Ἀνθολογία Παλατινή

1. Τὰ τῶν χριστιανῶν ἐπιγράμματα

______________________________________________________________________

120.

Ἐν Βλαχέρναις. ἴαμβοι

Εἰ φρικτὸν ἐν γῆι τοῦ Θεοῦ ζητεῖς θρόνον,

ἰδὼν τὸν οἶκον θαύμασον τῆς παρθένου·

ἡ γὰρ φέρουσα τὸν Θεὸν ταῖς ἀγκάλαις

φέρει τὸν αὐτὸν εἰς τὸ τοῦ τόπου σέβας.

5

ἐνταῦθα τῆς γῆς οἱ κρατεῖν τεταγμένοι

τὰ σκῆπτρα πιστεύουσι τῆς νίκης ἔχειν·

ἐνταῦθα πολλὰς κοσμικὰς περιστάσεις

ὁ πατριάρχης ἀγρυπνῶν ἀνατρέπει.

οἱ βάρβαροι δὲ προσβαλόντες τῆι πόλει,

10

αὐτὴν στρατηγήσασαν ὡς εἶδον μόνην,

ἔκαμψαν εὐθὺς τοὺς ἀκαμπεῖς αὐχένας.

Ἀνώνυμος