Sacramentarium Gregorianum

_________________________________________________________

18.

Aliae orationes

Deus inluminator omnium gentium, da populis tuis perpetua pace gaudere et illud lumen splendidum infunde cordibus nostris, quod trium magorum mentibus aspirasti: per.

Alia. Deus cuius unigenitus in substantia nostrae carnis apparuit: praesta quaesumus ut per eum quem similem nobis foras agnouimus, intus reformari mereamur: per.

Alia. Omnipotens sempiterne deus, fidelium splendor animarum, qui hanc sollemnitatem electionis gentium primitiis consecrasti: imple mundum gloria tua et subditis tibi populis per luminis tui appare claritatem: per.

Alia. Concede nobis omnipotens deus, ut salutare tuum noua caelorum luce mirabile, quod ad salutem mundi hodierna festiuitate processit, nostris semper innouandis cordibus oriatur: per.

Alia. Da nobis quaesumus domine digne celebrare mysterium, quod in nostri saluatoris infantia miraculis coruscantibus declaratur, et corporalibus incrementis manifesta designatur humanitas: per.

Alia. Praesta quaesumus omnipotens deus, ut saluatoris mundi stella duce manifestata natiuitas mentibus nostris reueletur semper et crescat: per.

Alia. Inlumina domine quaesumus populum tuum et splendore gloriae tuae cor eius semper accende, ut saluatorem suum et incessanter agnoscat et ueraciter adprehendat: per.