BIBLIOTHECA AUGUSTANA

 

Das Nibelungenlied

1190/1200

 

 

Der Nibelunge Nôt

 

20. Aventiure

 

___________________________________________________

 

 

Aventivre wie der chvnic ezele nah froen chriemhilt

ze wormze sinen boten sande

 

1143

Daz was in einen citen | do vrov helche erstarp

vnt daz der kvnich ecel | vmb ein ander vrowen warp

do ritten sine vrivnde | in der bvrgondn lant

ceiner stolcen wittewen | div was vrov criemhilt genant

1144

sit daz erstorben waere | der schonen helchen lip

si sprachen welt ir immer | gewinnen edel wip

di hohesten vnt di besten | di chvnich ie gewan

so nemt di selben vrowen | der starche sifrit was ir man

1145

do sprach der chvnich riche | wi moht daz ergan

sit ich pin ein heiden | vnt der tovffe nine han

so ist div vrowe christen | davon so lobt sis niht

ez mvese sin ein wunder | ob ez immer geschit

1146

do sprachen aber di snellen | waz ob siz lihte tvt

dvrch iwern namen den hohen | vnd iwer michel gvt

so sol man daz versvchen | an daz vil edel wip

ir mveget vil gerne minnen | den ir vil waetlichen lip

1147

do sprach der kvnich edele | wem ist nv bechant

vnder iv bi rine | di livte vnd ovch daz

do sprach von bechelaren | der gvte rvedeger

ich han erkant von kinde | di edelen chvenege her

1148

gvnther vnd gernot | di edeln ritter gvt

der dritte heizet giselher | ir ietslicher tvt

swaz er der besten eren | vnd tvgende mach began

ovch hant ir alten mage | noch her daz selbe getan

1149

do sprach aber ecel | vrivnt dv solt mir sagen

op si in minem lande | chrone solde tragen

vnd ist ir lip so schoene | als mir ist geseit

den minen besten vrivnden | sold ez nimmer werden leit

1150

si gelichet sich wol mit schoene | der lieben vrowen min

helchen der vil richen | ia ne chonde niht gesin

in dirre werlde schoener | deheines chvniges wip

den si lobt ce vrivnde | der mach wol trosten sinen lip

1151

er sprach so wirb ez rvedeger | als liep als ich dir si

vnd sol ich criemhilde | immer geligen bi

des wil ich dir lonen | so ich allerbeste chan

so hastv minen willen | so rehte verre getan

1152

vzzer miner chameren | so heiz ich dir geben

daz dv vnt dine gesellen | mveget vroliche leben

von rossen vnd von chleidern | allez daz dv wil

des hiez ich iv bereiten | zv der botscheffte vil

1153

des antwurte rvdeger | der margrave rich

gerte ich dines gvtes | daz waere vnlobelich

ich wil din bote gerne | wesen an den rin

mit min selbes gvte | daz ich han von der hende din

1154

do sprach der chvenich riche | nv wenne welt ir varn

nach der minnechlichen | got sol ivch bewarn

der reise an allen eren | vnt ovch di vrowen min

des helfe mir gelveche | daz si vns genedich mvezze sin

1155

do sprach aber rvedger | e wir rvmen daz lant

wir mvezzen e bereiten | waeffen vnt gewant

also daz wirs ere | vor fvrsten mvgen han

ich wil ce rine fveren | fvmfhvndert waetlicher man

1156

swa man cen bvrgonden | mich vnt di mine sehe

daz ir ietslicher | danne dir dis iehe

daz nie chvenech deheiner | also manigen man

so verre baz gesande | danne dv ce rine hast getan

1157

vnd ob dvz kvenich riche | niht wil darvmb lan

si was in edelen minnen | sifride vndertan

dem sigemvndes chinde | den hastv hie gesehen

man moht im rehter eren | mit maniger warheit iehen

1158

do sprach der kvnich edele | was si des recken wip

so was wol also tivre | des edelen fvrsten lip

daz ich niht versmahen | di chvneginne sol

dvrch ir grozzen schone | so gevallet si mir wol

1159

do sprach der margrave | so wil iv daz sagen

daz wir vns heben hinnen | in vier vnt zeweinzech tagen

ich enbivte iz gotelinde | der lieben vrowen min

daz ich nach criemhilde | selbe bote welle sin

1160

hin ce bechelaren | sande rvedeger

do wart div margrave | trvrech vnd her

er nbot ir daz er solde | dem chvnige werben wip

si gedahte minnechliche | an der schonen helchen lip

1161

do div margravinne | di botschaft vernam

ein teil was ir leide | weinens si gezam

ob si gewinnen solde | vrowen alsam e

so si gedaht an helchen | daz tet ir innechliche we

1162

rvedeger von vngern | in siben tagen reit

des was der kvnech ecel | vro vnt gemeit

da cer stat ce wiene | bereite man im wat

do ne moht er siner reise | do niht langer haben rat

1163

da ce bechelaren | im warte gotelint

div ivnge margravinne | daz rvdegeres chint

sah ir vater gerne | vnt di sine man

da wart ein liebes piten | von schoenen chinden getan

1164

e daz der edel rvedeger | ce bechelaren reit

vz der stat ze wiene | do waren in ir chleit

rehte vollechlichen | vf den sovmen chomen

di fvren in der maze | daz in wart wenich iht genomen

1165

do si ce bechelaren | chomen in di stat

di sinen reisgesellen | herbergen do bat

der wirt vil minnechliche | vnt schvf in gvt gemach

gotelint div riche | den wirt vil gerne chomen sach

1166

alsam tet sin liebiv tohter | dev ivnge margravin

der ne chvnde nimmer | sin chomen lieber sin

di helde vz hivnen landen | wi gerne si si sach

mit lachendem mvte | div edele ivnchvrowe sprach

1167

nv si vns grozze willechomen | min vater vnd sine man

do wart ein schoene danchen | mit vlize da getan

der ivngen margravinne | von manigem ritter gvt

vil wol wesse gotelint | des herren rvedegeres mvt

1168

do si des nahtes nahen | bi rvdgeren lach

wi gvetliche vragen | div margravinne pflach

war in gesendet hete | der chvenich von hevnen lant

er sprach min vrowe gotelint | ich tvn dirz gern bechant

1169

da sol ich minem herren | werben ein ander wip

sit daz ist verdorben | der schonen helchen lip

ich wil nach criemhilde | riten an den rin

div sol hi cen hivnen | gewaltech sin

1170

daz wolde got sprach gotelint | vnd mohte daz geschehen

sit daz wir ir horen | so maniger eren iehen

si ergazt vns miner vrowen | lihte in alten tagen

ovch mohte wir si gerne | cen hivnen crone lazen tragen

1171

do sprach der margrave | trivtinne min

di mit mir svlen riten | hinnen an den rin

den svlt ir minnechliche | bieten iwer gvt

so helde varent riche | so sint hohe gemvt

1172

si sprach ez ist deheiner | der iz gerne von mir nimt

ine gebe ir ietslichem | swaz im wol gecimt

e daz ir hinnen scheidet | vnd ovch iwer man

do sprach der margrave | daz ist mir liebe getan

1173

hey waz man richer pfellel | von ir kamer trvch

der wart den edelen recken | ce teile do genvch

erfvllet vlizechlichen | von hals vnz vf den sporn

di im darzv gevielen | di het im rvdger vzerchorn

1174

an dem sibendem morgen | von bechelaren reit

der wirt mit sinen recken | waffen vnd chleit

fvrten si den vollen | dvrh der beier lant

si wurden vf der strazen | dvrch rovben selten angerant

1175

inner tagen zwelfen | si chomen an den rin

do ne chvnden disiv maere | niht verholn sin

man saget ez dem chvnige | vnt ovch sinen man

ez choemen vremde geste | der wirt do vragen began

1176

ob iemen si bechande | man sold ez im sagen

man sah ir sovmaere | so rehte swaere tragen

daz si vil riche waren | daz wart da bechant

man schvf in herberge | in der witen stat cehant

1177

do di vil vnchvnden | waren in bechomen

do wart der selben herren | vaste wargenomen

si wunderte wannen fveren | di recken an den rin

der wirt nach hagen sande | ob si im chvndech moehten sin

1178

do sprach der helt von tronege| in han ir niht gesehen

als wir si nv geschowen | ich chan iv wol veriehen

von swann si riten | her in dizze lant

si svlen sin vil vremde | ine hab si schiere bechant

1179

den gesten herberge | waren nv genomen

in vil richiv chleider | was der bote bechomen

vnd sine hergesellen | ce hove si do ritten

si fvrten gvtiv chleider | vil harte spaehe gesnitten

1180

do sprach der snelle hagene | als ich mih chan verstan

wande ich den herren lange | niht gesehen han

si varent wol dem geliche | sam ez si rvdeger

von hivnisschen landen | der recke chvne vnd her

1181

wi sol ich daz gelovben | sprach der kvenich zehant

daz der von bechelaren | si chomen in dizz lant

als der chvnich gvnther | di rede vol gesprach

hagene der chvene | den gvten rvdegeren sach

1182

er vnt sine vrivnde | lieffen alle dan

do sach man von den rossen | fvnfhvndert ritter stan

do wurden wol enpfangen | di von hivnen lant

boten nie getrvgen | also herlich gewant

1183

do sprach harte lvte | von tronege hagene

nv sin gote willechomen | dise degene

der voget von bechelaren | vnt alle sine man

der antpfanch wart wol mit eren | den snellen hivnen getan

1184

des chveniges nehesten mage | di giengen da man sach

ortwin von mezze | ce rvedgeren sprach

wir haben in aller wile | mere nie gesehen

geste hi so gern | des wil ich waerliche gehen

1185

des grvzzes si do danchten | den recken vber al

mit den hergesinden | si giengen in den sal

da si den chvenich fvnden | bi manigem herlichem man

der herre stvnt von sedele | daz was dvrch groze zvht getan

1186

wi rehte zvehtechlichen | er zv den boten gie

gvnther vnd giselher | vil vlizechlich enpfie

den gast mit sinen mannen | als im wol gezam

den gvten rvedger | er bi der hende genam

1187

er brahten zv dem sedele | da er selbe saz

den gesten hiez man shenchen | vil gerne tet man daz

met den vil gvten | vnt den besten win

dem man chvnde finden | in dem lande al vmb den rin

1188

giselher vnd gere | di waren beide chomen

dancwart vnd volcher | di heten ovch vernomen

vmb dise geste | si waren vro gemvt

si enpfiengen vor dem chvnige | di ritter edel vnd gvt

1189

do sprach ce sinem herren | von tronege hagene

ez solden immer dienen | dise degene

daz vns der margrave | ce liebe hat getan

des solde lon enpfahen | der schoenen gotelinde man

1190

do sprach der kvnich gvnther | ine chan daz niht verdagen

wi sich gehaben beide | daz svlt ir mir sagen

ecel vnd helche | vzzer hivnen lant

do sprach der margrave | ich tvn iz iv gerne bechant

1191

do stvnt er von dem sedele | mit allen sinen man

er sprach zv dem chvenicge | vnd mach daz sin getan

daz ir mir fvrste erlovbet | so ne wil ich niht verdagen

div maere div ich bringe | sol ich iv vroliche sagen

1192

er sprach swaz man vns maere | bi iv enboten hat

di erlovb ich iv ce sagene | ane vrivnde rat

ir svlt si lazen horen | mich vnt mine man

wand ich iv aller eren | hi ce werbene gan

1193

do sprach der bote biderbe | iv enbivtet an den rin

getriwelichen dienest | der groze voget min

darzv al den vrivnden | di ir mvegt han

ovch ist disiv botschaft | mit grozen triwen getan

1194

iv bat der kvnich edele | chlagen sine not

sin volch ist ane frevde | min frowe div ist tot

helche di vil riche | mines herren wip

an der nv ist verweiset | vil maniger ivnchvrowen lip

1195

chint der edeln fvrsten | div si gezogen hat

davon iz ime lande | vil iamerliche stat

din hant nv leider niemen | der ir mit triwen pflege

des wen ovch sich vil seine | des chveniges sorge gelege

1196

nv lon im got sprach gvnther | daz er den dienest sin

so willechlich enbivtet mir | vnt den vrivnden min

den sinen grvz ich gerne | hie vernomen han

daz svlen gerne dienen | beide mage vnt mine man

1197

do sprach von bvrgonden | der recke gernot

in mag immer riwen | der schoenen helchen tot

dvrch ir vil manige tvgende | der si chvnde pflegen

der rede gestvnt im hagene | darzv vil manich ander degen

1198

do sprach aber rvedger | der edel bote her

sit ir mir kvnich erlovbet | ich sol iv sagen mer

waz iv min lieber herre | her enboten hat

sit im sin dinch nach helchen | so rehte kvmmerlichen stat

1199

man sagt minem herren | criemhilt si ane man

her sifrit si erstorben | vnd ist so getan

welt ir ir des gvennen | so sol si chrone tragen

vor eceln recken | daz hiez ir min herre sagen

1200

do sprach der kvnich riche | wol gezogen was sin mvt

si horet minen willen | ob siz gerne tvt

den wil ich iv chvenden | in disen drien tagen

e ich ez an ir erfvnde | zwiv sold ich eceln versagen

1201

di wile man den gesten | hiez schaffen gvt gemach

in wart da so gedienet | daz rvedeger des iach

daz er da frivnde hete | vnder gvntheres man

hagen im diente gerne | er het im e alsam getan

1202

alsvs beleip do gvnther | vnz an den dritten tach

der kvnich nach rate sande | vil wislich er pflach

ob ez sine mage | dvhte gvt getan

daz criemhilt nemen solde | den kvenich eceln ce man

1203

si rieten al gemeine | niwan hagene

der sprach | ce gvnther dem degene

habt ir rehte sinne | so wirt ez wol behut

ob sis iv volgen wolde | daz irz nimmer getvt

1204

warvmbe sprach do gvnther | sold ichs volgen niht

swaz der chvneginne | liebes geschiht

des sol ich ir wol gvennen | si ist div swester min

wir soltenz selbe werben | op ez ir ere mohte sin

1205

do sprach aber hagene | lat di rede stan

het ir eceln chvende | als ich sin chvende han

sol sin danne minnen | als ich ivch hore iehen

so ist iv allererste | von schvlden sorgen geschehen

1206

varvmb sprach do gvnther | ich behvte vil wol daz

daz ich im chome so nahen | daz ich deheinen haz

von im dvlden mvese | vnd waere sin wip

do sprach aber hagene | ez geraetet nimmer min lip

1207

man hiez nach gernoten | vnd nach giselheren gan

ob di herren beide | dvhte gvt getan

daz criemhilt solde minnen | den richen kvnich her

noch widerreit ez hagene | vnd nieman mer

1208

do sprach von bvrgonden | giselher der degen

nv mvegt ir vrivnt hagene | noh der triwen pflegen

ergezzet si der leide | vnd ir ir habt getan

an swiv ir wol gelvnge | daz soldet ir vngeveht lan

1209

ia habt ir miner swester | getan so manegiv leit

so sprach aber giselher | der recke vil gemeit

daz si des hete schvlde | ob si iv waere gram

nie man decheiner vrowen | noch mere frevdn benam

1210

daz ich daz wol bechenne | daz tvn ich iv chvnt

sol si nemen ecel | gelebt si an di stvnt

si getvt vns noch vil leide bswi siz getragt an

ia wirt ir dienende | vil manich waetlicher man

1211

des antwurte hagenn | der chvne gernot

ez mag also beliben | vnz an ir beider tot

daz wir geriten nimmer | in eceln lant

wir svln ir sin getriwe | daz ist ce den eren vns gewant

1212

do sprach aber hagene | mir mach niemen widersagen

vnd sol div edele criemhilt | helchen chrone tragen

si getvt vns noch vil leide | swi si gefvege daz

ir svlt iz lan beliben | daz zimt iv recken michel baz

1213

mit zorn sprach do giselher | der schoenen vten svn

wir svln doch niht alle | meinlichen tvn

swaz eren ir geschehe | vro solten wir des sin

swaz ir geredet hagene | ich dien ir dvrch di triwe min

1214

do daz gehorte hagene | do wart er vngemvt

gernot vnd giselher | di stolzen ritter gvt

vnd gventher der riche | ce ivngest reiten daz

ob ez lobt criemhilt | si woltenz lazzen ane haz

1215

do sprach der fvrste gere | ich wilz der vrowen sagen

daz si ir den kvenech ecel | laze wol behagen

dem ist so manich recke | vnde grozen vorhten vndertan

er mach si wol ergezzen | swaz ir leides ist getan

1216

do gie der snelle recke | da er crimhilde

si enpfie in gvtliche | wi bald er do sprach

ir mvegt mich gerne grvezzen | vnd geben botembrot

ich wil iv gelvcke scheiden | vil schiere vz aller iwer not

1217

ez hat dvrch iwer minne | vrowe her gesant

ein der allerbeste | der ie chveneges lant

gewan mit vollen eren | oder chrone solde tragen

ez werbent ritter edele | daz hiez iv iwer brvder sagen

1218

do sprach div iamers riche | iv sol verbieten got

vnd allen minen vrivnden | daz si deheinen spot

an mir armer veben | waz sold ich einem man

der ie herceliebe | von gvtem wibe gewan

1219

si widerreit ez sere | do chom aber sint

gernot ir brvder | vnt giselher daz chint

da baten minnechliche | trosten si ir mvt

ob si den kvnich genaeme | ez waer ir waerlichen gvt

1220

vberwinden chvnde | niemen do daz wip

daz si minnen wolde | deheines mannes lip

do baten si di degene | nv lazet doch gesehen

ob ir anders niht getvt | daz ir den boten rvchet sehen

1221

daz eine wil ich niht versprechen | sprach daz vil edel wip

ich en sehe gerne | den rvedgeres lip

dvrch sine manige tvgende | waer er her niht gesant

swerz ander boten waere | dem waer ich immer vmbechant

1222

si sprach ir svlt in morgen | hiezen her gan

zv miner kemenate | ich wil in hoeren lan

vil gar den minen willen | sol ich im selbe sagen

ir wart eritteniwet | daz ir vil groezlichez clagen

1223

do gert ovch niht anders | der edel rvedger

wan daz er gesaehe | di chvenegin her

er weste sich so wisen | ob ez imer sold ergan

daz si sich den recken | veberreden mvese lan

1224

des andern morgens vrv | do man di messe sanch

di edeln boten chomn | do wart da groz gedranch

di mite rvedgere | ce hove wolden gan

do sah man da gechleidet | vil manigen herlichen man

1225

criemhilt div here | vnd vil trvrech gemvt

si warte rvedger | dem edeln boten gvt

der vant si in der waete | di si alle tage trvch

dabi trvch ir gesinde | richer chleider genvch

1226

si giench im engegene | zv der tvr dan

vnd enpfie vil gvtliche | den edeln man

niwan selbe zwelfter | er dar zv ir gie

man bot im grozen dienest | irn chomen hoher boten nie

1227

man hiez den herren sitzen | vnd sine man

di zwene margraven | di sah man vor ir stan

eckewart vnd gere | di edeln recken gvt

dvrch di hvsvrowen | si sahen niemen wol gemvt

1228

si sahen vor ir sizzen | vil manich schoene wip

do pflach niwan iamers | der criemhilde lip

ir wat was vor den brvesten | von heizen traehen naz

der edel margrave | sah wol an criemhilde daz

1229

do sprach der bote here | vil edeles chvniges chint

mir vnt minen gesellen | di mit mir chomen sint

svlt ir daz erlovben | daz wir vor iv stan

vnd iv sagen maere | warnach wir her geritten han

1230

nv si iv erlovbet | sprach div chvenegin

swaz ir reden wellet | also stat min sin

daz ich ez gerne hore | ir sit ein bote gvt

di andern do wol horten | ir vnwilligen mvt

1231

do sprach von bechelaren | der fvrste rvedger

mit triwen groze liebe | ecel ein kvnich her

hat iv enboten vrowe | her in dizze lant

er hat nah iwer minne | vil gvte recken her gesant

1232

ern enbivtet iv innechlichen | minne ane leit

staeter vrivntschefte | der si er iv bereit

als er e tet vrovn helchen | div im ce hercen lach

ia hat er nach ir tvgenden | vil diche vnvrolichen tach

1233

do sprach div chvneginne | margrave rvdger

waer iemen der bechande | miniv starchen ser

der baete mich niht trivten | noch deheinen man

ia verlos ich ein den besten | den ie vrowe ie gewan

1234

waz mach ergezen leides | sprach der vil chvene man

wan frivntliche liebe | swer di chan began

vnt der dan einen chivset | der im ce rehte chvmt

vor hercelicher leide | niht so grozliche frvmt

1235

vnd gervchet ir ce minnen | den edeln herren min

zwelf vil richer chrone | svlt ir gewaltech sin

darzv git iv min herre | wol drizech fvrsten lant

div elliv hat betwungen | sin vil ellenthaftiv hant

1236

ir svlt ovch werden vrowe | vber manigen werden man

di miner vrowen helchen | waren vndertan

vnd veber manige vrowen | der si het gewalt

von hoher fvrsten chvenne | sprach der chvene degen balt

1237

darzv git iv min herre | heizet er iv sagen

ob ir gervchet chrone | bi dem kvenige tragen

gewalt den allerhohesten | den helche ie gewan

den svlt ir gewaltechliche | haben vor ecelen man

1238

do sprach div chvneginne | wi mohte min lip

immer des gelvsten | deich wurde heldes wip

mir hat der tot an einem | so rehte leit getan

des ich vnz an min ende | mvz vnvroliche stan

1239

do sprachen aber di hivnen | kvneginne rich

iwer leben wirt bi ecel | so reht lobelich

daz ivch immer wundert | ist daz ez ergat

want der kvnich riche | vil manigen cieren degen hat

1240

helchen ivnchvrowen | vnt iwer magedin

solten di bi einander | ein gesinde sin

dabi mohten recken | werden wol gemvt

lat ez iv vrowe raten | ez wirt iv waerlichen gvt

1241

si sprach in ir zvehten | nv lat di rede stan

vnze morgen vrv | so svlt ir her gan

ich wil iv antwurten | des ir da habt mvt

des mvsen do gevolgen | di recken chven vnde gvt

1242

do si cen herbergen | alle chomen dan

do hiez div edel vrowe | nach giselhern gan

vnd ovch nach ir mvter | den beden sagt si daz

daz si gezaeme weinen | vnd niht anderes baz

1243

do sprach ir brvder giselher | swester mir ist geseit

vnd wilz ovch wol gelovben | daz elliv diniv leit

der kvnich ecel swende | vnd nimestvn ceinem man

swaz iemen ander rate | so dvncht ez mich wol getan

1244

er mach dich wol ergezzen | sprach aber giselher

vome rotten zv dem rine | von der elbe vnz an daz mer

so ist kvenech deheiner | so gewaltech niht

dv maht dich vrowen balde | so er din ce chonen giht

1245

si sprach min vil lieber brvder | zwiv raetestv mir daz

chlagen vnd weinen | mir immer zaeme baz

wi sold ich vor recken | da ce hove gan

wart min lip ie schone | des pin ich ane getan

1246

do sprach div vrowe vte | ir lieben tohter zv

swaz dine brvder raten | liebez chint daz tv

volge dinen frivnden | so mach dir wol geshehen

ich han dich doh so lange | mit grozem iamer gesehen

1247

do bat si got vil diche | fvegen ir den rat

daz si ce geben hete | golt silber vnd wat

sam e bi ir manne | do er noch was gesvnt

si gelebte doch nimmer mere | sit so vroliche stvnt

1248

si gedahte in ir sinnen | vnd sol ich minen lip

geben einem heiden | ich pin ein christen wip

des mvz ich cer werlde | immer schaden han

gaebe mir elliv riche | ez ist von mir vil vngetan

1249

damit siz lie beliben | di naht vnz an den tach

div vrowe an ir bette | mit vil gedanchen lach

div ir vil liehtv ovgen | getrvchenten nie

vnz daz si aber den morgen | hin ce mettene gie

1250

ze rehter messecite | di chvnige waren chomen

si heten aber ir swester | vnder hende genomen

ia rieten si ir ze minnen | den kvnich von hivnen lant

di vrowen ir deheiner | lvecel vroliche vant

1251

do hiez man dar gewinnen | di eceln man

di nv mit vrlovbe | waeren gerne dan

geworben oder gescheiden | swi ez do moehte sin

ce hove chom do rvedger | di helde reiten vnder in

1252

daz man reht erfvere | des edeln fversten mvt

vnd taeten daz becite | daz divhtes alle gvt

ir wege waeren verre | wider in ir lant

man brahte rvedegern | da er criemhilde vant

1253

vil minnechliche piten | der recke do began

di edeln chveneginne | si solde in horen lan

waz si enbieten wolde | in eceln lant

er waen an ir niht anders | niwan lavgenen vant

1254

daz si nimmer minnen wolde | mer deheinen man

do sprach der margrave | daz waere missetan

zwiv woldet ir verderben | einn also schoenen lip

ir mvegt noch mit eren | werden gvtes mannes wip

1255

niht half daz si gebaten | vnz rvedger

si gesprach in heimliche | di chveneginne her

er wolde si ergzen | swaz ir ie gesach

ein teil begonde ir senften | do ir grozer vngemach

1256

er sprach cer kvneginne | lat iwer weinen sin

ob ir ce hivnen hetet | niemen danne min

getriwer miner mage | vnd ovch der miner man

er mveses ser engelten | vnt het iv iemen iht getan

1257

davon wart wol geringet | do der vrowen mvt

si sprach so swert mir eide | swaz mir iemen getvt

daz ir sit der naehste | der bveze minv leit

do sprach der margrave | vrowe des pin ich bereit

1258

mit allen sinen mannen | swur ir do rvedger

mit triwen immer dienen | vnt daz di recken her

ir nimmer niht versageten | vz eceln lant

des si ere haben solde | des sichert ir rvedegers hant

1259

do gedahte div getriwe | sit ich vrivnde han

also vil gewunnen | so sol ich reden lan

di livte swaz wellen | ich iamerhaftez wip

waz ob noch wirt errochen | des minen liebn mannes lip

1260

si gedahte sit daz ecel | der recken hat so vil

sol ich den gebieten | so tvn ich swaz ich wil

er ist ovch wol so riche | daz ich ce geben han

mich hat der leidege hagene | mines gvtes an getan

1261

si sprach ce rvedgere | het ich daz vernomen

daz er niht waere ein heiden | so wold ich gerne chomen

swar er hete willen | vnd naem in ceinem man

do sprah der margrave | di rede svlt ir vrowe lan

1262

er hat so vil der recken | in cristenlicher e

daz iv bi dem chvenige | nimmer wirdet we

waz ob ir daz verdienet | daz er tovffet sinen lip

des mvegt ir gerne werden | des kvnich eceln wip

1263

do sprach aber ir brvder | nv lob iz swester min

iwer vngemvete | daz svlt ir lazen sin

si batens also lange | vnz doch ir trvrech lip

lobte vor den helden | si wuerde eceln wip

1264

si sprach ich wil iv volgen | ich armiv kvnegin

daz ich var zv den hivnen | so daz nv mach gesin

swenne ich han di vrivnde | di mich fveren in sin lant

des bot do vor den helden | div schone criemhilt ir hant

1265

do sprach der margrave | habt ir zwene man

darzv han ich ir mere | ez wirdet wol getan

daz wir ivch wol nach eren | bringen vber rin

ir svlt niht vrowe langer | hi cen bvergonden sin

1266

ich han fvnhvndert manne | vnd ovch der mage min

di svln iv hi dienen | vnt da heime sin

vrowe swi ir gebietet | ich tvn iv selbe alsam

swenne ir mich mant der maere | daz ich mich es nimmer gesham

1267

nv heizet iv bereiten | iwer pfaertchleit

di rvedgeres raete | iv nimmer werden leit

vnd sagetez iwern magedin | di ir da fveren welt

ia chvmt vns vf der straze | vil manich vzerwelter helt

1268

si heten noch gesmide | daz man davor reit

bi sifrides ziten | daz si vil manige meit

mit eren mohte fveren | swenne si wolde dan

hey waz man gvter saetele | den schoenen vrowen gewan

1269

ob si e ie getrvgen | deheiniv richen kleit

der wart zv zir verte | vil manigez nv bereit

wand in von dem kvnige | so vil gesaget wart

si slvzen vf di chisten | di e stvnden wol bespart

1270

si waren vil vnmvezech | wol fvenftehalben tach

si svchten vz der valden | des vil darinne lach

criemhilt do ir kamer al | entslizen began

si wolde machen riche | alle rvdegeres man

1271

si hete noch des goldes | von nibelvnge lant

si wand ez cen hivnen | teiln solde ir hant

daz ez wol hvndert moere | ninder chvnden tragen

div maere horte hagene | do von criemhilde sagen

1272

er sprach sit mit vrov criemhilt | nimmer wirdet holt

so mvz ovch hi belibn | daz sifrides golt

zwiv sold ich minen finden | lan so michel gvt

ich weiz wol waz criemhilt | mit disem shaze getvt

1273

ob si in brehte hinnen | ich wil gelovbn daz

er wurde doch certeilet | vf den minen haz

sin habnt ovch nicht der rosse | di in solden tragen

in wil behalten hagene | daz sol man criemhilde sagen

1274

do si gehorte div maere | do was ir grimme leit

ez wart ovch den kvenegen | allen drin geseit

si woltenz gerne wenden | do des niht geschach

rvedger der edele | harte vroliche sprach

1275

richiv chveneginne | zwiv chlagt ir daz golt

iv ist der chvnich ecel | so grozlichen holt

gesehent ivch siniv ovgen | er git iv also vil

daz irz verswendet nimmer | des ich iv vrowe sweren wil

1276

do sprach div chveneginne | vil edel rvedger

ez gewan chvniges tohter | nie richeite mer

danne der mich hagene | ane hat getan

do chom ir brvder gernot | hin zir kemenaten gegan

1277

mit gewalt des chveniges den slvezel | stiez er an di tver

golt daz criemhilde | reichte man darfver

ce drizech tvsent marchen | oder dannoch baz

er hiez iz nemn di geste | liep was gvnthere daz

1278

do sprach von bechelaren | der gotelinde man

ob ez min vrowe criemhilt | allez moehte han

swaz sin ie wart gefveret | von nibelvnge lant

sin solde lvecel rveren min | oder der kveneginne hant

1279

nv heizet ez behalten | wand ich es nine wil

ia fvrt ich von lande | des minen also vil

daz wirs vf der straze | haben gvten rat

vnd vnser choste hinnen | harte herlichen stat

1280

davor in aller wile | gefvllet zwelf schrin

des allerbesten goldes | daz inder mohte sin

hete di ir megde | daz fvrt man von dan

vnd gezierde vil der vrowen | daz si cir verte solde han

1281

gewalt des grimmen hagenen | dvhte si ce starch

si het ir opffergoldes | noch wol tvsent march

si teiltez siner sele | ir vil liebem man

daz dvhte rvedgern | mit grozen triwen getan

1282

do sprach div chlagende vrowe | wa sint di vrivnde min

di dvrch mine liebe | wellent ellende sin

di svln mit mir riten | in der hivnen lant

di nemen shaz den minen | vnd chovffen ros vnt ovch gewant

1283

do sprach cer kveneginne | der margrave eckewart

sit daz ich allerste | iwer gesind wart

so han ich iv mit triwen | gedient sprach der degen

vnd wil vnz an minen ende | des selben immer bi iv pflegen

1284

ich wil ovch mit mir fveren | fvnfhvndert minen man

der ich iv ce dienste | mit rehten triwen gan

wir sin vil vngescheiden | ez en tv dan der tot

der rede neig im criemhilt | des gie ir waerliche not

1285

do zoch man dan di moere | si wolden varn dan

da wart vil michel weinen | von vrivnden getan

vte div vil riche | vnd manich schone meit

di zeigeten daz in waere | nach vrovn criemhilde leit

1286

hvndert richer magede | fvrt si mit ir dan

di wurden so gechleidet | als in wol gezam

do vielen in di trehene | von liehten ovgen nider

si gelebt vil der vrevden | ovch bi eceln sider

1287

do chom der herre giselher | vnd ovch gernot

mit ir gesinde | als in ir zvht gebot

do wolden si beleiten | ir liebe swester dan

do fvrten si ir rechen | wol tvsent waetlicher man

1288

do chom der snelle gere | vnd ovch ortwin

rvmolt der chvchenmeister | damite mvse sin

si svffen di nahtselde | vnz an tvonowe stat

do reit niht fverbaz gvnther | wan ein lvecel fvr di stat

1289

e si von rine fveren | si heten fver gesant

ir boten harte snelle | in der hivnen lant

di dem chvnige sageten | daz im rvedger

ce wibe het erworben | di edeln kvneginne her