BIBLIOTHECA AUGUSTANA

 

Das Nibelungenlied

1190/1200

 

 

Der Nibelunge Nôt

 

16. Aventiure

 

___________________________________________________

 

 

Aventivre wie sivrit

ermort wart

 

916

Gventher vnd hagene | di recken vil balt

lobten mit intruwen | ein pirsen in den walt

mit ir scharffen geren | si wolden iagen swin

bern vnd wisende | waz moehte chvners gesin

917

damit reit ovch sifrit | in herlichem site

maniger hande spise | fvrte man in mite

zeinem chlaren brvnnen | verlos er sit den lip

daz het geraten prvnnhilt | des kvnich gvntheres wip

918

do gie der degen chvne | da er crimhilde vant

do was nv vfgesovmet | sin edel pirsgewant

sin vnd siner gesellen | si wolden vber rin

do ne dorfte criemhilde | nimmer leider gesin

919

di sine trivttinne | chvst er an den mvnt

got laze mich dich vrowe | gesehen noch gesvnt

vnd mich div dinen ovgen | mit holden magen din

soltv chvercewilen | ine mach hie heime niht gesin

920

do gedahtes an div maere | si ne torster niht gesagen

div si da hagenen sagete | do begonde klagen

div edel chveneginne | daz si ie gewan den lip

do weinete ane mazze | des herren sifrides wip

921

si sprach zv dem recken | lat iwer iagen sin

mir trovmte hinat | wi zwei wildiv swin

iageten veber heide | da wurden blvomen rot

daz ich so sere weine | des get mir waerliche not

922

ich fverhte harte sere | ettelichen rat

ob man der deheinem | missedienet hat

di vns gefvgen chvennen | vientlichen haz

belibet lieber herre | mit rehten triwen rat ich daz

923

er sprach min trivtinne | ich chvm in chvrcen tagen

ine weiz hie niht der livte | di mir iht hazzes tragen

alle dine mage | sint mir gemeine holt

ovch han ich an den degenen | hie niht anders versolt

924

neina herre sifrit | ia fverht ich dinen val

mir trovmte hinte leide | wi ob dir ce tal

vielen zwene berge | ine gesach dich nimmer me

wil dv von mir scheiden | daz tvt mir an dem hercen we

925

er vmbvie mit handen | daz tvgentriche wip

mit minnechlichem chvessen | trvt er ir schonen lip

mit vrlovbe er dannen | shiet in chvrcer stvnt

si ne gesach in leider | darnach nimmer mer gesvnt

926

do ritten si von dannen | in einen tieffen walt

dvrch chvrcewile willen | vil manich ritter balt

volgeten gvnthere | vnd sinen man

ger vnd giselher | di waren da heime bestan

927

geladen vil der rosse | chom vor in veber den rin

di den iagetgesellen | brot vnd win

daz vleihs mit den visschen | vnd manigen andern rat

den ein chvnich so riche | vil harte pillichen hat

928

si hiezen herbergen | fver den grvnen walt

gegen des waldes ablovffe | di stolcen ieger balt

da si da iagen solden | vf einen wert vil breit

da was ovch chomen sifrit | daz wart dem chvenege geseit

929

von den iagtgesellen | wurden do gar bestan

div warte in allen enden | do sprach der chvene man

sifrit der vil starche | wer sol vns in den walt

wisen nach dem wilde | ir helde chvne vnd balt

930

welle wir vns scheiden | sprach do hagene

e daz wir beginnen | hie ce iagene

dabi wir mvegen bechennen | ich vnd di herren min

wer di besten iegere | an dirre waltreise sin

931

livte vnd gehvende | svln wir teilen gar

so cher ietslicher | swar er gerne var

swer danne iage daz beste | des sol er haben danch

do wart der ieger biten | bi einander niht ce lanch

932

do sprach der herre sifrit | ich han der hvnde rat

niwan einen bracken | der so genozzen hat

daz er di verte erchenne | der tiere dvrch den tan

wir chomen wol ce iegede | sprach der criemhilde man

933

do nam ein alter iegere | einen gvten spverhvnt

er brahte den herren | in einer chvrcer stvnt

da si vil tieren fvnden | swaz der von laegere stvnt

di eriagten di gesellen | als noch gvte ieger tvnt

934

swaz ir der bracke erspranchte | di slvch mit siner hant

sifrit der vil chvene | der helt von niderlant

sin ros lieff so sere | daz ir im niht entran

den lob vor in allen er | an dem iegde gewan

935

er was in allen dingen | biderbe genvch

tier was daz erste | daz er ce tode slvch

ein vil starchez halp | mit der sinen hant

darnach er vil schiere | einen vngefvegen lewen vant

936

do den der bracke erspranchte | den shoz er mit dem bogen

eine starche strale | het er darin gezogen

der lev lief nach dem shvzze | wan drier sprvenge lanch

di sinen iagtgesellen | di sagten sifride danch

937

darnach slvch er shiere | einen wisent vnd einen elch

starcher vower viere | vnd einen grimmen shaelch

sin ross in trvch so balde | daz ir im niht entran

hirzze oder hinden | chvnde im wenich engan

938

einen eber grozen | den vant der spverhvnt

als er begvnde vliehen | do chom an der stvnt

des selben geiedes meister | er bestvnt in vf der sla

daz swin vil zornechlichen | lief an den helt san

939

do slvch in mit dem swerte | der criemhilde man

ez en het ein ander ieger | so samfte niht getan

do er in het ervellet | man vie der spverhvnt

do wart sin iaget daz riche | wol den bvergvnden chvnt

940

do sprachen sine iegere | mvegez mit fvege wesen

so lat vns her sifrit | der tier ein teil genesen

ir tvt vns hivte laere | den berch vnd ovch den walt

des begonde smielen | der degen chvene vnde balt

941

do hortens allenthalben | lvdem vnd doz

von livte vnd ovch von hvnden | was der schal so groz

daz in davon antwurte | der berch vnd ovch der tan

vier vnt zweinzech rvore | di ieger heten verlan

942

do mvsen vil der tiere | vliesen da daz leben

do wanden si daz fvegen | daz man in solde geben

den pris vor dem geiede | des chvnde niht geschaehen

do der starche sifrit | wart cer fiwerstat gesaehen

943

daz iagt was ergangen | vnd ovch niht gar

di cer fiwerstete wolden | di brahten mit in dar

vil maniger tier hvete | vnd wildes genvch

hey waz man des cer chvchen | des chvneges ingesinde trvch

944

do hiez der chvenich chvenden | den iegern vzerchorn

daz er wold enbizzen | do wart vil lvote ein horn

zeiner stvnt geblasen | damit in wart erchant

daz man den fvrsten edele | da cen herbergen vant

945

do sprach ein sifrides iaegere | herre ich han vernomen

von eines hornes dvzze | daz wir nv svln chomen

zv den herbergen | antwurten ich des wil

do wart nach den gesellen | gevraget blasende vil

946

do sprach der herre sifrit | nv rvome ovch wir den tan

sin ross trvch in ebene | si ilten mit im dan

si erspranchten mit ir shalle | ein tier vil griwelich

daz was ein ber wilde | do sprach der degen hinder sich

947

ich wil vns hergesellen | gvter chvercewile wern

ir svlt den bracken lazen | ia sih ich einen bern

der sol mit vns hinnen | zen herbergen varn

ern vliehe danne vil sere | ern chan sich es nimmer bewarn

948

der bracke wart verlazen | der bere spranchte von dan

do wold in erriten | der criemhilde man

er chom in ein gewelle | do ne chondes niwet wesen

daz starche tier do wande | vor dem iaegere genesen

949

do spranch von sinem rosse | der stolze ritter gvt

er begonde nachlovffen | daz tier was vmbehvt

ez en chonde im niht entrinnen | do viench er iz cehant

an aller slahte wunden | der helt ez schiere gebant

950

crazcen vnd bizen | chvnde ez niht den man

er band ez zvme satele | vf saz der snelle san

er braht iz an di fiwerstat | dvrch sinen hohen mvt

ceiner chvrzewile | der recke chvene vnt gvt

951

wi rehte herliche | er cen herbergen reit

sin ger was vil michel | starch vnde breit

im hiench ein zier waffen | hin nider an den sporn

von vil rotem golde | fvrt der herre ein schone horn

952

von bezzerm pirschewaete | gehort ich nie gesagen

einen rok von swarcem pfellel | den sach man in tragen

vnd eine hvt von zobele | div riche was genvch

hey waz er richer porten | an sinem chochaere trvch

953

von einem pantel | was darvber gezogen

ein hvt dvrch di sveze | ovch fvrt er einen bogen

den man mit antwerche | mvse ziehen dan

der in spannen solde | ern het ez selbe getan

954

von einer lvdemes hvte | was allez sin gewant

von hovbet vnz an daz ende | gestrevt man darvffe vant

vz der liehten rivhe | vil manich goldes zein

ce beiden sinen siten | dem chvnem iegermeister schein

955

do fvrt er palmvngen | ein ziere waffen breit

daz was also scherpfe | daz ez nie vermeit

swa man ez slvch vf helme | sin ecke waren gvt

der herliche iaeger | was hohe gemvt

956

sit daz ich iv div maere | gar bescheiden sol

im was sin edel chocher | vil gvter strale vol

von gvldinen tvellen | div sahs wol hende breit

ez mvse vil balde sterben | swaz er damit versneit

957

do reit der ritter edele | vil weidenliche dan

in sahen dort chvmen her | di gvntheres man

si lieffen im engegen | vnd enpfiengen im daz march

do fvrt er bi dem satel | einen bern groz vn starch

958

als er gestvnt von rosse | do lost er im div bant

von fvoze vnd ovch von mvnde | do erlvote da cehant

vil groze daz gehvende | swaz des den bern sach

daz tier ce walde wolde | di livte heten vngemach

959

der ber von dem schalle | dvrch di chvochen geriet

hey waz er chvchenknehte | von dem fiwer schiet

vil chezzel wart gerveret | cefveret manich brant

hey waz man gvter spise | in der asschen ligen vant

960

do sprvngen von dem sedele | di herren vnd ir man

der ber begonde zvernen | der chvenich der hiez do lan

allez daz gehvende | daz an den seilen lach

vnd waeriz wol verendet | si heten vrolichen tach

961

mit bogen vnd mit spiezen | niht langer man daz lie

do lieffen dar di snellen | da der ber gie

da was so vil der hvnd | daz da niemen shoz

von des livtes schalle | daz gebirge allez erdoz

962

der ber begonde vliehen | von den hvnden dan

im chvnde niht gevolgen | wan criemhilde man

der erlief in mit dem swerte | ce tode er in do slvch

hin wider zv dem fiwere | den ber man do sider trvch

963

do sprachen di daz sahen | er waere ein creftech man

di stolzen iagetgesellen | hiez man cen tisschen gan

vf einem shoenem anger | saz ir da genvch

hey waz man richer spise | den edeln iegeren do trvch

964

di schenchen chomen seine | di tragen solden win

ez en chvnde baz gedienet | den helden nimmer sin

heten si darvnder | niht so valschen mvt

so waeren wol di recken | vor allen schanden behvt

965

do sprach der herre sifrit | wunder mich des hat

sit man vns von den chvchen | git so manigen rat

warvmb vns di shenchen | bringen niht den win

man en pflaege baz der iegere | ich en wil niht iagetgeselle sin

966

ich hete wol gedienet | daz man min baz naeme war

der chvenich von sinem tissche | sprach in valsche dar

man sol iv gerne bvezen | swes wir gebresten han

daz ist von hagenen schvlden | er wil vns gern erdversten lan

967

do sprach von tronege hagene | vil lieber herre min

ich wande daz daz pirsen | hivte solde sin

da cem spehtsharte | den win den sand ich dar

sin wir hivte vngetrvnchen | wi wol ich mere daz bewar

968

do sprach der herre sifrit | ir lip der hab vndanch

man solde mir siben sovme | met vnd lvter tranch

haben her gefveret | do des niht mohte sin

do sold man vns gesidelt | haben naher an den rin

969

do sprach von tronege hagene | ir edel ritter balt

ich weiz hie bi nahen | einen brvnnen chalt

daz ir niht en zvernet | da svln wir hine gan

der rat wart manigem degene | ce grozen sorgen getan

970

sifrit den recken | twanch des tvrstes not

den tissch er deste ziter | rvchen dan gebot

er wolde fver di berge | zv dem brvnnen gan

do was der rat mit meine | von den rechen getan

971

div tier hiez man waegen | fveren in daz lant

div hete verhowen | div sifrides hant

man iah im grozer eren | swer iz ie gesach

hagen sine triwe | vil sere an sifriden brach

972

do si wolden dannen | zv den linden breit

do sprach von tronege hagene | mir ist des vil geseit

daz niht gevolgen chvenne | der criemhilde man

swenne er wolde gahen | hey wolde er vns daz sehen lan

973

do sprach von niderlande | der chvene sifrit

daz mvget ir wol versvchen | welt ir mir lovffen mit

ce wette zv dem brvnnen | so daz ist getan

dem sol man iehen dannen | den man sihet gewunnen han

974

nv welle ovch wirz versvchen | sprach hagene der degen

do sprach der snelle sifrit | so wil ich mich legen

fvor di iwern fvezze | nider an daz gras

do er daz gehorte | wi lieb ez gvnthere was

975

do sprach der degen chvene | noch wil ich iv mere sagen

allez min gewaete | wil ich mit mir tragen

den ger zv dem schilde | vnd al min pirsgewant

den chocher zv dem swerte | vil schier er vmb gebant

976

do zvgen si div chleider | von dem libe dan

in zwein wizzen hemden | sach man si beide stan

sam zwei wildiv pantel | si lieffen dvrch den chle

do sach man bi dem brvnnen | den chvenen sifriden e

977

den pris an allen dingen | trvch er vor manigem man

daz swert daz lost er schiere | den chocher leit er dan

den starchen ger er leinte | an der linden ast

bi des brvnnen vluzze | stvnt der herliche gast

978

di sifrides tvgende | waren harte groz

den schilt er leite nider | al da der brvnne vloz

swi harte in do dvrste | der helt nine tranch

e daz der chvenich getrvnche | des sagt er im boesen danch

979

der brvnne der was chvle | lvter vnd gvt

gvnther sich do neigete | nider zv dem flvt

als er het getrvnchen | do riht er sih von dan

alsam het ovch gerne | der chvne sifrit getan

980

do engalt er sine zvehte | den bogen vnt daz swert

daz trvch allez hagene | von im dannewert

do sprang er hin wider | da er den ger da vant

er sach nach einem bilde | an des chvenen gewant

981

da der herre sifrit | ob dem brvnnen tranch

er shoz in dvrch daz crvece | daz von der wunden spranch

daz blvt im von dem hercen | vaste an hagenen wat

so groze missewende | ein helt nimmer mer begat

982

den ger im gein dem hercen | er do stechen lie

also grimmechlichen | ce flvehten hagen nie

gelief noch in der werlde | vor deheinem man

do sich der herre sifrit | der grozen wunden versan

983

der herre tobelichen | von dem brvnnen spranch

im ragete von dem hercen | ein gerstange lanch

der fverste wande vinden | bogen oder swert

so mvese wesen hagen | nach sinem dienste gewert

984

do der sere wunde | des swertes niht en vant

do ne het et er niht mere | want des shildes rant

er zvchten von dem brvnnen | do lief er hagenen an

do ne chvnde im niht entrinnen | des chvnich gvntheres man

985

swi wunt er was cem tode | so crefftechlich er slvch

daz vz dem schilde | draete genvch

viel des edelen gesteines | der schilt vil gar cerbrast

sich hete gerne errochen | der vil herliche gast

986

do was gestrvchet hagene | vor siner hant ce tal

von des slages creffte | der wert vil lvt erhal

het er daz swert enhande | so waerez hagenen tot

so sere zvrnt der wunde | des gie im waerlichen not

987

erblichen was sin varwe | ern chvnde niht gesten

sines libes sterche | mvse gar cergen

wand er des todes zeichen | in liehter varwe trvch

sit wart er beweinet | von schonen vrowen genvch

988

do viel in di blvmen | der criemhilde man

daz plvt von siner wunden | sach man vil vaste gan

do begonde er schelten | des gie im groziv not

di vf in geraten | heten den vngetriwen tot

989

do sprach der verchwunde | ia ir vil boesen zagen

waz helffent miniv dienest | daz ir mich habt erslagen

ich was ie getriwe | des ich engolten han

ir habt an iwern magen | leider vbele getan

990

di sint davon bescholten | swaz ir wirt geborn

her nach disen ziten | ir habet iwern zorn

gerochen also sere | an dem libe min

mit laster ir gescheiden | svlt von gvten rechen sin

991

di ritter alle lieffen | da er erslagen lach

aez was ir genvgen | ein vrevdeloser tach

di iht triwe heten | von den wart er gechlaeit

daz het wol verdienet | der ritter chven vnt gemeit

992

der kvenich von bvrgvnden | chlagte sinen tot

do sprach der verchwunde | ez ist ane not

daz der nach schaden weinet | der in hat getan

der dienet michel schelten | ez waere bezer verlan

993

do sprach der grimme hagene | ia ne weiz ich waz er kleit

allez hat nv ende | vnser sorge vnt vnser leit

wir vinden ir vil wenich | di getverren vns bestan

wol mich deich siner herschaft | ce rate han getan

994

ir mveget ivch lihte rvemen | sprach do sifrit

het ich an iv erchennet | den mortlichen sit

ich hete wol behalten | vor iv minen lip

mich riwet niht so sere | so vrov criemhilt min wip

995

nv mvze got erbarmen | deich ie gewan den svn

dem man daz itewizen | sol nah den ziten tvn

daz sine mage iemen | mortliche han erslagen

moht ich so sprach sifrit | daz sold ich pilliche chlagen

996

do sprach iemerliche | der verchwunde man

welt ir chvenich edele | triwen iht began

in der werlt iemen | lat iv bevolhen sin

vf iwer genade | di holden trivtinne min

997

vnd lat si des geniezen | daz si iwer swester si

dvrch aller fvrsten tvgende | wont ir mit triwen bi

mir mvezen warten lange | min vater vnd mine man

ez en wart nie vrowen leider | an liebem manne getan

998

di blvmen allenthalben | von blvte wurden naz

do rang er mit dem tode | vnlange tet er daz

want des todes waffen | ie ce sere sneit

do ne moht niht reden mere | der recke chven vnt gemeit

999

do di herren sahen | daz der helt was tot

si leiten in vf einen schilt | der was von golde rot

vnd wurden des ce rate | wi daz sold ergan

daz man ez verhaele | daz ez hete hagen getan

1000

do sprach ir genvge | vns ist vbel geschehen

ir svlt ez heln alle | vnt svlt geliche iehen

da er rite eine iagen | der criemhilde man

in slvegen schachaere | da er fvere dvrch den tan

1001

do sprach von tronege hagene | ich bringn in daz lant

mir ist vil vnmaere | vnd wirt ez ir bechant

div so hat betrvebet | den prvennhilde mvt

ez ahtet mich vil ringe | swaz si weinens getvt