3585

was kein ritter im gelîch.

des lîbes und des muotes rîch

was der vil hôchgeborne.

dar umb in sînem zorne

sprach er zuo dem vater dô,

3590

daz er sich weder sus noch sô

des kampfes wolte frîen.

sus hiez er lûte schrîen

in der werden göte schar,

ob under in wær ieman dar

3595

zuo der hôchgezîte komen

sô kürlich und als ûz genomen,

daz er mit im aleine

vür beide schar gemeine

getörste vehten einen strît,

3600

sô daz si zwêne bî der zît

des grimmen kampfes wielten

und daz die ritter hielten

ze beiden sîten stille;

ouch wære daz sîn wille,

3605

swer den prîs dar under

züge an sich besunder

und dâ bestüende sigehaft,

daz der und sîn geselleschaft

Pârîsen, den vil süezen knaben,

3610

dâ solte ân allen kriec behaben.

 

Diu rede wart dô kunt getân

den göten allen ûf dem plân

und ouch ir ritterschefte wert.

des wart von gnuogen dâ gegert,

3615

daz man si lieze strîten.

vil maniger bî den zîten

gevohten gerne hæte alsus.

dô sprach der werde Pêleus,

der briutegoum des hoves was:

3620

swaz ritter ûf daz grüene gras

komen ist zer hôchgezît,

der enkeiner sol den strît

sô rehte billîch an sich nemen,

als ich, wan ez muoz mir gezemen

3625

von wâren schulden hiute.

man sol mich lân der briute

geniezen und der werdekeit,

daz disiu hôchgezît geleit

wart dur mînen willen her.

3630

sît daz mîn swæher Jûpiter

Pârîsen welle gerne hân,

sô lâze er mich den hie bestân,

der umb in kempfen welle.

gewinne ich daz gevelle

3635

alsô, daz ich den sic behabe,

sô belîbet uns der knabe,

der beide schœne ist unde zier.

ich bin ein junger betschelier

und hân gevohten selten.

3640

des ich ouch niht engelten

noch hiute sol an ritterschaft;

wan ich hân willen unde kraft,

diu beide guot ze strîte sint.

ouch ist er selbe noch ein kint,

3645

der kempfen hie nâch prîse wil:

dâ von ist mir des niht ze vil,

daz ich mit im ze strîte kome.

ez sî mîn schade, ez sî mîn vrome,

ich wil in kampfes hie gewern.

3650

mit scharpfen swerten und mit spern

sol man uns hiute beide

lân strîten ûf der heide,

als ez zwein kempfen wol gezeme.

swer under uns den sic geneme.

3655

und den man hœre prîsen,

der ziehe an sich Pârîsen

und gebe den reinen, wol gesiten

dem herren, durch den er gestriten

alsô vermezzenlichen habe.

3660

sît daz der hôchgeborne knabe

ist worden alsô rehte wert,

daz man durch in hie strîtes gert,

sô wil ich kempfen ouch umb in.

in ziuhet hie mit kampfe hin

3665

Hector eintweder, oder ich.

nû dar! man heize balde mich

bereiten ûf den grüenen plân:

ich wil in kampfes hie bestân.

 

Diu rede in allen wol geviel,

3670

wan daz in ungemüete wiel

her Jûpiter aleine,

dar umbe daz der reine,

der sîner tohter vriedel was,

an sich den willen ie gelas,

3675

daz er ze kampfe wolte komen.

er hete in gerne drabe genomen

mit worten und mit süezer bete,

dur daz er in beschirmet hete

vor schedelicher swære.

3680

dô was der tugentbære

Pêleus des muotes,

daz er dekeines guotes

dar umbe wolte hân gegert,

daz er der êren wære entwert,

3685

daz er gevohten hæte niht.

sîn herze truoc die zuoversiht,

daz er dâ solte prîs bejagen,

dâ von hiez er hin wider sagen

dem werden Hectorî, daz er

3690

mit willecliches herzen ger

mit im dâ kempfen wolte.

er enbôt im, daz er solte

bereiten sich ze strîte dâ.

daz selbe tete er ouch iesâ.

 

Zweikampf zwischen Hector und Peleus (scharfes Stechen)

 

3695

Alsus wart under diesen zwein

der strît getragen über ein

mit helfelicher boteschaft.

si wurden beide vlîzhaft

dar ûf in kurzer wîle,

3700

daz si ze kampfes bîle

bereit nâch wunsche wæren.

man sach die tugentbæren

gezieret rîten ûf den plân.

 

Zweikampf zwischen Hector und Peleus (Schwerterturnier)

 

Hector der hete an sich getân

3705

von stahelringen ein gewant:

daz beste, daz ie wart erkant

über al des landes creiz,

ez was geliutert unde gleiz

alsam ein spiegel niuwevar.

3710

geworht mit hôhem vlîze gar

fuorte er eine blaten drobe,

diu was gesniten wol ze lobe

ûz eines kocatrillen hût.

diu schein grüen als ein venchelkrût:

3715

alsô was si geverwet

und alsô wol gegerwet,

daz si was linde unde weich;

ir glanzen blech und ir geleich

beliben ungeschertet.

3720

ûz stahele wol gehertet

wâren si gemachet.

diu plate niht geswachet

wart von swertes orte.

kein lanze si durchborte

3725

mit ir spitze sinewel,

wan des kocatrillen vel

kein wâfen kan versnîden.

ein wâpencleit von sîden

het er dar über an genomen,

3730

daz was von einem lande komen,

dâ niht wan megede inne lebent

und die besten pheller webent,

die man ûf erden ie gewan.

der samît als ein rôse bran

3735

in einem rôten glaste,

dar ûz dem hôhen gaste

was sîn wâpencleit gesniten.

ein wunder was dar în gebriten,

daz diu Syrêne heizet

3740

und kiele ûf schaden reizet

mit ir gedœnes bilde.

daz selbe wunder wilde

schein dâ maget unde visch,

als ez lebende unde vrisch

3745

dâ bære wunneclichen schîn.

daz oberteil der forme sîn

was gestellet als ein wîp,

und was ein visch der under lîp

an schuopen und an hiute gar.

3750

daz bilde zweiger hande var

schein dâ beid ob und under.

daz fremde, wilde wunder

het oben eines menschen lîch

und was von grüener varwe rîch

3755

dâ niden allenthalben.

der samît ûz den alben

was komen, dâ die megde sint:

er möhte ein lûter ouge blint

mit sînem glanze hân gemaht.

3760

nie pfeller wart alsô geslaht

gefüeret in des landes rinc.

ouch wizzent, daz der jungelinc

fuort einen kostbærlichen schilt.

daz selbe wunderlîche wilt,

3765

von dem ich alrêrst hân geseit,

daz was dar ûf mit rîcheit

erhaben wunneclîche enbor.

als ich daz wâpencleit hie vor

entworfen und geverwet hân,

3770

alsô was ouch der schilt getân

und gestellet über al,

wan daz ein wunder âne zal

gesteines was dar în geworht.

er mohte in füeren unrevorht

3775

in der plânîe melme.

er hete ûf sînem helme

daz houbet der Syrênen clâr,

daz truoc von golde reidez hâr

und ein antlitze silberîn,

3780

die beide gâben liehten schîn

ûf der grüenen heide breit,

ouch clanc daz hâr von golde reit,

sô der helm gerüeret wart,

nâch maniger süezen schellen art,

3785

diu vil schône ist worden lût.

ûf bluomen und ûf grüenez crût

kam Hector sus gestapfet.

ez wart ûf in gekapfet

mit liehten ougen spiegelvar.

3790

er îlte ûf einem orse dar,

daz was unmâzen snel erkant;

ez schein noch swerzer, denne ein brant

und gienc in sprunge sam ein tier.

ouch kam der ander betschelier,

3795

der Pêleus geheizen was,

geriten ûf daz grüene gras,

als eime künige wol gezam.

wie der vil hôchgeborne kam,

des mügent ir ouch gerne losen:

3800

er fuorte halsberc unde hosen

lieht unde wunneclich getân,

die worhte ein smit, hiez Volkân,

der was ein meister aller smide.

in eines tracken unslide

3805

gemischet mit der gallen

und ob der glüete erwallen

gehertet daz gesmîde was.

stæt als ein vester adamas

wâren im die ringe sîn,

3810

die gâben liehtebæren schîn,

swenn er ze strîte ruorte.

waz wâpencleit er fuorte,

daz enmac ich niht verheln.

von zobele wârens' und ûz keln

3815

gesniten weggeht under ein,

sô daz dâ swarz bî rôtem schein

an dem rîlichen cleide.

doch was ein underscheide

zwischen den weggen und der nât.

3820

ûz golde ein bendel wol gedrât

was der junctûre decke,

der underschiet die wecke

mit sînem glanzen schîne.

smâragden und rubîne

3825

gleiz dar ûz ein wunder.

ein adelar besunder

in iegelichem wegge was,

der lûhte sam ein spiegelglas

und was von silber drîn geslagen.

3830

die wât mit hôhen êren tragen

mohte an im der künic rîch.

dem wâpencleide was gelîch

der schilt, den er des mâles truoc.

ein cleinœt edel unde cluoc

3835

daz fuort er bî den stunden.

ûf sînen helm gebunden

was im ein halber adelar,

daz oberteil daz fuort er gar

mit vetechen und mit houpte,

3840

daz manigen leides roupte

mit dem erwelten glanze sîn.

ez was gar lûter silberîn

und hete sunder lougen

zwei wunneclicher ougen,

3845

danne ie wurden gewunnen.

ûz sîme kopfe brunnen

zwêne karvunkelsteine.

seht, alsô kam der reine

Pêleus ze velde,

3850

mit worten ich iu melde

sîn ors von wunneclicher art.

dekeines nie sô vrevel wart,

noch sô gar unmâzen snel;

sîn hût diu was im und daz vel

3855

ze brûn enweder, noch ze blanc;

ez hete volleclichen ganc

und einen vrechen starken lîp.

dâ sâzen wunneclîchiu wîp

und wol gezierte vrouwen,

3860

die gerne wolten schouwen

den kampf, der solte dô geschehen.

man hete ungerne dâ gesehen

ein cleit swach unde virne.

dâ gleiz als ein gestirne

3865

golt unde lieht gesteine,

daz manic wilde feine

des mâles an ir wæte

und an ir lîbe hæte.

Nû wart zehant geschicket daz,

3870

daz iegelîchiu frouwe saz

dâ stille an dem gestüele

und ûf dem wîten brüele

die ritter machten einen creiz,

in dem ir zweiger puneiz

3875

und ir vehten solte ergân.

ein sicherheit diu was getân

mit bürgen und mit eiden,

ob einer von in beiden

ein bitterlichez ende küre,

3880

daz nieman anders dâ verlüre

dar umbe sînen lebetagen

und man ez lieze bî den tagen

belîben sunder allen zorn:

des heten bêdenthalp gesworn

3885

die besten ûf ir eide.

die kampfgesellen beide

ze strîte kêrten alzehant;

si kâmen ûf den plân gerant,

gezieret nâch dem wunsche gar.

3890

den orsen wunneclichgevar

den heten si verhenget.

si wurden beide ersprenget

mit grimmen und mit scharpfen sporn.

die zwêne kempfen hôchgeborn

3895

verhiewen si zen sîten

sô vaste bî den zîten,

daz beide bluot, schûm und sweiz

ab in dâ nider in den creiz

flôz und begunde triefen.

3900

si sprungen unde liefen

balder, dan si kæmen fluges;

wan in wart des widerzuges

an ir loufe gar verzigen.

ich wæne, daz si niht enswigen;

3905

si schrîten unde grâzeten.

die kempfen ebene mâzeten,

daz si durch daz gewæfen

ein ander beide træfen

und sich versêrten under in.

3910

Hector der kom griuschet hin

und îlte Pêleus dort her.

gesenket heten si diu sper

ein wênic vorne hin ze tal,

si zwêne wâren über al

3915

gar ûzer mâzen ellentrîch

und beide ein ander sô gelîch

an hôher mannes crefte,

daz in der ritterschefte

gezwîvelt wart, wer under in

3920

die sigenuft dâ fuorte hin.

 

Ir wille stuont ûf kampfes bîl.

si kâmen snurrend als ein pfîl,

der snellet ûz der nüzze.

man seit, daz nie geschüzze

3925

sô balde ein tracke wilde,

sô drâte ir zweiger bilde

kam ûf den orsen dar geflogen.

dâ von diu sper enzwei gebogen

wurden ûf dem wâfen.

3930

ein ander si dâ trâfen

sô vaste mit den scheften,

daz von ir stiches kreften

die lanzen beide sich ercluben

und in diu wolken ûfe stuben

3935

die schivern und die sprîzen.

dar nach begunden vlîzen

sich die kempfen hôchgeborn,

daz si diu swert vil ûz erkorn

zuhten ab den sîten

3940

und dâ mite ein strîten

erhuoben sunder twâle.

si twungen zuo dem mâle

vür sich die schilte beide

und vâhten ûf der heide

3945

mit ein ander sêre.

nâch edels herzen lêre

sluogen si dâ manigen slac,

der nâhe zuo dem lîbe wac

und ûf den grunt der sinne.

3950

si wurben nâch gewinne

mit herzen und mit handen,

dur daz in manigen landen

ir lop ze liehte würde brâht.

si wâren sêre ûf strît verdâht

3955

und ûf werde ritterschaft;

wan si mohten heldes kraft

beide wol geleisten.

si sluogen, daz die gneisten

des wilden fiures dicke,

3960

alsam die donreblicke,

ûz dem gesmîde sprungen.

ir slege lûte erklungen

ûf berge und in die lüfte.

nâch hôher sigenüfte

3965

stuont ir wille und ir gedanc.

Hector nâch liehtem prîse ranc,

daz selbe tet ouch Pêleus.

nû dar, nû dan, nû sô, nû sus

kêrten si des strîtes kampf.

3970

von den orsen rouch ein tampf,

wan in wart vil heiz getân.

ab den schilten manic spân

wart geströuwet ûf die wisen,

dar ûz erwelte steine risen

3975

und edel golt durliuhtic rôt.

si tâten beide ein ander nôt

mit scharpfen swerten liehtgevar,

des nâmen die götinne war

mit vlîzeclichen ougen.

3980

diu rede ist âne lougen,

daz nie gevâhten zwêne man

sô strîteclîche ein ander an,

sam si dô tâten beide.

si mahten ûf der heide

3985

gras in dem ringe tiure.

swaz Meige ûf die plâniure

bluomen hete dô gezetet,

die wurden von in zwein vertretet

und von ir snellen orsen vrech.

3990

doch wart von golde manic blech

an der bluomen stat gesât,

daz ab der küniclichen wât

geschrôten wart mit nîde.

der purper und diu sîde

3995

wurden sêre engenzet.

ir wâpencleit zerschrenzet

wart von swertes orten.

die wol gesteinten borten

dâ vielen zuo dem melme;

4000

von ir zweiger helme

gehouwen daz cleinœte wart.

die künige junc von hôher art

nû daz si lange alsus gestriten

und doch ir verhes niht versniten,

4005

dô kam ez von geschiht alsô,

daz Hector, der küene, dô

nâch hôhem prîse tiefe gruop.

Pârîs, der wandels vrîe,

und sluoc ez dar ûf Pêleum

4010

sô vaste, daz ein michel drum

ab sînem schilte nider spranc

und daz swert dem orse dranc

in sînen schedel hin zetal.

durch tehtier und durch hirneschal

4015

vil tiefen ganc ez dâ begreif;

wan ez sô vaste nider sleif,

dô der schilt den slac enphienc,

daz sîn vil scharpfiu snîde gienc

dem orse guot durch sînen gebel.

4020

dâ von des heizen bluotes nebel

vür sîn ougen im dâ wiel.

er strûchte für sich unde viel

zuo der plânîe tôt dernider.

Hector daz swert vil kûme wider

4025

ûz dem kopfe dâ gezôch.

waz tet dô Pêleus? er floch

ab dem tôten orse enwec.

der kempfe biderbe unde quec

warf sich ûz dem satelbogen

4030

und hete schiere sich gezogen

ûf die wîte dort hin dan;

dô reit in Hector aber an

und wolt in slahen mit gewalt,

des werte sich der kempfe balt.

 

4035

Swaz er des schiltes dennoch truoc,

daz hielt er für sich unde sluoc

dem kampfgenôzen sîn engegen,

der ûf in dâ mit swertes slegen

wolte gerne hân gebert.

4040

het er sich balde niht gewert,

sô müeste er sîn gelegen tôt.

daz swert er ie dem orse bôt

engegen, swenne ez ûf in dranc

und tet im alsô manigen swanc

4045

zen ougen und sô manigen stich,

daz ez begunde hinder sich

entwîchen unde dringen

und ez für sich getwingen

Hector niht mohte, als ich ez las.

4050

daz ors ein wênic schiuhe was,

dâ von ez hinder sich entweich,

dô man im alsô manigen streich

an drüzzel und an ougen sluoc.

ungerne ez in dô fürbaz truoc

4055

an Pêleum den werden,

der ûf des plânes erden

sich werte vrevelichen dô.

nû daz Hector sus noch sô

mohte ûf in daz ors gejagen

4060

und ez niht wolte in zuo im tragen,

dô wart sîn herze des ermant,

daz er sich warf dar abe zehant

und ûf den plân ze fuoze kam.

daz ors vrech unde lobesam

4065

liez er belîben under wegen

und îlte ûf Pêleum, den degen,

der gegen im spranc unde schreit.

si wâren ûf dem plâne breit

beide von den orsen komen:

4070

des wart ze fuoze ein strît vernomen,

der schœnste, den man ie gesach.

si truogen bitter ungemach;

wan in von kampfe wart sô heiz,

daz in der angestbære sweiz

4075

dur die stahelringe flôz.

reht als ûf einen anebôz

getengelt wirt von eime smide,

sus wart von in zwein âne vride

geslagen ûf die schilte glanz,

4080

die von ir henden manigen schranz

enpfiengen und begriffen.

diu swert vil wol gesliffen

schrieten spæne vil dervon;

wand in mit slegen tet gedon

4085

ir vil scherpfiu snîde.

iedoch wart daz gesmîde

niht verschrôten, noch entwert.

swie vil getengelt und gebert

ûf die stahelringe wart,

4090

sô wâren si doch von der art,

als ich dâ vorne hân geseit,

daz kein wâfen si versneit,

noch verschrôten kunde.

dâ von si bî der stunde

4095

vil deste langer vâhten.

si sluogen unde brâhten

mit den scharpfen clingen

niht anders ûz den ringen,

wan des wilden fiures heiz.

4100

des lûhte dâ vil unde gleiz,

dô man sô grimmeclichen drasch

ûf den rîlichen harnasch,

der sam ein spiegel was gevar.

si sluogen dar und aber dar

4105

ûf die gezierten schilte,

biz Hector der milte

kam ze grimmer swære;

wan Pêleus der mære

sîn ze leide niht vergaz.

4110

er spranc von im her dane baz

noch balder, denne ein snellez wilt.

ze rücke schielt er sînen schilt

und kam vermezzenlichen wider

ûf in geloufen aber sider

4115

mit eime gæhen sprunge.

der hôchgeborne junge

begunde an in genenden.

er gap ze beiden henden

daz edele und daz guote swert

4120

und sluoc den hôhen künic wert

sô krefteclîche ûf sînen helm,

daz im des rôten fiures melm

kam in die lüfte drûz geflogen

und der künic wol gezogen

4125

strûchte nider ûf diu knie.

der slac im alsô nâhe gie,

daz er vil nâch verdorben was.

des vröute sich vrô Pallas

und ir gespil, vrô Jûne.

4130

si dûhte ein sælic lûne,

daz Hector was gestrûchet hin;

wan si gedâhten under in,

er wære sigelôs erkant:

dâ von ir herze wart gemant

4135

ûf ein hôchgemüete alsus.

dâ wider trûrte Vênus

und sîn muoter Ekubâ.

die sâzen jæmerlichen dâ,

wan si von leide wâren bleich.

4140

ir hende lûter unde weich

mit jâmer si dâ wunden.

in fluzzen bî den stunden

die trehene ûz den ougen;

wan si des âne lougen

4145

heten beide wol gesworn,

er müeste hân den lîp verlorn.

 

Ouch dûhte an sînem valle

die werden ritter alle,

er wære sigelôs geleit,

4150

wan Pêleus der wart bereit

aber schiere ûf einen slac.

daz swert daz bürter unde wac

mit beiden henden ûf als ê.

swie sich der jungelinc iht mê

4155

gesûmet hæte langer,

sô müeste er ûf dem anger

tôt gelegen sîn bî namen.

dô begunde er sich des schamen,

daz er gestrûchet hæte.

4160

der edele und der stæte

sach die schœnen vrouwen an,

dar umb er niuwe kraft gewan

und einen ellentrîchen muot.

ir bilde lûter unde guot

4165

gap im dô veste sinne,

wan er begunde ir minne

betrahten und ir süezen lîp.

swer noch beginnet reiniu wîp

bedenken unde merken,

4170

der wil sîn herze sterken

ûf einen sigerîchen muot.

ze strîte wart nie niht sô guot,

sô daz man schœne vrouwen sehe

und mit des herzen ougen spehe

4175

ir triuwe und ir bescheidenheit.

ez ist ein rîlich wâpencleit

vür zegelich gemüete,

daz man der wîbe güete

leg an des herzen sinne

4180

und man sich mit ir minne

wâfene unde geste:

dâ von ein wille veste

wart gegeben Hectorî.

dô sîn ouge im nâhe bî

4185

sach werde vrouwen sitzen,

seht, dô begunde erhitzen

sîn herze schiere ûf den gedanc,

daz er vermezzenlîche ûf spranc.

 

Und er kam ze muote wider,

4190

swert unde schilt warf er dâ nider,

und wart ûf springen niht ze laz.

ern tete weder wirs noch baz,

wan daz er spranc ze Pêleô.

daz swert daz underlief er dô

4195

dem jungelinge wîte erkant

und umbegreif in alzehant

mit armen und mit henden.

er wolte dar zuo wenden

herz unde kraft die beide,

4200

daz er in ûf der heide

zer erden möhte bringen.

alsus begund er ringen

mit dem vil hôhen künige wert,

der ouch von im schilt unde swert

4205

warf zuo dem plâne grüene

und als ein ritter küene

sich werte ringende alzehant.

sîn arme wurden ouch gewant

umb sînen kampfgesellen.

4210

si wolten beide vellen

ein ander zuo der erden nider;

dan unde dar, hin unde wider

begunden si dô wenken

und mit den armen swenken

4215

al umb und umb ein ander.

alsam der salamander

sich brennet in der glüete,

alsô bran ir gemüete

in zorne bî der wîle.

4220

si giengen dâ ze bîle,

sam die wilden ebere tuont:

wan ez in umb daz leben stuont

und umb ir küniclichen prîs.

daz dâ gewunnen Pârîs

4225

würde von ir eines hant,

dar ûf sô wart ir muot gewant

und ir ellentrîcher sin.

si rungen strîtecliche umb in

und triben des vil unde gnuoc,

4230

unz sich der strît dar ûf getruoc,

daz Pêleus dâ nider sleif:

wan in Hector alsô begreif,

daz er in zuo der brust getwanc.

er huop in ûf hôh unde swanc

4235

den frumen und den werden

sô swinde zuo der erden,

daz im der lîp erkrachete

und er an kreften swachete.

Er warf in ûf daz grüene gras.

4240

und als er nider komen was,

dô viel ûf in der kempfe balt.

er lac im obe mit gewalt

und vrevelichen ûf dem plân.

der val het im sô wê getân,

4245

daz sîn wer wart cleine.

Hector der kempfe reine

der zuhte von der sîten

ein mezzer bî den zîten,

daz spitzic unde herte schein.

4250

mit zorne kam er über ein,

daz er im ûf den halsperc huop

und er nâch sîme schaden gruop

mit kreften und mit sinnen.

wand er sîn niht gewinnen

4255

mohte durch die ringe dâ,

sô las er im ze berge sâ

diu wâpencleider stehelîn

und wolt in mit dem mezzer sîn

hân gestochen durch den lîp.

4260

wan daz vil manic edel wîp

erwante sînen grimmen zorn,

sô hæte Pêleus verlorn

sîn leben sunder lougen.

dô mit ir liehten ougen

4265

die frouwen daz gesâhen,

daz im begunde nâhen

der angestbære smerze,

daz man im abe daz herze

wolte hân gestochen,

4270

dô wart zehant gesprochen

von clâren wîben ûz erwelt:

neinâ, tugentrîcher helt,

lânt den briutegoum genesen!

der sic muoz iemer iuwer wesen,

4275

dâ mite hânt ir êren gnuoc.

waz hülfe, ob er sîn leben cluoc

und sînen jungen lîp verlüre!

dur daz man iuwer tugent spüre

und iuwer hôhen edelkeit,

4280

sô nement sîne sicherheit

und lâzent im den lebetagen.

nû sî, daz er dâ lige erslagen,

waz hânt ir denne deste mêr?

Hector, der hôhe kempfe hêr,

4285

gap in der rede antwürte alsô:

ir vrouwen alle, sprach er dô,

ob mir dis êre hie geschiht,

daz er mir sicherheite giht

und ich Pârîsen hie behabe,

4290

sô wil ich gerne lâzen abe

durch iuch allen mînen zorn.

daz leben müeste er hân verlorn

ân iuwer bete minneclich.

nû dar! well er generen sich,

4295

sô biete ûf sînen vinger.

sîn trûren wirt vil ringer,

lât er mir disen prîs geschehen.

ich muoz iu sigenüfte jehen,

sprach Pêleus dô sâ zehant,

4300

ez ist nû leider sô gewant,

daz ich getuon niht anders mac.

ir hânt erworben den bejac,

daz ich verlust von iu hie nime.

sus bôt er sînen vinger ime

4305

und ergap sich im alsus.

des vröute sich vrô Vênus

und Ecubâ, sîn muoter,

ouch wart sîn vater guoter

von sîner sigenüfte vrô.

4310

vrô Pallas und vrô Jûnô,

die sazen trûric beide;

wan in geschach vil leide,

dô niht erfüllet wart ir ger.

des hoves wirt, her Jûpiter,

4315

viel in grimmeclichen zorn,

dur daz die sigenuft verlorn

hete sîner tohter man.

Hector dô lobes vil gewan

und hôher êre bî der zît.

4320

der bitter und der grimme strît

genomen hete ein ende.

Pârîsen bî der hende

nam Prîamus, der künic wîs.

er sprach: geselle Pârîs,

4325

ich sol dir wirde gunnen.

sît ich dich hân gewunnen

und dû mîn ingesinde bist,

weizgot, sô wil ich alle vrist

erhœhen dich ûf erden.

4330

dû solt getiuret werden

von mîner küniclicher hant.

ich hân mîn herze an dich gewant

und alle mîne zuoversiht.

hie mite enphienc in sîne pfliht

4335

Pârîsen künic Prîamus.

des vröute sich vrô Vênus

und al ir massenîe.

Pârîs, der wandels vrîe,

begunde ouch hœhen sînen muot

4340

dur daz manicvalte guot,

daz im zuo vliezen wolte;

daz er sich vröuwen solte,

daz was vil harte mügelich.

er vröute drîer dinge sich

4345

von wâren schulden sêre:

daz eine was diu êre,

daz durch in zwêne künige striten

und umb in ze kampfe riten

ûf der liehten heide breit;

4350

daz ander was diu werdekeit

und daz gelücke stæte,

daz er vernomen hæte,

daz er von adele was geborn;

daz dritte dinc vil ûz erkorn,

4355

des er vröuwen mohte sich,

daz was diu sælde lobelich,

daz Helenâ von Kriechenlant

was geheizen sîner hant

ze lône und z'einer stiure.

4360

der drîer âventiure

wart sîn herze hôchgemuot;

wan daz der süezen minne gluot

geströuwet was dar under.

ir heizen fiures zunder

4365

het im alsô den sin enbrant,

daz er begunde sâ zehant

nâch wîbes lône siechen.

daz Helenâ von Kriechen

geheizen im ze wîbe was,

4370

weizgot, des nam er unde las

gedenke vil ze herzen.

sîn fröude wart mit smerzen

getempert und gemischet.

versêret und erfrischet

4375

wâren sîne sinne

sô gar mit niuwer minne,

daz er der alten niht enphant;

wan er vergaz dô sâ zehant,

daz im diu clâre Oenônê

4380

was liep vor allen wîben ê.

 

Si wart ûz sînem muote braht.

er hæte ungerne dô gedâht,

daz er geschriben hæte,

wie daz wazzer dræte

4385

ze berge loufen solte,

swenn er si lâzen wolte

und scheiden von ir minne.

si wart ûz sînem sinne

gestôzen bî der stunde

4390

und Helenâ ze grunde

dar în versigelt alzehant;

daz schuof der süezen minne bant

und diu götinne Vênus,

von der sîn herze wart alsus

4395

gebunden und gevangen.

er kam vür si gegangen,

dâ si tougenlichen saz,

und kniete vür si, wizzent daz;

er was ir angesihte vrô.

4400

genâde, frouwe, sprach er dô,

sît iuwer krefteclich gewalt

ist alsô rehte manicvalt,

daz ir den hôhen allen obt,

sô tuont, daz ir mir hânt gelobt,

4405

swenn ez mit fuoge wol geschehe,

sô daz ich iuwer helfe sehe

und ich bestê von iu gemeit;

ir hânt mich brâht in werdekeit,

daz ich verschulden iemer sol.

4410

nû tuont mir noch ze frumen wol

und sint der worte hie gemant,

daz Helenâ von Kriechenlant

mir von iu gelobet sî.

lânt mich ir süezen minne vrî

4415

niht werden, sælic vrouwe guot!

ich hân geleit in mînen muot

ir schœne, ir adel und ir tugent

und hœre sagen von ir jugent

sô rîcher sælden wunder,

4420

daz ich durch si besunder

wil mîden alle vrouwen.

mich hât ir prîs verhouwen

und ir name reine.

ze herzen und ze beine

4425

bin ich verwundet von ir lobe.

ir minne reizel und ir clobe

hât mînen muot gevangen;

des muoz ich an ir hangen

und an ir genâde cleben.

4430

welt ir mir, sælic vrouwe, geben

niht helferîche stiure,

sô würde ich in dem fiure

der minne gar versmelzet.

versigelt und gevelzet

4435

ist jâmer in mîns herzen grunt

sô vaste in einer kurzen stunt,

daz ich mit langer swære craft

muoz ân ende sîn behaft,

ob ir mich âne ir minne lât,

4440

sît mich ir nam versêret hât

und ir lop für alliu wîp.

beschouwe ich denne ir süezen lîp,

sô muoz ich lîden manic nôt.

Helêne ist mînes herzens tôt,

4445

ob ir genâde an mir verzaget;

daz lânt iu, frouwe, sîn geclaget

durch iuwer hôhen sælikeit.

ir hânt mir hie von ir geseit

êr unde ganze wirde,

4450

nû lânt ouch mîne girde

erfüllet an ir werden,

durch daz ich ûf der erden

herze, lîp, sin unde leben

für eigen iu well iemer geben.

 

4455

Vênus, diu minneclîche, dô

Pârîse antwürte gap alsô.

geselle, sprach si wider in,

sît ich dir leben unde sin

 

Frau Venus verspricht, Paris bei der Gewinnung Helenens zu helfen

 

ûf Helenam gewîset hân,

4460

sô wirt dir ouch von mir getân

ir minne und ir genâde kunt.

ich sol dîn riuwic herze wunt

verheilen mit der helfe mîn,

dû maht des âne vorhte sîn,

4465

daz ich dir velsche mîniu wort.

dîn muot erfüllet ûf ein ort

wirt an der getriuwen.

ich lœse dich von riuwen

und ûz senender arebeit;

4470

des nim ze pfande mînen eit

und die vil hôhen sælde mîn.

genâde, werdiu künigin,

sprach aber dô Pârîs zehant,

iu sol von rehte manic lant

4475

iemer undertænic wesen.

ir hânt den wunsch an iuch gelesen

und aller sælden houbetschaz,

des wil ich âne widersaz

iu dienen mit vil stæter gir.

4480

sus neic er zühteclichen ir

und îlte mit ir schiere dô.

ze sînem vater Prîamô,

der sîn doch niht erkande,

gienc der hôchgenande

4485

und der getriuwe jungelinc.

der sazte in an der künige rinc

und bôt im werdeclîche zuht.

sich huop dâ fröude mit genuht

von maniger hande wunnespil.

4490

dâ was gewesen krieges vil,

des heten si vergezzen

und wâren dâ gesezzen

vrœlîche z'einem ringe.

von hübscher fuoge dinge

4495

wart kurzewîle dô vernomen.

nû was ouch dar ze hove komen

ein wîssage ûz dem lande,

der hete maniger hande

witze in sînem muote.

4500

daz übele und daz guote

kund er wol den liuten

bescheiden und betiuten.

Er was alt unde virne.

den louf an dem gestirne

4505

bekande der prophête.

waz iegelich planête

bezeichenunge brâhte,

wîslîche er daz bedâhte

und was ûf ez versunnen.

4510

er hete kunst gewunen

mit rîcher sinne lône;

dar umb er dicke schône

von herren wart gehandelt.

verkêret und verwandelt

4515

wart sîn bilde schiere.

ze vogel und ze tiere

wart er, swenne er wolte.

swaz ieman schaffen solte

von wunderlichen sachen,

4520

daz kunde er wol gemachen

mit zouber ûf der erden.

den hôhen und den werden

wont er ze hove gerne mite.

nâch eines alten mannes site

4525

gestellet was sîn bilde.

reht als ein Krieche wilde

truoc er vellen unde roc,

der obedach und underzoc

wâren von samîte.

4530

den mantel bî der zîte

het er gewunden umbe sich,

dâ manic valte wunderlich

stuont an in fremder schouwe.

gescheitelt als ein frouwe

4535

was der selbe wîssage.

verslizzen het er sîne tage

als ein prophête künste wîs.

hâr unde bart im waren grîs

und hiengen ûf den gürtel sîn.

4540

er truoc ein kriechisch hüetelîn

ûf sînem grâwen kopfe;

mit einem spæhen knopfe

ein twehel was dar ümbe

in wunderlicher krümbe

4545

geworfen und gestricket.

gestellet und gesticket

sîn figûre schein alsus.

 

Ein Weissager prophezeit Peleus und Thetis die Geburt Achills

 

geheizen was er Prôtheus

und weste künfteclîchiu dinc.

4550

enmitten ûf des plânes rinc

vil sanfte gie der grîse.

über sîne krucken lîse

leint er sich bî der stunde

und sprach mit wîsem munde:

 

4555

Ir werden geste rîche,

vernement algelîche,

waz ich iu welle künden.

von hôher liste fünden

erkenne ich künftic wunder:

4560

des hœrent mich besunder

ûf ein ende und an ein ort.

niht wegent ringe disiu wort

als einen üppeclichen troum.

her Pêleus, der briutegoum,

4565

und sîn âmîe Thêtis

bejagent hiedes sint gewis

gar einen clâren erben,

der schade mac verderben

mit edelichen sinnen.

4570

diu vrouwe sol gewinnen

ein kint, daz lop und êre birt;

wan si noch hînaht swanger wirt

und einen sun wirt tragende,

der hôhen prîs bejagende

4575

muoz werden in dem lande;

gelücke manger hande

zuo fliezen im beginnet.

sîn werder lîp gewinnet

beidiu schœnheit unde tugent.

4580

geloubent, daz sîn reiniu jugent

werden muoz vil ûz erwelt.

er wirt des lîbes gar ein helt

und des muotes ellenthaft;

er sol mit sînes herzen kraft

4585

rîlichez wunder stellen;

vil mangen ritter vellen

beginnet er mit strîte.

er wirt bî sîner zîte

an allen dingen sældenhaft,

4590

wan an dem einen, daz sîn kraft

ze jungest ime den schaden birt,

daz er ze Troye erslagen wirt

und er dâ leider tôt gelît.

sich hât zuo dirre hôchgezît

4595

ein kriec erhaben und ein zorn,

dâ von sîn jugent wirt verlorn

und sîn hôher lebetage.

vernement rehte, waz ich sage!

er wirt sô wol versunnen,

4600

daz Troye noch gewunnen

wirt von sîner krefte.

mit sîner meisterschefte

beginnet er ir an gesigen

und muoz ouch denne tôt geligen

4605

vor der veste wunneclich.

künd aber daz gefüegen sich,

daz er niht kæme zuo der stift,

diu Troye heizet an der schrift

und dâ sô manger wirt erslagen,

4610

sô möhte er sînen lebetagen

behalten und gefristen;

mit keiner hande listen

mac er anders sich genern,

denn ob er sich des kan erwern,

4615

daz er ze Troye niht envert,

dâ manger sînen lîp verzert.