BIBLIOTHECA AUGUSTANA

 

Das Nibelungenlied

1190/1200

 

 

Der Nibelunge Nôt

 

6. Aventiure

 

___________________________________________________

 

 

Aventivre wie gvnther gen isenlande

nach prvnhilt fvor

 

325

Itniuowe maere | sich hvoben vber rin

man sagte daz da waere | manech scoenen magedin

der gedaht im eine erwerben | gvnther der kvnech gvot

davon begvnde dem rechen | vil sere hohen der mvot

326

ez was ein kvneginne | gesezen vber se

ir geliche enheine | man wesse ninder me

div was vnmazen scoene | vil michel was ir chraft

si scoz mit snelln degenen | vmb minne den scaft

327

den stein den warf si verre | darnach si witen spranch

swer ir minne gerte | der mvose ane wanch

driv spil an gewinnen | der frovwen wol geboren

gebrast im an dem einem | er hete daz hovbet sin verloren

328

des het div ivnchfrovwe | vnmazen vil getan

daz gehorte bi dem rine | ein riter wolgetan

der wande sine sinne | an daz scoene wip

darvmbe mvosen helede | sit verliesen den lip

329

do sprach der vogt von rine | ich wil nider an den se

hin ce prvnhilde | swi es mir erge

ich wil dvrch ir minne | wagen minen lip

den wil ich verliesen | si ne werde min wip

330

daz wil ich widerraten | sprach do sivrit

ia hat div kvneginne | so vreisliche sit

swer vmb ir minne wirbet | daz ez im hohe stat

des mvget ir der reise | habn waerlichen rat

331

so wil ih iv daz raten | sprach do hagene

ir bittet sivride | mit iv ce tragene

di vil starchn swaere | daz ist nv min rat

sit im daz ist so chvendech | wi ez vm prvenhilde stat

332

er sprach wil dv mir helfen | edel sivrit

werbn die minnechlichen | tvostv des ich dich bit

vnt wirt mir ceime trvote | daz minnechliche wip

ich wil dvrch dinen willen | wagen ere vnde lip

333

des antwurte sivrit | der sigmvndes svn

gistv mir dine swester | so wil ich ez tvn

di scoenen chrimhilde | ein kvneginne her

so ger ich deheines lones | nach minen arbeiten mer

334

daz lob ich sprach do gvnther | sivrit an dine hant

vnt chvmt div scoene prvenhilt | her in dizze lant

so wil ich dir ce wibe | mine swester gebn

so mahtv mit der scoenen | immer vroeliche lebn

335

des swuoren si do eide | di rechen vil her

des wart ir arbeiten | verre deste mer

e daz si di frovwen | brahten an den rin

des mvosen di vil chvenen | sit in grozen sorgen sin

336

sivrit der mvose fveren | di kappen mit im dan

di der helt vil chvene | mit sorgen gewan

ab eime getwerge | daz hiez albrich

sich bereiten zvo der verte | di rechen chven vnd rich

337

also der starche sivrit | di tarnkappen trvoch

so het er darinne | chrefte genvoch

wol zwelf manne sterche | zvo sin selbes lip

er warp mit grozen listen | daz vil herliche wip

338

ovch was div selbe tarnhvot | also getan

daz darinne worhte | ein ieslicher man

swaz er selbe wolde | daz in doch niemen sach

svss gewan er prvenhilde | davon im leide geschach

339

nv sag mir degen sivrit | e daz min vart erge

daz wir mit wollen ern | chomn an den se

svlen wir iht rechen fveren | in prvenhilde lant

drizech tvsent degene | di werdent sciere besant

340

swie vil wir volches fveren | sprach aber sivrit

ez pfligt div kvneginne | so vreislicher sit

di mvosen doch ersterben | von ir vbermvot

ich sol ivch baz bewisen | degen chvene vnd gvot

341

wir svln in rechen wise | ce tal varen den rin

die wil ich dir benennen | di daz svlen sin

selbe vierde degene | varn wir an den se

so erwerbn wir di frovwen | swi ez vns darnach erge

342

der gesellen bin ich einer | daz ander soltv wesn

der dritte daz si hagene | wir mvgen wol genesen

der vierde daz si danchwart | der vil chvene man

vns endvrfen andr tvosent | mit strite nimmer bestan

343

div maere wess ich gerne | sprach der kvnech do

e daz wir hinnen fveren | des waere ich harte vro

waz wir chleider solden | vor prvenhilde tragn

div vns da wol gezaemn | daz svlt ir gvnthere sagn

344

wat die allerbesten | di ieman bevant

die treit man zallen citen | in prvenhilde lant

des svlen wir richiv chleider | vor der frovwen tragen

daz wirs iht haben scande | so man div maere hoere sagen

345

do sprach der degen gvoter | so wil ich selbe gan

zvo miner lieben mvoter | ob ich erbitten chan

daz vns ir scoenen meide | helfen prveuen chleit

di wir tragn mit ern | fver di herlichen meit

346

do sprach von tronege hagne | mit herlichen siten

waz welt ir iwer mvoter | soelher dienste biten

lat iwer swester hoeren | wes ir habet mvot

so wirdet iv ir dienest | zvo dirre hovereise gvot

347

do enbot er siner swester | daz er si wolde sehn

vnt ovch der degen sivrit | e daz was geschen

do het sich div scoene | ce wunsche wol gechleit

daz chomn der vil chvenen | daz waz ir maezliche leit

348

nv was ovch ir gesinde | gezieret als im zam

di fversten chomn beide | do si daz vernam

do stvont si von dem sedele | mit zvehten si do gie

da si den gast vil edele | vnt ovch ir brvoder enpfie

349

willechomn si min brvoder | vnt der geselle sin

div maere ich wiste gerne | so sprach daz magedin

waz ir herrn woldet | sit ir ce hove gat

daz lazet ir mich hoeren | wi ez iv edelen rechen stat

350

do sprach der kvnech gvnther | frovwe ich wilz iv sagn

wir mvezzen michel sorgen | bi hohem mvote tragn

wir wellen hoefscen riten | verre in vremdiv lant

wir solten zvo der reise | haben cierlich gewant

351

nv sizzet lieber brvoder | sprach daz kvneges kint

vnt lat mich rehte hoeren | wer di frovwen sint

der ir da gert mit minnen | in ander chvnege lant

di vzerwelten beide | nam div frovwe bi der hant

352

do gie si mit in beiden | da si e da saz

vf matrazze div vil richen | ich wil wol wizen daz

geworht von gvoten bilden | mit golde wol erhabn

si mohten bi den frovwen | gvote chvrzwile habn

353

friwentliche bliche | vnt gvotlichez sehn

des mohte da in beiden | harte vil gescehn

er trvoch si ime hercen | si was im so der lip

sit wart div scoene chrimhilt | des starchen sivrides wip

354

do sprach der kvnech riche | vil liebiv swester min

ane dine helfe | chvnd ez niht gesin

wir wellen chvrzwilen | in prvenhilde lant

da bedorften wir ce habene | vor frovwen herlich gewant

355

do sprach div ivnchfrovwe | vil lieber brvoder min

swaz der minen helfe | daran chan gesin

des bring ich ivch wol innen | daz ich iv bin bereit

versagt iv ander iemen | daz waere chrimhilde leit

356

ir svlt mich riter edele | niht sorgende biten

ir svlt mir gebieten | mit herlichen siten

swaz iv von mir gevalle | des bin ich iv bereit

vnt tvon ez willechliche | sprach div wunnechlichiv meit

357

wir wellen liebeiv swester | tragn gvot gewant

daz sol helfen prveuen | iwer edeliv hant

des volziehen iwer magede | daz ez vns rehte stat

wand wir der verte | han deheiner slahte rat

358

do sprach div ivnchfrovwe | nv merchent waz ich sage

ich han selbe siden | nv scaffet daz man trage

gesteine vns vf den scilden | so wurchen wir div chleit

des willen was do gvnther | vnt ovch sivrit bereit

359

wer sint die gesellen | sprach div kvnegin

di mit iv gechleidet | ce hove svlen sin

er sprach ich selbe vierde | zwene mine man

danchwart vnt hagene | svln ce hove mit mir gan

360

ir svlt vil rehte merchen | waz ich iv frovwe sage

daz ich selbe vierde | ce vier tagen trage

ie drier hande chleider | vnt also gvot gewant

daz wir ane scande | rvmen prvenhilde lant

361

mit gvotem vrlovbe | di herrn schieden dan

do hiez ir ivnchfrovwen | drizech meide gan

vz ir chemnaten | chrimhilt div kvnegin

di zvo soelhem werche | heten groezlichen sin

362

die arabischen siden | wiz also der sne

vnt von zazamanch der gvoten | grven alsam der chle

darin si leiten steine | des wurden gvotiv chleit

selbe sneit si chrimhilt | div vil herliche meit

363

von vremder vissce hivten | bezoch wolgetan

ce sehene vremden livten | swaz man der gewan

die dachten si mit siden | so si se solden tragn

nv hoeret michel wunder | von der liehten waete sagn

364

von marroch vz dem lande | vnd ovch von lybian

die allerbestn siden | di ie mer gewan

deheines kvnegs chvenne | der heten si genvoch

wol lie daz scinen chrimhilt | daz si in holden willen trvoch

365

sit si der hohen verte | heten nv gegert

haermine vedern | di dvhten si vnwert

pfellel darob lagen | swarz alsam ein chol

daz noch snellen heleden | stvende in hohgeciten wol

366

vz arabischem golde | vil gesteins scein

der frovwen vnmvoze | div ne was niht chlein

inre siben wochen | bereiten si div chleit

do was ovch ir gewaefen | den gvoten rechen bereit

367

do si bereitet warn | do was in vf den rin

gemachet flizechlichen | ein starchez sciffelin

daz si tragen solde | vol nider an den se

den edelen ivnchfrovwon | was von arbeiten we

368

do sagte man den rechen | in waeren nv bereit

div si da fveren solden | ir zierlichen chleit

also di da gerten | daz was nv getan

do ne wolden si niht langer | bi dem rine bestan

369

nach den hergesellen | wart ein bote gesant

ob si wolden scovwen | niwez ir gewant

ob ez den helden waere | ce chvrz vnd ovch ze lanch

ez was in rehter maze | des sagten si den frovwen danch

370

fver alle di si chomn | di mvosen in des iehn

daz si cer werlde heten | bezers niht gesehn

des mohten si se gerne | da ze hove tragn

von bezer rechen waete | chvnde niemn niht gesagn

371

vil groezliche danchen | wart do niht verdeit

do gerten vrlovbes | di helde vil gemeit

in riterlichen zvhten | di herrn taten daz

des wurden liehtiv ovgen | von wein trveb vnde naz

372

si sprach vil lieber brvoder | ir moehtet noh bestan

vnt werbet ander frovwen | daz hiez ich wol getan

da iv so sere enwage | stvende niht der lip

ir mvgt hie naher vinden | ein also hochgeborn wip

373

ich waen in sagt ir herce | daz in davon geschach

si weinten al geliche | swaz iemn gesprach

ir golt in vor den brvesten | wart von trahen sal

di vielen in genote | von den ovgen hin ce tal

374

si sprach herre sivrit | lat iv bevolhen sin

vf triwe vnt vf genade | den lieben brvoder min

daz im iht gewerre | in prvnhilde lant

daz lobte der vil chvene | in frovn chrimhilde hant

375

do sprach der degen riche | ob mir min lebn bestat

so svlt ir aller sorgen | frovwe habn rat

ich bringen iv gesvnden | her wider an den rin

daz wizet sicherlichen | im neich daz scoene magedin

376

er goltvarwen scilde | man trvog in vf den sant

vnt braht in zvo zin | allez ir gewant

ir ross hiez man in ciehen | si wolden riten dan

da wart von scoenen frovwen | vil michel weinen getan

377

do stvonden in den venstern | div minnechlichen chint

ir sciff mit dem segele | daz rvort ein hoher wint

di stolzen hergeselln | di sazen vf den rin

do sprach der kvnech gvnther | wer sol nv sciffmeister sin

378

daz wil ich sprach sivrit | ich chan ivch vf der flvot

hinnen wol gefveren | daz wizzet helde gvot

di rehten wazerstrazen | di sint mir wol bechant

si scieden vroelichen | vz der bvrgonden lant

379

sivrit do balde | eine scalten gewan

von stade begvnde schieben | der chreftige man

gvnther der chvene | ein rvoder selbe nam

do hvoben sich von lande | di snellen riter lobesam

380

si fvorten riche spise | darzvo vil gvoten win

den besten den man chvnde | vinden vmben rin

ir rosse div stvonden scone | si heten gvot gemach

ir sciff daz gie vil ebene | vil lvzel leides in gescach

381

ir vil starchen segelseil | div wurden in gestraht

si fvoren zweinzech mile | e daz ez wurde naht

mit eime gvotem winde | nider gegn dem se

ir starchez arbeiten | tet sit den hohgemvoten we

382

an dem zwelften morgen | so wir hoeren sagen

heten si di winde | verre dan getragen

gegen isensteine | in prvnhilde lant

daz was ir deheinem | niwan sivride erchant

383

do der kvnec gvnther | so vil der bvrge sach

vnt ovch di witen marche | wie balde er do sprach

sagt mir friwent sivrit | ist iv daz bechant

wes sint dise bvrge | vnt ovch daz herliche lant

384

des antwurte sivrit | ez ist mir wol bechant

ez ist prvnhilde | livte vnde lant

vnt isenstein div veste | als ir mich hortet iehn

da mvget ir noch hivte | vil scoener frovwen gesehn

385

vnt wil iv helden raten | ir habt einen mvot

ir ieht geliche | ia dvnchent ez mich gvot

swenne wir noch hivte | fvr prvnhilde gan

so mvezen wir mit sorgen | vor der chvneginne stan

386

do wir di minnechlichen | bi ir gesinde sehn

so svlt ir helde maere | wan einer rede iehn

gvnther si min herre | vnt ich si sin man

des er da hat gedingen | daz wirt allez getan

387

des waren si bereite | swaz er si loben hiez

dvrh ir vbermvete ir | deheiner ez niht liez

si iahen swes er wolde | davon in wol gescach

do der kvnech gvnther | di scoenen prvnhilde sach

388

ia ne lob ihz niht so verre | dvrch die liebe din

so dvrch dine swester | daz scoene magedin

div ist mir sam min sele | vnt so min selbes lip

ich wil daz gerne dienen | daz si werde min wip