BIBLIOTHECA AUGUSTANA

 

Das Nibelungenlied

1190/1200

 

 

Der Nibelunge Nôt

 

15. Aventiure

 

___________________________________________________

 

 

Aventivre wie sifrit

verraten wart

 

877

An dem vierdem morgen | zwen vnt drizech man

sach man ce hove riten | daz wart do chvnt getan

gvnther dem vil richen | im were widerseit

von lvge erwuohsen vrovn criemhilde | div allergrozzesten leit

878

vrlovp si namen | daz si fvr solden gan

vnd iahen daz siz waeren | livdegeres man

den e hete betwungen | div sifrides hant

vnd in ce gisel brahte | in daz gvntheres lant

879

di boten er do grvzte | vnd hiez si sitzen gan

ir einer sprach darvnder | herre lat vns stan

vnze wir sagen maere | die iv enbotten sint

ia habt ir ce vinde | daz wizzet maniger mvter chint

880

iv widersaget livdegast | vnd livdeger

den ir da wilen tatet | div grozlichen ser

di wellent zv ziv riten | mit her in diz lant

der chvenich begonde zvrnen | do er div maere bevant

881

do hiez man di meinraeten | zen herbergen varn

wi mohte sich her sifrit | do davor bewarn

er oder ander iemen | daz si da trvgen an

daz wart sit in selben | ce grozem leide getan

882

der chvnich mit sinen vrivnden | rvonende gie

hagen von tronege | in nie geruwen lie

noch heten ez gescheiden | genvge skveniges man

do ne wolt et hagene | nie des tages abgegan

883

eines tages si sifriden | ruowende vant

do begonde vragen | der helt von niderlant

wi gat so tvrechliche | der chvnich vnt sine man

daz hilf ich im imer rechen | hat im iemen iht getan

884

do sprach der herre gvnther | mir ist von schvlden leit

livdegast vnd livdeger | di habent mir widerseit

si wellent offenlichen | riten in min lant

do sprach der degen chvne | daz sol div sifrides hant

885

nach allen iwern eren | mit vlize vnderstan

ich getvn noch den daegenen | als ich han e getan

ich gelege in wuehste | ir bverge vnd ovch ir lant

e daz ich erwinde | des sin min hovbet iwer pfant

886

ir vnt iwer recken | svlt hi heime bestan

vnd lat mich zv zin riten | mit den di ich han

daz ich iv gerne diene | daz laz ich ivch sehen

von mir sol iweren vienden | daz wizzet leide geschehen

887

so wol mich dirre maere | sprach der chvenich do

als ob er ernstliche | der helffe waere vro

mit valsche neig im tieffe | der vngetriwe man

do sprach der herre sifrit | ir svlt vil chleine sorge han

888

do schichten si die reise | mit den chnehten dan

sifride vnd den sinen | ce sehen was ez getan

do hiez er sich bereiten | di von niderlant

di sifrides recken | svchten stritechlich gewant

889

do sprach der starche sifrit | min vater sigemvnt

ir svlt hi beliben | wir chomen in chvrcer stvnt

git vns got gelveche | her wider an den rin

ir svlt bi dem chvnige | hie vil vroliche sin

890

div zeichen si an bvnden | also si wolden dan

da waren genvge | di gvntheres man

di ne wessen niht der maere | davon ez was geschehen

man mohte groz gesinde | do bi sifride sehen

891

ir helme vnd ovch ir prvenne | si bvnden vf di march

sich bereite vome lande | vil manich ritter starch

do gi von tronege hagene | da er criemhilde vant

vnt bat im geben vrlovp | si wolden rvmen daz lant

892

nv wol mich sprach do criemhilt | daz ich ie gewan den man

der minen lieben vrivnden | wol tar vor gestan

also min herre sifrit | tvt den vrivnden min

des wil ich hohes mvtes | sprach div chveneginne sin

893

vil lieber vrivnt hagene | gedenchet ane daz

daz ich iv gerne diene | vnd noch nie wart gehaz

des lazzet mich geniezen | an minem liebem man

ern sol des niht engelten | hab ich prvnnhilde iht getan

894

daz hat mich sit geruowen | sprach daz edel wip

ovch hat er darvmbe | cerbluowen minen lip

daz ich iz ie geredete | daz beswaeret ir den mvt

daz hat vil wol errochen | der helt chvne vnd gvt

895

er sprach ir wert versvenet | noch wol nach disen tagen

criemhilt min liebiv vrowe | ia svlt ir mir sagen

wi ich iv mvge gedienen | an sifride iwerm man

daz tvn ich gerne vrowe | wand ich es niemen baz en gan

896

ich waere an alle sorge | sprach daz edel wip

daz im iemen naeme | in stvrme sinen lip

ob er niht wolde volgen | siner vebermvt

so waere im sicher | der degen chvne vnd gvt

897

vrowe sprach do hagene | vnt habt ir des wan

daz man in mvege versniden | ir svlt mich wizzen lan

mit wi getanen listen | ich daz sol vndersten

ich wil im ce hvte | immer riten vnd gen

898

si sprach dv bist min mach | vnd ich pin der din

ich bevilhe dir mit triwen | den lieben wine min

daz tv mir wol behvetest | den min holden man

si sagt im chvendiv maere | div bezzer waeren verlan

899

si sprach min man ist chvene | vnt darzv starch genvch

do er den lintrachen | an dem berge slvch

ia badete sich in dem plvote | der reche vil gemeit

davon in sit in stvrmen | nie dehein waffen versneit

900

jedoch pin ich in sorgen | swenn er in strite stat

vnd vil der gershvezze | von helden hande gat

daz ich da verliese | den minen lieben man

hey waz ich grozzer sorge | diche vmbe sifriden han

901

ich meld iz vf genade | vil lieber vrivnt

daz dv dine triwe | behaltest ane mir

da man da mach verhowen | den minen lieben man

daz laz ich dich hoeren | deist vf genade getan

902

do von des trachen wunden | vloz daz heize blvt

vnd sich darinne badete | der chvene ritter gvt

do viel im zwihssen di herte | ein lindenblat vil breit

da mach man in versniden | des ist mir sorgen vil bereit

903

do sprach von tronege hagene | vf daz sin gewant

naet ir im ein chleinez ceichen | da ist mir bi bechant

wa ich in mvege behevten | so wir in stvrme stan

si wanden helt do vristen | ez was vf sinen tot getan

904

si sprach mit chleinen siden | nae ich vf sin gewant

ein tovgenlichez crvece | da sol helt din hant

den minen man behivten | so ez an di herte gat

swenn er in den stvermen | vor sinen vienden stat

905

daz tvn ich sprach do hagene | vil liebiv vrowe min

do wand ovch des div vrowe | ez sold im vrvme sin

do was damit verraten | der criemhilde man

vrlovp nam do hagene | do gie er vroeliche dan

906

des chveneges ingesinde | was alliz samt gemvt

ich waene immer recke | mer deheiner tvt

so grozer meinraete | so da von im ergie

do sich an sine triwe | criemhilt div chveneginne lie

907

des andern morgens | mit tvsent siner man

reit der herre sifrit | vil vroelichen dan

er wand er solde rechen | der siner vrivnde leit

hagen im reit so nahen | daz er geschowete div chleit

908

als er gesach daz pilde | do schiet er tovgen dan

di sageten ander maere | zwene siner man

mit vride solde beliben | daz gvntheres lant

vnd si hete livdger | zv dem chvenige gesant

909

wi vngerne sifrit | do hin wider reit

ern het etewaz errochen | siner vrivnde leit

wand in vil chvm erwanden | di gvntheres man

do reit er zv dem kvenige | der wirt im danchen began

910

nv lon iv got des willen | vrivnt sifrit

daz ir so willechliche | tvt des ich ivch bit

daz sol ich immer dienen | als ich von rehte sol

vor allen minen vrivnden | so getruwe ich iv wol

911

nv wir der herverte | ledich worden sin

so wil ich iagen riten | bern vnd swin

hin cem waschemwalde | als ich vil dike han getan

daz het geraten hagene | der vil vngetriwe man

912

allen minen gesten | sol man daz sagen

daz wir vil vrv riten | di wellen mit mir iagen

daz si sich bereiten | di aber hie bestan

hovhssen mit den vrowen | daz si mir liebe getan

913

do sprach der herre sifrit | mit herlichem site

swenne ir iagen ritet | da wil ich gerne mite

so svlt ir mir lihen | einen svcheman

vnd etelichen bracken | so wil ich riten in den tan

914

welt ir niht nemen einen | sprach der kvenich cehant

ich lih iv welt ir viere | den vil wol ist bechant

der walt vnde ovch di stige | da div tier hine gant

die ivch niht fverwise | cen herbergen riten lant

915

do reit zv sinem wibe | der recke vil gemeit

schiere hete hagene | dem kvenige geseit

wir gewinnen wol | den tiwerlichen degen

svs getaner vntriwe | solde niemer man gepflegen