Buch der Natur

II. Von den himeln und

von den siben planêten.

___________________________________________________

32.

Von dem ertreich.

Daz vierd element und daz allerniderst ist daz ertreich. daz hât an den himel dreihunderttausent und neuntausent und drei hundert und fünfundsibenzig meil. daz habent vil haidenischer maister und christenischer lêrer bewært. alsô spricht unser puoch ze latein und spricht auch mêr, daz kain mensch daz für ain missagen hab und für ainen fräveleichen spruch, wan ez ist mit grôzer arbait und mit kluogem gezeug in der sternseher kunst funden. aber gemain läut, die wênik wizzent, slahent manger langen wârhait ainen snellen kahtz, si gelaubent auch wênik, wie ainr auzwendik der stat auf dem veld verr hin dan möht ains turns hœhen gemezzen in der stat mit ainem spiegel, und kan man ez doch; alsô vint man auch die hœhen. daz ertreich ist dem menschen daz aller gemachsamst element, wann er wont auf der erden sam got und die engel auf dem himel. diu erd enpfæht den menschen in seinr gepurt, wenne er des êrsten in die werlt gêt und helt den gepornen. allain diu erd zürnt mit dem menschen niht, aber diu andern driu element zürnent oft mit im, wan daz wazzer ertrenkt den menschen und der pœs luft tœt in auch und daz feur verprennt in. diu erd ist von nâtûr kalt und trucken und ist auzwendig ungenæm und besleuzt doch in ir vil schœner dinge, sam edel stain und edel gesmeid. alsô ist manig dêmüetiger mensch, der inwendig grôzen schatz behalten hât. daz ertreich ist gar fruhtpær, wann ez mag kain fruht gewahsen dann auf der erden. wie vil meil daz ertreich hab an seinem umbkraiz und wie dick ez sei, daz vint man in meinr däutschen spera, und war umb ez under uns niht auf den himel vall. daz ertreich tailt sich in dreu stuck, diu wonhaft sint. daz êrst stück haizt Asia und gêt von mittem tag durch der sunnen aufganch unz zuo dem himelwagen. daz ander haizt Europa und gêt von dem himelwagen unz zuo der sunnen underganch. in dem selben tail sei wir. daz dritt stück gêt von der sunnen underganch unz zuo mittem tag, und ist allain Asia daz ganz halb tail des wonhaften ertreichs. wizz, als daz herz ze mitelst in dem tier ist, alsô ist diu hell ze mitelst in dem ertreich. alsô sprechent die hailigen lêrer.