Le Roman de la Rose

Chapitre XXVIII

____________________________________________________________________________

Comment Bel-Acueil doucement

Maine l'Amant joyeusement

Au vergier pour véoir la Rose,

Qui luy fut doulcereuse chose.

Bel Acueil au comencement

3344

Me salua mout doucement;

S'il ot esté vers moi iriez,

Ne se fu de rien empiriez,

Ainz me montra plus bel semblant

3348

Qu'il n'avoit onques fait devant.

Il m'a lores par la main pris

Por mener dedenz le porpris

Que Dangiers m'avoit chalongié.

3352

Or ai d'aler par tot congié,

Or sui cheoiz, ce m'est avis,

De grant enfer en parevis,

Car Bel Acueil par tot me moine,

3356

Qui de mon gré faire se poine.

Si con j'oi la rose apressiee,

Un poi la trovai engroissiee,

E vi qu'ele estoit puis creüe

3360

Que je ne l'oi de près veüe;

La rose auques s'eslargissoit

Par amont; si m'abelissoit

Ce qu'el n'iere pas si overte

3364

Que la graine fust descoverte;

Ançois estoit encore enclose

Entre les fueilles de la rose,

Qui amont droites se levoient

3368

E la place dedenz emploient,

Si ne pooit paroir la graine,

Por la rose qui estoit pleine.

Ele fu, Deus la beneïe,

3372

Assez plus bele espaneïe

Qu'el n'iere avant e plus vermeille.

Toz m'esbaï de la merveille:

E Amors plus e plus me lie

3376

De tant come ele est embelie,

E tot adès estreint ses laz

Tant con je voi plus de solaz.

Grant piece ai iluec demoré,

3380

Qu'en Bel Acueil grant amor ai

E grant compaignie trovee;

E quant je voi qu'il ne me vee

Ne son solaz ne son servise,

3384

Une chose li ai requise

Qui bien fait a amentevoir:

«Sire», fis je, «sachiez de voir

Que durement sui envieus

3388

D'avoir un baisier precieus

De la rose qui soef flaire,

E, s'il ne vos devoit desplaire,

Je le vos requerroie en dons.

3392

Por Deu, sire, dites moi dons

Se il vos plaist que je la baise,

Car ce n'iert ja tant qu'il vos plaise.

– Amis», fait il, «si Deus m'aïst,

3396

Se Chasteé ne m'enhaïst,

Ja ne vos fust par moi veé,

Mais je n'ose por Chasteé,

Vers cui je ne vueil pas mesprendre.

3400

Ele me siaut toz jorz defendre

Que dou baisier congié ne doigne

A nul amant qui m'en semoigne,

Car qui au baisier puet ataindre

3404

A poine puet atant remaindre;

E sachiez bien cui l'en otroie

Le baisier, il a de la proie

Le miauz e le plus avenant,

3408

Si a erres dou remenant.»

Quant je l'oï ensi respondre,

Je nou vos plus de ce semondre,

Car jou cremoie corrocier:

3412

L'en ne doit mie ome enchaucier

Outre son gré n'angoissier trop.

Vous savez bien qu'au premier cop

Ne cope l'en mie le chesne,

3410

Ne l'en n'a pas le vin de l'aisne

Tant que li pressoirs soit estroiz.

Adès me tarda li otroiz

Dou baisier que je desiroie,

3420

Mais Venus, qui toz jorz guerroie

Chasteé, me vint au secors:

Ce est la mere au deu d'Amors,

Qui a secoru maint amant.

3424

Ele tint un brandon flamant

En sa main destre, don la flame

A eschaufee mainte dame;

Si fu si cointe e si tifee

3428

Qu'el resembla deesse ou fee;

Dou grant ator que ele avoir

Bien puet conoistre qui la voit

Qu'el n'est pas de religion.

3432

Ne ferai or pas mencion

De sa robe e de son oré.

Ne de son treçoer doré,

Ne de fermail, ne de corroie,

3436

Por ce que trop i demorroie;

Mais bien sachiez certainement

Qu'ele fu cointe durement,

E si n'ot point en li d'orgueil.

3440

Venus se trait vers Bel Acueil,

Si li a comencié a dire:

«Por quoi vos faites vos, biaus sire,

Vers cel amant si dangereus

3444

D'avoir un baisier doucereus?

Ne li deüst estre veez,

Car vos savez bien e veez

Qu'il sert e aime en leiauté,

3448

Si a en lui assez biauté,

Par quoi est dignes d'estre amez.

Veez come il est acesmez,

Come il est biaus, come il est genz

3452

E douz e frans vers toutes genz;

E avuec ce il n'est pas viauz,

Ainz est enfes, don il vaut miauz.

Il n'est dame ne chastelaine

3456

Que je ne tenisse a vilaine

S'ele faisoit de lui dangier.

Ses cors ne fait pas a changier

Se le baisier li otreiez;

3460

Mout iert en lui bien empleiez,

Qu'il a, ce cuit, mout douce aleine;

E sa bouche n'est pas vilaine,

Ainz semble estre faite a estuire

3464

Por solacier e por deduire,

Car les lèvres sont vermeillettes

E les denz blanches e si netes

Qu'il n'i a teigne ne ordure.

3468

Bien est, ce m'est avis, mesure

Que uns baisiers lui soit greez.

Donez lui, se vos m'en creez,

Car tant con vos plus atendroiz,

3472

Tant, ce sachiez, de tens perdroiz.»