BIBLIOTHECA AUGUSTANA

 

Das Nibelungenlied

1190/1200

 

 

Der Nibelunge Nôt

 

9. Aventiure

 

___________________________________________________

 

 

Aventivre wie sivrit ze wormez

in botschefte fvor

 

529

Do si gevarn waren | wol niwen tage

do sprach von tronege hagene | nv hoert waz ich iv sage

wir svmen vns mit den maeren | ce wormz an den rin

iwer boten solden | nv ce bvrgvnden sin

530

do sprach der kvnich gvnther | ir habet mir war geseit

vns waere ce der selben verte | niemen so bereit

als ir min frivnt her hagene | nv ritet in min lant

di mine hovereise | tvt in niemen baz bechant

531

des antwurte hagene | ich pin niht bote gvt

lat mich pflegen der chamere | beliben vf der flvt

ia wil ich bi den vrowen | behivten ir gewant

vnz wir si bringen | in der bvrgende lant

532

nv pitet sifride | fveren di poteshapft

der chan si wol gewerben | mit ellenthaffter crapft

versage er iv di reise | ir svlt mit gvten siten

dvrch iwer swester willen | der bete in vrivntlichen piten

533

er sande nach dem reken | der chom do man in vant

er sprach sit wir heim nahen | in miniv lant

so sold ich poten senden | der lieben swester min

vnt miner mvter | daz wir nahen an den rin

534

des ger ich an ivch sifrit | nv leistet minen mvt

daz ich ez iemer diene | sprach der degen gvt

do widerredete iz sifrit | der vil chvne man

vnz daz in gvnther | sere vlegen began

535

er sprach ir svlt riten | durch den willen min

vnt ovch dvrch crimhilde | daz shone magedin

daz ez mit mir verdiene | div herlichiv meit

do daz gehorte sifrit | do was der recke vil bereit

536

nv enbietet swaz ir wellet | des wirt niht verdaget

ich wil iz gerne werben | dvrch di vil shonen meit

ziwiv sold ich verzihen | di ich in hercen han

swaz ir gebietet | daz ist alliz getan

537

so saget miner mvter | vten der chvnegin

daz wir an dirre verte | in hohen mvte sin

lat wizzen mine brvder | wi wir geworben han

ir svlt ovch vnser frivnde | disiv maere horen lan

538

di minen schonen swester | di svlt ir niht verdagen

den min vnt prvnnhilde dienest | den svlt ir der maegde sagen

vnt ovch dem gesinde | vnt allen minen man

darnach ie ranch min herce | wi wol ich daz verendet han

539

vnt sagt oertwine | dem liebem naeven min

daz er heizze sidelen | ce wormez an den rin

vnt ander mine mage | sol man wizzen lan

ich wil mit prvnnhilde | groze hohzite han

540

vnt sage miner swester | so si daz habe vernomen

daz ich mit miner swester | si ce lande chomen

daz si mit vlize enpfahe | di lieben trivtinne min

daz wil ich immer diende | vmb crhimhilde sin

541

sifrit der herre | balde vrlovp genam

von vrovn prvnnhilde | als im wol gezam

virz allem ir gesinde | do reit aer an den rin

ez chvnde in dirre werlde | ein bot bezzer niht gesin

542

mit vier vnt zweinzech recken | ce wormez er do reit

des chvneges chom er ane | do daz wart geseit

allez daz gesinde | mvte iamers not

si vorhten daz ir herre | dort beliben waere tot

543

do rbeizten si von rossen | vil hohe stvnt ir mvt

vil schiere chom in giselher | der ivnge chvnech gvt

vnde gernot sin brvder | wi bald er do sprach

do er den chvnich gvnther | niht bi sifride sach

544

sit willechomen sifrit | ir svlt mich wizen lan

wa ir minen brvder | den kvnich habt verlan

div prvnnhilde sterche | in wen vns hat benomen

so waere ir hohiv minne | vns ce grozem shaden chomen

545

di angest lat beliben | iv vnt den magen sin

iv enbivtet sinen dienest | der liebe hergeselle min

den liez ich wol gesvnden | er hat mich iv gesant

daz ich sin bote waere | mit maeren her in iwer lant

546

ir svlt daz ahten shiere | swi so daz geshaehe

daz ich di kvneginne | von iwer swester saehe

di sol ich lazen hoeren | waz in enboten hat

gvnther vnt prvennhilt | ir dinch in hohe stat

547

do sprach der ivnge giselher | da svlt ir zv zir gan

da habt ir miner swester | vil liebe angetan

si treit ovch michel sorge | vmb den prvoder min

div magt siht ivch gerne | des wil ich iwer bvrge sin

548

do sprach der herre sifrit | swaz ich ir dienen chan

daz sol vil willechlichen | mit triwen sin getan

wer saget nv den vrowen | daz ich dar wil gan

des wart do bote giselher | der vil waetliche man

549

giselher der snelle | zv siner mvter sprach

vnt ovch ce siner swester | da er si beide sach

vns ist chomen sifrit | der helt vz niderlant

in hat min brvder gvnther | her ce rine gesant

550

er bringet vns div maere | wi ez vmb den kvnich ste

nv svlt ir im erlovben | daz er ce hove ge

er sagt div rehten maere | her von islant

noch was den edelen vrowen | michel sorge bechant

551

si sprvngen nach ir waete | do leiten si sich an

si baten sifride | hin ce hove gan

daz tet er willechlichen | want er si gerne sach

crhimhilt div edele | zv im gvetlichen sprach

552

sit willechom her sifrit | ritter lobelich

wa ist min brvder gvnther | der edel kvnich rich

von prvnnhilde chrepfte | ich waen wir in han verlorn

owe mich armer maegde | daz ich ce der werlt ie wart geborn

553

do sprah der ritter chvene | nv gebt mit botenprot

ir vil schone vrowen | ir waeinet ane not

ich liez in wol gesvnden | daz tvn ich iv bechant

si habent mich iv beide | mit den maeren her gesant

554

iv enbivtet holden dienest | er vnt div wine sin

mit vrivntlicher liebe | vil edeliv chvenegin

nv lazet iwer weinen | si wellent shiere chomen

si het in manigen citen | so liebez maere niht vernomen

555

mit snewizzen geren | ir ovgen wolgetan

wishete si nach trehin | danchen si began

dem boten dirre maere | div ir waren chomen

do was ir michel trvren | vnt ir weinen benomen

556

si bat den boten sitzen | des was er vil bereit

do sprach div minnechliche | mir waere niht ce leit

ob ich dem boten miete | solde gebin min golt

darzv sit ir ce riche | ich wil iv immer wesin holt

557

op ich nv eine hete | sprach er drizech lant

so enpfienge ich doh gerne | gab vz iwerr hant

do sprach div tvgentriche | nv sol ez sin getan

si hiez den chamaeraer | nach der botenmiete gan

558

vier vnt zweinzech povge | mit gesteine gvt

di gap si im ce miete | so stvnt des heldes mvt

er woldes niht behalden | er gab iz sa cehant

ir naehestim ingesinde | di er ce kemnaten vant

559

ir mvter bot ir dienest | in vil gvotlichen an

ich sol iv sagen maere | sprach der chvne man

wes ivch bitet gvnther | so er chvmt an den rin

ob ir daz vrowe leistet | er well iv immer waege sin

560

di sinen richen geste | des hort ich in gern

daz ir di wol enpfahet | vnd svlt in des gewern

daz ir gegin im ritet | fver wormez an den sant

des sit ir von dem chvenege | mit rehten triwen gemant

561

do sprach div minnechliche | des bin ich vil bereit

swaz ich im chan gedienen | daz ist im vnverseit

mit vrivntlichen triwen | so sol ez sin getan

do merte sich ir varwe | di si vor liebe gewan

562

ez en wart nie bote enpfangen | deheines fvrsten baz

getorste si in chvessen | div vrowe taete daz

wi rehte minnechlich | er von den vrowen shiet

do taten bvrgende | als in sifrit geriet

563

sindolt vnt hvnolt | vnt rvnolt der degen

vil grozer vmmvze | mvsen do pflegen

rihten daz gesidele | vor wormez vf den sant

des chvniges shapfere | man mit arbeiten vant

564

ortwin vnt gere | di ne wolden daz niht lan

si sanden nach den frivnden | allenthalben dan

si chvndeten in di hohzit | div da solde sin

da cierten sich engegene | div vil shonen magdin

565

der palas vnt di wende | daz was vberal

gecieret gegen den gesten | der gvntheres sal

der wart vil wol becimert | dvrch manegen vremden man

disiv vil starche hohzit | div hvp sich vil vrolichen an

566

do ritten allenthalben | di waege dvrch daz lant

der drier chvnege mage | di hete man besant

daz si den solden warten | di in da wolden chomen

da wart vzer valde | vil richer waete genomen

567

do sagete man div maere | daz man riten sach

di prvnnhilde vrivnde | do hovp sich vngemach

von des volches crepfte | in bvrgenden lant

hey waz man chvener daegene | da ce beiden siten vant

568

do sprach div shone crimhilt | ir miniv magedin

di an dem antpfange | mit mir wellen sin

di svchen vz den chisten | div allerbesten chleit

so wirt vns von den gesten | lob vnt ere geseit

569

do chomen ovch di rechen | di hiezen tragen dar

di herlichen saetele | von rotem golde gar

di vrowen solden riten | ce wormez an den rin

bezzer pferhtgereite | div chvnden niender sin

570

hey waz da lihtes goldes | von den moeren shein

in lvhte von den zovmen | vil manich edelstein

di gvldinen shaemel | ob liehem pfelle gvt

di braht man den vrowen | si waren vrolich gemvt

571

vffe dem hove waren | div vrowenpferht bereit

den edeln ivnchvrowen | als ich iv han geseit

div smalen fvrbvge | sach man di moeren tragen

von den besten siden | da von iv iemen chvnde gesagen

572

sehs vnt ahzec vrowen | sach man da fver gan

di gebende trvogen | zv crimhilde dan

chomen di vil schone | vnt trvgen lihtiv kleit

da chom ovch gecieret | maich waetlichiv meit

573

fvmpfcech vnt viere | von bvergvnde lant

ez waren ovch di hohsten | di man da inder vant

di sach man da valvahse | vnder liehten porten gan

des e der chvnich gerte | daz wart mit vlize getan

574

si trvgen richen pfellel | di besten di man vant

vor den vremden recken | so manich gvt gewant

daz ir genvege shone | ce rehte wol gezam

er waere in swachem mvte | der ir deheiner waere gram

575

von zobel vnt von harme | vil man da chleider vant

da wart vil wol gecieret | manich arm vnt hant

mit povgen ob den siden | di si da solden tragen

iv en chvnde diz vlizen | ce ende niemen gesagen

576

vil manigen gvertel | spaehen rich vnt lanch

vber liehtiv chleider | vil manich hant do swanch

vf edel roche ferrans | von pfelle vz arabi

den aedelen ivnchfrowen | was vil hoher frevden bi

577

ez wart in fvorgespenge | manich shoniv meit

genaet vil minnechliche | ez moeht ir wesin leit

der ir vil liehtiv varwe | niht lvhte gegen der wat

so shones ingesindes | nv niht chvnges chvnne hat

578

do di vil minnechlichen | nv trvgen ir gewant

di si da fvoren solden | di chomen dar cehant

der hochmveten recken | was ein vil michel crapft

man trvch ovch dar mit shilden | vil manich esshinen schapft