| |
|
-
- V r o w e n d i e n s t
E r s t e r D i e n s t
( 8 - 1 3 8 9 )
Ulrich ist bereit zu neuem Dienst
(Strophe 1376 - 1389)
- _____________________________________
- 1376
- Ichn geschalt si nimmer mê,
ichn dient abẹr ir niht mê als ê.
si het an mir alsô getân,
daz ich ein vrowen vrîer man
- 5
- was vil gar in dem herzen mîn.
dar an sô wânde ich stæte sîn
von wîbes lop ich doch niht schiet,
in wânwîsen sang ich in liet.
L i e d X X V I I
(Bechstein II, 149; Lachmann 428,1)
Ein tanzwîse, diu ahzehende
- 1
- Nu fröit iuch, minne gernde man:
wizzet daz iuch rehte fröide machet wert,
und daz niemen werden kan
êren rîch, wan der mit fröiden êren gert.
- 5
- mit zühten frô, daz ist ein leben
dem got vil êren hât gegeben.
- 2
- Swer werder wîbe minne wil
unde ir gruoz verdienen, der sî hôchgemuot.
swie selten ich ir minne stil,
doch weiz ich wol daz guoten wîben sanfte tuot
- 5
- der durch si zuht bî fröiden hât:
des dienest in ze herzen gât.
- 3
- Wie sol ein ungemuoter man
erwerben hôchgemuotes wîbes habedanc?
wil er ir daz ertrûren an,
dazs in minne, sost sîn tumber wân vil kranc.
- 5
- ir hôchgemuotes herzen rât
sîn trûren hât für missetât.
- 4
- Mit sorgen niemen kan bejagen
werdes wîbes minne und ouch ir friundes gruoz.
trûren mac wol missehagen
guoten wîben: wan dâ von wirt êren buoz.
- 5
- ich râte iu mannen hôhen muot,
sît wîben fröide sanfte tuot.
- 5
- Ich wil hôhes muotes sîn,
und wil durch guotiu wîp gein ir mîn zürnen lân,
die ich ê hiez die frouwen mîn.
si weiz wol selbe wie si hât an mir getân:
- 5
- daz sî verkorn durch guotiu wîp,
den immer dienen muoz mîn lîp.
- 6
- Swâ ich mich her versûmet hân
an rehten fröiden, daz sol man mir wol vergeben.
wan ich wil nu êrst heben an
mit hôhem muote und ouch mit ritterlîchem leben.
- 5
- swer von mir hôhes muotes gert,
der wirt des volleclîch gewert.
mîn muot von wîben hôhe stât:
ir güet mich zürnen niht enlât.
L i e d X X V I I I
(Bechstein II,150; Lachmann 429,11)
Ein tanzwîse, diu niunzehende
- 1
- In dem luftesüezen meien,
sô der walt gekleidet stât,
sô siht man sich schône zweien
allez daz iht liebes hât,
- 5
- unde ist mit ein ander frô.
daz ist reht: diu zît wil sô.
- 2
- Swâ sich liep ze liebe zweiet,
hôhen muot diu liebe gît.
in der beider herzen meiet
ez mit fröiden alle zît.
- 5
- trûrens wil diu liebe niht,
swâ man liep bî liebe siht.
- 3
- Swâ zwei liep ein ander meinent
herzenlîchen âne wanc
und sich beidiu sô vereinent
daz ir liebe ist âne kranc,
- 5
- diu hât got zesamne geben
ûf ein wunneclîchez leben.
- 4
- Stætiu liebe heizet minne.
liebe, minne, ist al ein:
die kan ich in mînem sinne
niht gemachen wol zuo zwein.
- 5
- liebe muoz mir minne sîn
immer in dem herzen mîn.
- 5
- Swâ ein stætez herze vindet
stæte liebe, stæten muot,
dâ von al sîn trûren swindet.
stætiu liebe ist alsô guot
- 5
- daz si stæte fröide gît
stæten herzen alle zît.
- 6
- Möhte ich stæte liebe vinden
der wold ich sô stæte sîn,
daz ich dâ mit überwinden
wolde gar die sorge mîn.
- 5
- stæter liebe wil ich gern
und unstæte gar verbern.
- 1377
- Mîn lîp, der was gar senens vrî:
des was mir vrî gemüete bî.
nâch werdem wîbe senender muot
der tuot vil wê und ist doch guot.
- 5
- swelch hertze hôhe senen hât,
daz schamt sich aller missetât.
dâ von sô sol ein ritter wenen,
sîn hertze ûf hôhe minne senen.
- 1378
- Daz ich mich in der jugent went
ûf minne sen, des hât gesent
mîn herze sich unmâzen vil.
swer werdez wîp erwerben wil,
- 5
- der bedarf gelückes wol.
ob er ir dient reht, als er sol,
sô muoz er doch gelücke hân,
sol sî genâde an im begân.
- 1379
- Daz wolde got, möht daz geschehen,
daz wîp in mannes hertze sehen
möhten, und in sam die man!
sô müeste man unstæte lân.
- 5
- swer denne stæte wær gemuot,
der het ez gegen dem stæten guot:
sô müesten diu unstæten wîp
minnen valscher mannen lîp.
- 1380
- Swie kleine mich diu minne twanc;
ze dienest ich den frowen sanc
einen reien minneclîch,
mit süezen worten dœnerîch.
- 5
- den sanc ich gegen der sumerzît,
sô perg und tal gezieret lît,
und daz der walt hât grüene dach.
nu sült ir hœren, wie der sprach:
L i e d X X I X
(Bechstein II,153; Lachmann 431,19)
Ditz ist ein reye
- 1
- Sumervar
ist nu gar
beide velt
anger walt
- 5
- hie und dâ
wîz, rôt, blâ,
gel, brûn, grüen,
wol gestalt.
wünneclîch,
- 10
- fröiden rîch
ist gar swaz diu erde treit.
sælic man,
swer sô kan
dienen daz sîn arebeit
- 15
- im liebe leit.
- 2
- Swem got gît
daz er lît
lieber, der
mac wol sîn
- 5
- sunder leit.
imst bereit
zaller zît
meien schîn.
im ist wol,
- 10
- swanne er sol
spiln der minne fröiden spil.
fröiden leben
kan wol geben
werdiu minne swem si wil:
- 15
- si hât sîn vil.
- 3
- Swem ein wîp
sînen lîp
minneclîch
umbevât,
- 5
- ob der niht
sælden giht,
daz ist grôz
missetât.
imst geschehen,
- 10
- wil ers jehen,
dâ von im wirt trûren kranc.
sunder meil
ist sîn heil,
swem von linden armen blanc
- 15
- wirt umbevanc.
- 4
- Sælden hort
ist ein wort
das ein kus
in gegît,
- 5
- sô ir spil
minne wil
spiln und liep
liebe lît.
ob dâ iht
- 10
- ougen liht
lieplîch sehen ein ander an?
jâ für wâr,
dâ wirt gar
minneclîchen wol getân
- 15
- swaz ieman kan.
- 5
- Minnen solt
wirt geholt
volleclîch
dâ ein man
- 5
- unde ein wîp
umbe ir lîp
lâzent vier
arme gân,
decke blôz.
- 10
- fröide grôz
wirt dâ beidenthalben kunt.
ob dâ niht
mêr geschiht,
kleinvelhitzerôter munt
- 15
- wirt minnen wunt,
dar nâch gesunt.
- 1381
- Dô der reie wol für quam,
und daz der sumer ende nam,
dô kom mîn hôchgemuoter lîp
aber hin, dâz ịch daz werde wîp
- 5
- in zühten und in vreuden vant,
der ich dâ lobt ê in ir hant,
daz ich die alten vrowen mîn
niht mêre solde scheltent sîn.
- 1382
- Sich fuogte von ir güete daz,
daz ich in zühten zuo ir saz.
des was ich hertzenlîchen vrô.
ich reit mit ir sus unde sô:
- 5
- des antwurt mir diu tugend rîch
mit süezen worten minneclîch.
mit spæher rede ich von ir schiet:
dâ von sô sang ich disiu liet:
L i e d X X X
(Bechstein II,156; Lachmann 434,19)
Ein tanzwîse, diu zweinzigeste
- 1
- Frouwe schœne, frouwe reine,
frouwe sælic, frouwe guot,
ich wæn iuch diu minne kleine
müet: des sît ir hôchgemuot.
- 5
- wirt iu minnen twingen kunt,
iuwer kleinvelrôter munt
lernet siuften an der stunt.
- 2
- «Herre, sagt mir, waz ist minne?
ist ez wîp odr ist ez man?
des enwart ich noch nie inne.
sagt an, wie ist ez getân?
- 5
- daz sült ir mir künden gar,
waz ez sî und wie ez var;
daz ich mich vor im bewar.»
- 3
- Frouwe, minne ist sô gewaltec
daz ir dienent elliu lant:
ir gewalt ist manecvaltec.
ich tuon iu ir site bekant.
- 5
- sî ist übel, sî ist guot,
wol und wê si beidiu tuot.
seht alsô ist sî gemuot.
- 4
- «Herre, kan diu minne swenden
trûren unde ouch sendiu leit,
hôchgemüete in herze senden,
füegen zuht und werdekeit,
- 5
- hât si alles des gewalt
alse ich iu hân vor gezalt,
sost ir sælde manicvalt.»
- 5
- Frouwe, ich wil iu von ir mêre
sagen. ir lôn ist wünneclîch:
sî gît fröide, sî gît êre,
sî tuot hôher tugende rîch.
- 5
- ougen wunne, herzen spil
gît si swem si lônen wil,
der zuo hôher sælden vil.
- 6
- «Herre, wie sol ich verschulden
ir lôn unde ir habedanc?
sol ich kumber dâ von dulden,
da ist mîn lîp zuo gar ze kranc.
- 5
- leides mag ich niht getragen.
wie sol ich ir lôn bejagen?
herre, daz sült ir mir sagen.»
- 7
- Frouwe, dâ soltû mich meinen
herzenlîchen alse ich dich,
unser zweien sô vereinen,
daz wir beidiu sîn ein ich.
- 5
- wis du mîn, sô bin ich dîn.
«herre, des mac niht gesîn,
sît ir iuwer, ich bin mîn.»
- 1383
- Diu liet diu wâren sinne rîch:
si dûhten manigen gämellîch.
sô seig ôt aber der sumer zuo:
man hôrte spâtẹ, man hôrte fruo
- 5
- singen kleiniu vogelîn.
wîbes güetẹ daz hertze mîn
ze singen aber sêre twanc:
diu liet ze dienst ich in dô sanc:
L i e d X X X I
(Bechstein II,158; Lachmann 436,18)
Diu ein unde zweinzigest wîse
- 1
- Wol dir, sumer, dîner süezen
wünneclîchen schœnen zît.
dû kanst trûren wol gebüezen.
dîn kunft hôchgemüete gît.
- 5
- du bist süeze;
dâ von ich dich suoze grüeze.
- 2
- Heide velt walt anger ouwe
sach ich nie gekleidet baz.
von dem luftesüezem touwe
sint die bluomen alle naz.
- 5
- vogelîne
singent lop des meien schîne.
- 3
- Sô sing ich von guoten wîben,
alse ich aller beste kan.
mit ir lobe wil ich vertrîben
swaz ich ungemüetes hân.
- 5
- wîbes güete
gît mir fröiden rîch gemüete.
- 4
- Wîbes schœne, wîbes êre,
wîbes güete, wîbes zuht
ist für wâr ein êren lêre,
minne gerndes herzen suht.
- 5
- sô ist hulde
alles guotes übergulde.
- 5
- Swâ ein werdez wîp an lachet
einen minne gernden man
unde ir munt ze küssen machet,
des muot mtioz gelîche stân
- 5
- hôch der sunne.
sîn wunn ist ob aller wunne.
- 1384
- Nach den lieden mir geschach
ein dinc, des ich für sælde jach
und des ich hiut und immer mêr
bin in dem hertzen muotes hêr
- 5
- und des mîn muot muoz hôhe stân,
de wîle ich lîp und leben hân,
und des ich immer mêr bin vrô:
daz ist mîn reht: nu sî alsô!
- 1385
- Waz daz sî, daz mich als hô
dô freut und wes ich immer vrô
bin bî allen mînen tagen,
daz wil ich iu vil gern sagen:
- 5
- ich gedâht: «wie lange sol daz sîn,
daz âne vrowen daz hertze mîn
sî? daz ist mir wæn niht guot:
ich wirdẹ dâ von vil ungemuot.»
- 1386
- Ich gẹdâht: «ich weiz daz wol für wâr,
swer alsô swendet sîniu jâr,
daz er niht minnet guotiu wîp
mit triuwen als sîn selbes lîp,
- 5
- dem wirt von rehte werdecheit
in allen landen gar verseit.
swer diu wîp niht hertzen lîch
minnet, der wirt schanden rîch.
- 1387
- Bî mir selben ich ez weiz:
ich weiz wol, dô ich mich ê vleiz
ze dienen schôn der frowen mîn,
dô sach man mich bî freuden sîn
- 5
- und ouch vil ritterlîch gemuot.
dâ von was mir dienest guot.
mîn muot stuont in ir dienste hô:
ich wart durch sî vil offte vrô.
- 1388
- Mîn zît mit freuden hine gie.
nu diene ich weder dort noch hie:
daz ist niht ritterlîcher muot.
sît frouwen dienest sanfte tuot,
- 5
- sô solde ich wol ein frowen hân,
der ich mit dienst wær untertân
vil ritterlîchen gar mîn leben.
die müez mir got vil schire geben!
- 1389
- Ich hân frowen vil gesehen,
den man von wârheit muoz des jehen,
daz sî sîn schœne und dar zuo guot
und für wâr wîplîch gemuot:
- 5
- der wil ich einẹ ze frowen nemen,
des ritters dienest mac gezemen,
und wil ir wesen undertân
mit dienst, als ich beste kan.»
|
|