Le Roman de la Rose

Chapitre XXIX

____________________________________________________________________________

Comment l'ardent brandon Venus

Aida à l'Amant plus que nus,

Tant que la Rose ala baiser,

Por mieulx son amours apaiser.

Bel Acueil, qui senti l'aier

Dou brandon, senz plus delaier,

M'otreia un baisier en dons,

3476

Tant fist Venus e ses brandons;

N'i ot onques plus demoré:

Un baisier douz e savoré

Ai pris de la rose erraument.

3480

Se j'oi joie nus nou demant,

Car une odor m'entra ou cors

Qui en geta la dolor hors

E adouci les maus d'amer

3484

Qui me soloient estre amer.

Onques mais ne fui si aaise.

Mout est gueriz qui tel flor baise,

Qui est si sade e bien olanz.

3488

Je ne serai ja si dolenz,

S'il m'en sovient, que je ne soie

Toz pleins de delit e de joie;

E neporquant j'ai mainz enuiz

3492

Soferz e maintes maies nuiz

Puis que j'oi la rose baisiee.

La mer n'iert ja si apaisiee

Qu'el ne soit troble a poi de vent;

3496

Amors se rechange sovent,

Il oint une eure e autre point,

Amors n'est guieres en un point.

Des ore est droiz que je vos conte

3500

Coment je fui mellez a Honte,

Par cui je fui puis mout grevez,

E coment li murs fu levez

E li chastiaus riches e forz,

3504

Qu'Amors prist puis par ses esforz.

Toute l'estoire vueil porsivre,

Ja parece ne m'iert d'escrivre,

Por quoi je cuit qu'il abelisse

3508

A la bele, que Deus guerisse,

Qui le guerredon m'en rendra

Miauz que nule quant el voudra.