B  I  B  L  I  O  T  H  E  C  A    A  U  G  U  S  T  A  N  A
           
  Johans, der Jansen Enikel
um 1230/40 - nach 1300
     
   


W e l t c h r o n i k

L o t   u n d   d e r
U n t e r g a n g   v o n
S o d o m   u n d   G o m o r r a h


Verse 4051 - 4292

_____________________________________

 
 
    Nû mac ich iu niht verdagen,
ich müez iu von der wârheit sagen,
daz got fünf steten wart vil gram
umb ir ungehôrsam.
4055
er liez ir vier versinken
und in der erd ertrinken.
ich wil iu allen tuon bekant,
wie di stet wârn genant.
ein stat Gomorra hiez,
4060
dâ er di liut ertrinken liez.
diu ander stat hiez Sodomâ.
unrein liut wâren dâ.
diu dritt Soboym hiez,
di ouch got versinken liez
4065
umb ir bœs sünde dâ.
diu vierde hiez Adamâ.
diu fünft stat hiez Segor.
ûz der was gegangen vor
Lothes hûsfrou, als man seit.
4070
der geschach sît vil grôz leit.
in den fünf steten vor genant
wâren liut inn erkant,
die nimmer bœser mohten sîn.
man und degenkindelîn
4075
hêten si ze briute,
die selben bœsen liute.
nû merkt, swie gar dem tievel sî
schalcheit und bôsheit bî:
von himel zuo dem abgründ
4080
noch verfluochet er die sünd,
diu dâ heizet Sodomâ.
bî der blîbt er niht lenger dâ
dann biz er sie geschünde.
sô unrein ist die sünde.
4085
diu sünd was bî in ân zal
in den fünf steten über al.
dâ von si got versinken liez,
ir sêl er in die helle stiez.

    In den steten was nieman,
4090
der got wær dienstes undertân,
wan ein guot man hiez Lot,
der dient vil gern dem lieben got.
zuo dem er zwên engel sant
unde hiez im tuon bekant,
4095
daz die stet solden versinken
und in dem wâg ertrinken.
die engel wârn sicherlîch
klâr und dar zuo freudenrîch,
wan si wârn in den gebærn,
4100
sam si zwên jüngling wærn.
dô si zuo Lot kômen gegân
und in sîn hûs für in stân,
si sprâchen beid: «got grüez dich, Lot!
wir sîn von got zuo dir ein bot.
4105
er enbiutet dir sicherlîch,
der liebe got vil rîch,
dû süllest dich niht sûmen,
die stat solt dû rûmen,
dû und dîn hûsfrou guot.
4110
dîn tohter hab in huot.
dû solt si heizen mit dir gân.
niht lenger solt dû hie bestân.
die stet süln versinken
und in dem wâg ertrinken
4115
durch ir grôze bôsheit.
diu ist got von schulden leit.
ich sag, daz nieman in der stat
ist ân bœs missetât
wan dû und diu hûsfrou dîn
4120
und dîniu reiniu kindelîn.
dâ von îl von hinnen,
wellest dû entrinnen
dem grimmigen gotes zorn.
belîbst dû hie, dû bist verlorn.»

4125
    Dô diu red alsô geschach,
den engeln wârn geslichen nâch
die unreinen liute
und wolden hân ze briute
die engel mit ir huore;
4130
sô unrein was ir fuore.
für sîn hûs kômen si gegân
und begunden für di tür stân
und vorderten di jüngling beid.
Lothen geschach nie sô leid.
4135
Loth der vil guote
sprach ûz trûrigem muote:
«ir lât die red stân.
nemt mîn tôhter di ich hân,
die sint zwô maget sicherlîch,
4140
mit den sô wert ir freudenrîch.
lât dis boten geniezen mîn.
dar umb wil ich iu holt sîn.»
mit der red er beleip,
unz die naht der tac vertreip.
4145
di huorer giengen von in dan.
des freut sich der guot man.
dar nâch der engel wider in sprach,
dô er den tac schînen sach:
«wol ûf Loth! ginc enwec
4150
über den berc an einen stec!
dû solt ouch nimmer umbe sehen,
swaz disen steten mac geschehen.
daz enbiutet dir diu gotheit.
tuost dû sîn niht, ez wirt dir leit.»

4155
    Zehant huop sich dannen Lôt,
als im der engel dô gebôt,
von der stat ûf ein heide.
sîn töhter nam er beide
und sîn hûsfrouwen guot.
4160
«ich sag iu, waz ir tuot:
iur dhein sol niht umbe sehen,
swaz disen steten süll geschehen.
schrîen, rüefen unde schal
hœrt ir allez über al:
4165
des sült ir ahten kleine,
wan si sint gar unreine.»
dô lobten si im stæte,
daz ez ieslîchez tæte.
dâ mit gie der guot man
4170
ûf einen hôhen berc von dan.
dâ hôrt er schrîen, rüefen vil.
dâ was dheiner slahte spil,
wan ach und wê was in mit.
der engel sluoc nâch gotes sit
4175
diu hiuser, daz si sunken
und in dem wâg ertrunken.

    Dô daz geschrei erhôrt
Loth hie unde dort,
dô gienc er allez für sich hin.
4180
dô bestuont diu hûsfrou sîn
und sach den jæmerlîchen val
und daz rüefen âne zal.
dô wart si stênt stille.
daz selb was gotes wille:
4185
si wart zuo einer salzsiul zehant,
daz wunder wolt der heilant
der werlt erzeigen gemeine,
daz man sîn gebot reine
behalten sol ze aller stunt.
4190
daz ist iu allen worden kunt,
daz si zuo einer salzsiul wart.
daz geschach an der selben vart,
als si noch hiut vor uns stât,
daz si gotes gebot übertrat,
4195
dâ von si nimmer komen mac
biz an den jungisten tac.
bî dem wîb dâ nieman beleip.
Loth sîn töhter für sich treip.

    Dâ mit dô giengens in ein holz.
4200
dâ wurden si des nahtes stolz,
wan si wîn truogen mit in.
daz was an in ein grôzer sin.
spîs hêten si dâ vil genuoc.
di töhter wâren kluoc:
4205
diu ein zuo der andern sprach:
«unser friund ungemach
müet mich vil sêre,
doch klag ich michels mêre,
daz wir ân friunt süllen sîn.
4210
daz klag ich, liebiu swester mîn,
wan ez sint friunt, mâg und ros
versunken all in daz mos.
wir süln mit unsern sinnen
ander friunt gewinnen,
4215
bruoder unde swesterlîn.
daz schaff ich hiut mit dem wîn.»
diu jung zuo der alten sprach:
«swaz mir ze leid ie geschach,
des wil dû mich ergetzen wol,
4220
wan dû bist wîser red vol.
sag, wie wil dû ez grîfen an,
daz wir ân friunt iht bestân?»
diu alt der jungen antwurt dô:
«swester, dû solt wesen vrô.
4225
wir süln mit disem guoten wîn
trenken den lieben vater mîn,
sô wil ich werden alsô kluoc,
daz er werd trunken genuoc.
ich leg mich an den arm sîn,
4230
sô wænt der lieb vater mîn,
ez sî mîn muoter, diu uns liez
und sich in grôzen jâmer stiez.»
diu jung sprach: «ich sag dir für wâr,
wirt er sîn innen bî einem hâr,
4235
zwâr er wirt dir tuon den tôt.
des twingt in grôz nôt,
wann dû verliesen wil dîn êr.»
diu alt sprach: «dû fürhtst dir sêr.
ich muoz in nackent hînt bestân,
4240
swie ez mir halt süll ergân.»
dâ mit ir vater zuo gie.
diu tohter in vil schôn enpfie
und truoc in für ein lægelîn,
dar inn was edel, guot wîn,
4245
und hiez in trinken vil nôt,
biz er vor trunkenheit wart rôt
und ouch unversunnen lac
die naht biz an den tac.
ein bett wart dô bekant,
4250
daz hêt diu tohter mit ir hant
gemacht, als si best kunde.
er leit sich an der selben stunde.
zuo im leit si sich drât.
über sich daht si ir wât
4255
und leit in schôn an ir arm.
dâ lâgen si ân mâzen warm.
dô der vater entwachte,
diu tohter in an lachte.
er wânt, ez wær sîn êlîch wîp.
4260
er druct sie nâhen an den lîp
und macht sie swanger an der stat.
dar nâch sleich si von im drât,
dô er anderstunt entslief.
der swester si zuo ir rief
4265
unde sagt ir die mær,
wie ez ir ergangen wær.
diu jung swester sprach dô:
«sît ez ergangen ist alsô,
sô müg mir, swester, sam geschehen.
4270
des wil ich von der wârheit jehen.»
dar nâch an der andern naht
diu tohter im ein læglîn brâht
mit edelm, guotem wîn vol.
unz er getranc ân mâzen wol,
4275
si sprach: «lieber vater mîn,
wil dû edeln, guoten wîn?
dâ solt dû dich mit laben schôn.
dû treist der êren krôn.»
waz solt er sich mit wîn laben?
4280
der zung maht er niht gehaben.
zuo bett wîst man in dô.
des was diu jung tohter vrô.
die macht er ouch swanger zehant.
diu kint wurden dô bekant.
4285
dô si gewuohsen nâch ir reht,
vil mangen ritter unde kneht
gewunnen si und manic lant;
dâ wurdens herren in bekant.
die wil ich iu noch nennen,
4290
daz ir si mügt erkennen.
der ein was Joab genant,
der ander Moab bekant.