Ἀνθολογία Παλατινή

1. Τὰ τῶν χριστιανῶν ἐπιγράμματα

______________________________________________________________________

119.

Ὑπόθεσις τῶν Ὁμηροκέντρων

Βίβλος Πατρικίοιο θεουδέος ἀρητῆρος,

ὃς μέγα ἔργον ἔρεξεν, Ὁμηρείης ἀπὸ βίβλου

κυδαλίμων ἐπέων τεύξας ἐρίτιμον ἀοιδήν,

πρήξιας ἀγγέλλουσαν ἀνικήτοιο Θεοῖο·

5

ὡς μόλεν ἀνθρώπων ἐς ὁμήγυριν, ὡς λάβε μορφὴν

ἀνδρομέην, καὶ γαστρὸς ἀμεμφέος ἔνδοθι κούρης

κρύπτετο τυτθὸς ἐών, ὃν ἀπείριτος οὐ χάδε κύκλος·

ἠδ᾽ ὡς παρθενικῆς θεοκύμονος ἔσπασε μαζὸν

παρθενίοιο γάλακτος ἀναβλύζοντα ῥέεθρον·

10

ὡς κτάνεν Ἡρώδης ἀταλάφρονας εἰσέτι παῖδας,

νήπιος, ἀθανάτοιο Θεοῦ διζήμενος οἶτον·

ὥς μιν Ἰωάννης λοῦσεν ποταμοῖο ῥεέθροις·

ὥς τε δυώδεκα φῶτας ἀμύμονας ἔλλαβ᾽ ἑταίρους·

ὅσσων τ᾽ ἄρτια πάντα Θεὸς τεκτήνατο γυῖα,

15

νούσους τ᾽ ἐξελάσας στυγερὰς βλεφάρων τ᾽ ἀλαωτύν·

ἠδ᾽ ὅππως ῥείοντας ἀπέσβεσεν αἵματος ὁλκοὺς

ἁψαμένης ἑανοῖο πολυκλαύτοιο γυναικός·

ἠδ᾽ ὅσσους μοίρηισιν ὑπ᾽ ἀργαλέηισι δαμέντας

ἤγαγεν ἐς φάος αὖθις ἀπὸ χθονίοιο βερέθρου·

20

ὥς τε πάθους ἁγίου μνημήια κάλλιπεν ἄμμιν·

ὥς τε βροτῶν ὑπὸ χερσὶ τάθη κρυεροῖς ἐνὶ δεσμοῖς,

αὐτὸς ἑκών· οὐ γάρ τις ἐπιχθονίων πολεμίζοι

ὑψιμέδοντι Θεῶι, ὅτε μὴ αὐτός γε κελεύοι·

ὡς θάνεν· ὡς Ἀίδαο σιδήρεα ῥῆξε θύρετρα,

25

κεῖθεν δὲ ψυχὰς θεοπειθέας οὐρανὸν εἴσω

ἤγαγεν ἀχράντοισιν ὑπ᾽ ἐννεσίηισι τοκῆος,

ἀνστὰς ἐν τριτάτηι φαεσιμβρότωι ἠριγενείηι

ἀρχέγονον βλάστημα Θεοῦ γενετῆρος ἀνάρχου.

Ἀνώνυμος