VI
[Der junge Künstler]

Nu Tristan der ist ze hûse komen

3380

unwizzende, alse ir habet vernomen,
und wânde doch ellende sîn.
der unverwânde vater sîn,
Marke der tugende rîche
der gewarp vil tugentlîche.

3385

ouch was des dô vil michel nôt.
er bat besunder unde gebôt
al dem hovegesinde,
daz sî dem vremedem kinde
guot unde genaedic waeren

3390

und daz s'im êre baeren
mit rede und mit gesellekeit.
des wâren s'alle samet bereit
mit willeclîchem muote.
sus was Tristan der guote

3395

des küneges ingesinde dô.
der sach in gerne und was sîn vrô,
wan in truog ouch sîn herze dar
und nam sîn gerne und ofte war;
wan er was z'allen zîten

3400

höfschlîche an sîner sîten
und truog in sînen dienest an
als ofte, als er sîn state gewan.
swâ Marke was oder swar er gie,
dâ was Tristan der ander ie

3405

und nam daz Marke wol vür guot.
er truoc im harte holden muot
und tete im wol, swenne er in sach.
In den dingen ez geschach,
innerthalp den ahte tagen

3410

reit Marke selbe mit im jagen
und hovegesindes vil dâ mite
schouwen sînen jagesite
und sîner künste nemen war.
nu hiez im Marke bringen dar

3415

sîn jagephert und gab im daz.
Tristan wart nie geriten baz,
wan ez was starc, schoene unde snel.
ein hornelîn süeze unde hel
hiez er im geben an sîne hant.

3420

«Tristan» sprach er «nu wis gemant,
daz dû mîn jegermeister bist,
und zeige uns dînen jagelist.
nim dîne hunde unde var
und schicke dîne warte dar,

3425

dâ sî dich rehte dunken stân.»
«nein hêrre, ezn mac sô nicht ergân»
sprach aber der höfsche Tristan
«heizet die jegere kêren dan,
die suln die warte sâzen

3430

und suln von ruore lâzen.
die erkennent hie ze lande sich
und wizzent michel baz dan ich,
wâ der hirz hin ziuhet
und vor den hunden vliuhet.

3435

die erkennent die gelegenheit.
sô bin ich, der hie nie gereit,
und bin mitalle ein vremede kneht.»
«daz weiz got, Tristan, dû hâst reht.
du enkanst dich hier an niht bewarn.

3440

die jegere müezen selbe varn
und sich verrihten under in.»
hie mite kêrten die jegere hin
und koppelten ir hunde
und stalten an der stunde

3445

ir warte, als sî wol wisten wâ,
und liezen z'einem hirze sâ
und jageten den ze strîte
unz gein der abentzîte.
dô erliefen in die hunde.

3450

und an der selben stunde
kam Marke und sîn Tristan
und mit in zwein manc hoveman
gerant ze dem gevelle.
dô wart grôz horngeschelle

3455

in maneger slahte dône.
si hürneten sô schône,
daz ez Marken sanfte tete
und mit im manegem an der stete.

Nu sî den hirz gevalten,

3460

ir meister sî dar stalten,
Tristanden, den heinlîchen gast,
und bâten, daz er sî den bast
von ende z'ende lieze sehen.
Tristan der sprach: «diz sol geschehen!»

3465

und mit der rede bereite er sich.
nu waene ich wol und dunket mich,
daz ez undurften waere,
ob ich iu zwir ein maere
nâch ein ander vür leite.

3470

rehte alse ich iu ê seite
von jenem hirze, rehte alsô
enbaste er aber disen dô.
den bast und die furkîe,
die kunst von der curîe,

3475

dô si die begunden sehen,
si begunden eines mundes jehen,
daz nieman von dem liste
niht bezzers enwiste
noch niemer kunde ervinden.

3480

der künec der hiez dô binden
den hirz ûf unde kêrte dan.
er und sîn jegere Tristan
und al sîn massenîe
mit gehürne und mit furkîe

3485

riten sî dô ze hûse wider.
als was der guote Tristan sider
ein lieber hoveman under in.
künec unde gesinde haeten in
in guoter geselleschaft.

3490

ouch was er alsô dienesthaft
dem armen unde dem rîchen.
möhte er ir iegelîchen
ûf sîner hant getragen hân,
daz haete er gerne getân.

3495

die saelde haete im got gegeben:
er kunde und wolte in allen leben.
lachen, tanzen, singen,
rîten, loufen, springen,
zuhten unde schallen,

3500

daz kunde er mit in allen.
er lebete, swie man wolte
und als diu jugent solte.
swes ir dekeiner began,
daz huob er iemer mit im an.

3505

Nu gevuogete sich daz,
daz Marke an eime tage gesaz
ein lützel nâch der ezzenzît,
sô man doch kurzewîle pflît,
und losete sêre an einer stete

3510

einem leiche, den ein harpfaere tete,
ein meister sîner liste,
der beste den man wiste.
der selbe der was ein Gâlois.
nu kam Tristan der Parmenois

3515

und saz ze sînen vüezen dar
und nam sô vlîzeclîche war
des leiches unde der süezen noten.
waere ez im an den lîp geboten,
ern möhte ez niht verswigen hân:

3520

sîn muot begunde im ûf gân,
sîn herze daz wart muotes vol.
«meister» sprach er «ir harpfet wol.
die noten sint rehte vür brâht,
senelîche und alse ir wart gedâht.

3525

die macheten Britûne
von mînem hêrn Gurûne
und von sîner vriundinne.»
diz nam in sîne sinne
der harpfaere und loste allez dar,

3530

als er der rede niht naeme war,
unz er den leich volante.
gein dem kinde er sich dô wante:
«waz weistu» sprach er «liebez kint,
von wannen dise noten sint?

3535

kanstu ihtes iht hier an?»
«jâ schoener meister» sprach Tristan
«ich haete es hie vor meisterschaft.
nû hât ez aber sô cleine craft,
daz ich vor iu niht engetar.»

3540

«nein vriunt, sê dise harpfen dar,
lâ hoeren, welher hande
kan man in dînem lande?»
«gebietet ir daz, meister mîn,
und sol ez mit iuwerm urloub sîn,

3545

daz ich iu harpfe?» sprach Tristan.
«jâ trût geselle, sê harpfe an!»

Als er die harpfen dô genam,
sînen handen sî vil wol gezam.
die wâren, alse ich hân gelesen,

3550

daz sî niht schoener kunden wesen:
weich unde linde, cleine, lanc
und rehte alsam ein harm blanc.
mit den sô ruorte er unde sluoc
ursuoche und notelîne genuoc

3555

seltsaene, süeze, guote.
hie mite wart ime ze muote
umbe sîne leiche von Britûn.
sus nam er sînen plectrûn:
nagel unde seiten zôher,

3560

dise niderer, jene hôher,
rehte als er si wolte hân.
nu diz was schiere getân.
Tristan, der niuwe spilman,
sîn niuwez ambet huob er an

3565

mit vlîzeclîchem ruoche.
sîne noten und sîne ursuoche,
sîne seltsaene grüeze
die harpfete er sô süeze
und machete sî schoene

3570

mit schoenem seitgedoene,
daz iegelîcher dâ zuo lief,
dirre jenem dar nâher rief.
vil schiere kam diu hoveschar
almeistic loufende dar

3575

und wânde niemer komen ze vruo.
nu Marke der sach allez zuo
und saz allez trahtende,
sînen vriunt Tristanden ahtende
und wunderte in des sêre,

3580

daz er sô höfsche lêre
und alsô guote liste,
die er an im selben wiste,
alsô verhelen kunde.
Nu Tristan der begunde

3585

einen leich dô lâzen clingen în
von der vil stolzen vriundîn
Grâlandes des schoenen.
do begunde er suoze doenen
und harpfen sô ze prîse

3590

in britûnischer wîse,
daz maneger dâ stuont unde saz,
der sîn selbes namen vergaz.
dâ begunden herze und ôren
tumben unde tôren

3595

und ûz ir rehte wanken.
dâ wurden gedanken
in maneger wîse vür brâht.
dâ wart vil ofte gedâht:
«â saelic sî der koufman,

3600

der ie sô höfschen sun gewan!»
jâ sîne vinger wîze
die giengen wol ze vlîze
walgende in den seiten.
si begunden doene breiten,

3605

daz der palas voller wart.
dane wart ouch ougen niht gespart,
der kapfete vil manegez dar
und nâmen sîner hende war.

Nu dirre leich der was getân:

3610

nu hiez der guote künec dar gân
und sprach, daz man in baete,
daz er noch einen taete.
«mû voluntiers!» sprach Tristan.
rîlîche huob er aber an

3615

einen senelîchen leich als ê
de la cûrtoise Tispê
von der alten Bâbilône.
den harpfete er sô schône
und gie den noten sô rehte mite

3620

nâch rehte meisterlîchem site,
daz es den harpfaer wunder nam.
und alse ez ie ze staten kam,
sô lie der tugende rîche
suoze unde wunneclîche

3625

sîne schanzûne vliegen în.
er sanc diu leichnotelîn
britûnsche und gâloise,
latînsche und franzoise
sô suoze mit dem munde,

3630

daz nieman wizzen kunde,
wederez süezer waere
oder baz lobebaere,
sîn harpfen oder sîn singen.
sich huop von sînen dingen

3635

und von sîner vuoge
rede unde zal genuoge.
si jâhen al gelîche,
sine vernaemen in dem rîche
an einem man die vuoge nie.

3640

der sprach dort und dirre hie:
«â waz ist diz von kinde?
waz hân wir zuo gesinde?
ez ist allez umbe den wint,
elliu diu kint, diu nu sint,

3645

wider unserm Tristande!»
Tristan dô der verande
sînen leich nâch sîner ger,
Marke sprach: «Tristan, gâ her.
der dich dâ hât gelêret,

3650

der sî vor gote gêret
und dû mit ime! daz ist vil wol.
dîne leiche ich gerne hoeren sol
underwîlen wider naht,
sô dû doch niht geslâfen maht.

3655

diz tuostu wol mir unde dir.»
«jâ hêrre, wol.» «nu sage mir,
kanstû kein ander seitspil noch?»
«nein hêrre» sprach er. «nû iedoch?
rehte als lieb als ich dir sî,

3660

Tristan, dâ vrâge ich dich es bî.»
«hêrre» sprach Tristan al zehant
«irn dörftet mich niht hân gemant
sô verre, ich seite ez iu doch wol,
sît ich'z iu doch sagen sol

3665

und ir ez wellet wizzen.
hêrre, ich hân gevlizzen
an iegelîchem seitspil
und enkan doch keines alsô vil,
ine kunde es gerne mêre.

3670

ouch hân ich dise lêre
niht vil manegen tac getriben
und zwâre ich bin derbî beliben
under mâlen kûme siben jâr
oder lützel mêre, daz ist wâr.

3675

mich lêrten Parmenîen
videln und symphonîen.
harpfen unde rotten
daz lêrten mich Galotten,
zwêne meister Gâloise.

3680

mich lêrten Britûnoise,
die wâren ûz der stat von Lût,
rehte lîren und sambjût.»
«sambjût, waz ist daz, lieber man?»
«daz beste seitspil, daz ich kan.»

3685

«seht» sprach daz gesinde
«got der hât disem kinde
ûf rehte wunneclîchez leben
sîner genâden vil gegeben!»
Marke der vrâgte in aber dô mê:

3690

«Tristan, ich hôrte dich doch ê
britûnsch singen und gâlois,
guot latîne und franzois.
kanstû die sprâche?» «hêrre, jâ,
billîche wol.» nu kam iesâ

3695

der hûfe dar gedrungen.
und swer iht vremeder zungen
von den bîlanden kunde,
der versuohte in sâ zestunde:
dirre sus und jener sô.

3700

hier under antwurte er dô
höfschlîche ir aller maeren:
Norwaegen, Irlandaeren,
Almânjen, Schotten unde Tenen.
dâ begunde sich manc herze senen

3705

nâch Tristandes vuoge.
dâ wolten genuoge
vil gerne sîn gewesen als er.
im sprach vil maneges herzen ger
suoze und inneclîche zuo:

3710

«â Tristan, waere ich alse duo!
Tristan, dû maht gerne leben!
Tristan, dir ist der wunsch gegeben
aller der vuoge, die kein man
ze dirre werlde gehaben kan.»

3715

ouch macheten sî hier under
mit rede michel wunder:
«hôrâ!» sprach diser, «hôrâ!» sprach der
«elliu diu werlt diu hoere her!
ein vierzehenjaerec kint

3720

kan al die liste, die nu sint!»

Der künec sprach: «Tristan, hoere her:
an dir ist allez, des ich ger.
dû kanst allez, daz ich wil:
jagen, sprâche, seitspil.

3725

nu suln ouch wir gesellen sîn,
dû der mîn und ich der dîn.
tages sô sul wir rîten jagen,
des nahtes uns hie heime tragen
mit höfschlîchen dingen:

3730

harpfen, videlen, singen,
daz kanstu wol, daz tuo du mir.
sô kan ich spil, daz tuon ich dir,
des ouch dîn herze lîhte gert:
schoeniu cleider unde pfert,

3735

der gibe ich dir swie vil du wilt.
dâ mite hân ich dir wol gespilt.
sich, mîn swert und mîne sporn,
mîn armbrust und mîn guldîn horn,
geselle, daz bevilhe ich dir.

3740

des underwint dich, des pflic mir
und wistu höfsch unde vrô!»
sus was der ellende dô
dâ ze hove ein trût gesinde.
ezn gesach nie man von kinde

3745

die saelde, die man an im sach.
swaz er getete, swaz er gesprach,
daz dûhte und was ouch alse guot,
daz ime diu werlt holden muot
und inneclîchez herze truoc.

3750

hie mite sî der rede genuoc.
wir suln diz maere legen nider
und grîfen aber an jenez wider,
sîn vater, der marschalc dan Rûal
li foitenant et li lêal,

3755

waz der nâch ime getaete,
dô er'n verloren haete.